لانگ مارچ دی سیاست ،ماضی وچ کیہ نتیجے نکلے؟

لانگ مارچ نوں احتجاجی سیاست یا کسی وی تحریک وچ سب توں اہم ہتھیار تصور کیتا جاندا اے۔ 1956,1953 تے 1959 وچ وڈے احتجاجی مظاہرے تے ہوئے مگر اوس ویلے اوہنوں لانگ مارچ دا نام نہیں دتا جاندا سی۔ پاکستان وچ 90 دی اہئی وچ ایس طرحاں دے احتجاج نے اک باقاعدہ شکل اختیار کر لیتی تے اوہنوں لانگ مارچ دا نام دے دتا گیا۔ ایس لانگ مارچ دے نتیجے وچ حکومتاں ڈگن لگیاں’ نواز شریف تے محترمہ بے نظیر بھٹو دی حکومتاں وی لانگ مارچ دی نذر ہو گئیاں۔ 90 دی دہائی توں پہلاں وی کجھ احتجاجی تحریکاں نے کافی شہرت حاصل کیتی۔ 1953 وچ چلن والی ختم نبوت دی تحریک فوری طور اتے تے نتیجہ خیز ثابت نہیں ہو سکی مگر ایوب خان دے مارشل لا لان دی وجوہات وچ اک وجہ ضرور سی۔ 1977 وچ پاکستان دے طول و عرض وچ صدارتی انتخابات دے تحت فاطمہ جناح دی انتخابی مہم دے دوران وڈے پیمانے تے سیاسی جلوساں دا سلسلہ شروع ہویا تاہم ایس سارے عرصے دے دوران لانگ مارچ دی اصطلاح دا کوئی ریکارڈ نہیں ملدا۔
کدی حکومت تبدیل ہوئی تے کدی کجھ نہ ہویا جماعت اسلامی نوں لانگ مارچ تے دھرنیاں دے حوالے نال کافی شہرت حاصل ہوئی۔ اوہنے پہلا مارچ ستمبر 1996 وچ قاضی حسین احمد دی قیادت وچ ملین مارچ دے نام نال کیتا۔اوہدا مقصد اوس ویلے دی وزیراعظم بے نظیر بھٹو دی حکومت دا ماتہ سی۔
1980 وچ پاکستان دی تریخ وچ ویسے تے بہت سارے لانگ مارچ تے دھرنے نظر آندے نیں تاہم دارالحکومت اسلام آباد وچ 4تے 5جولائی 1980 نوں اک لانگ مارچ منعقد کیتا گیا جہدے وچ آمر حکمران ضیاالحق ولوں نافذ کیتے جان والے زکوٰة تے عشر دے حوالے نال مظاہرہ کیتا گیا۔
ایس مظاہرے وچ اسلام آباد وچ وفاقی سیکرٹریٹ دا محاصرہ کیتا گیا جہدے توں بیورو کریسی مفلوچ ہو کے رہ گئی۔ 17 اگست 1989 نوں بینظیر بھٹو دے پہلے دور حکومت وچ نواز شریف دی سربراہی وچ حزب اختلاف ولوں ضیاء الحق دی پہلی برسی منان دے حوالے نال اسلام آباد ولوں لانگ مارچ کیتا گیا۔ ایس موقع تے پہلی واری حکومت ولوں ایہہ تجویز سامنے آئی کہ مظاہرے نوں روکن لئی اسلام آباد نوں سیل کردتا جاوے تاہم اوس ویلے دے وزیر داخلہ اعتزاز احسن ولوں مظاہرین نوں اسلام آباد دے اندر داخلے دی اجازت دے دتی گئی’ جہدے توں کسی وی قسم دے بدنظمی دا سامنا نہیں کرنا پیا۔ نومبر 1992 وچ بے نظیر بھٹو نے نواز شریف حکومت دے خلاف لانگ مارچ دا اعلان کیتا تے اوس ویلے دے صدر غلام اسحاق خان نے نواز شریف دی پہلی حکومت نوں برطرف کردتا۔ 1993 وچ بے نظیر دے لانگ مارچ دے نتیجے وچ وزیراعظم نواز شریف تے صدر اسحاق خان نوں استعفیٰ دینا پیا۔
اوہ دھرنے تے لانگ مارچ جو مخالفاں اتے بھاری پووے اوہناں وچ جماعت اسلامی دا فروری 1999وچ نواز شریف دے دور حکومت وچ بھارت دے پچھلے وزیراعظم اٹل بہاری واجپائی دے دورے دے موقع تے لہور وچ دتا گیا دھرنا سی۔ جماعت اسلامی دے امیر قاضی حسین احمد نوں لانگ مارچ تے دھرنیاں دے حوالے نال کافی شہرت ملی تے جماعت اسلامی نے پہلا مارچ’ ستمبر 1996 وچ قاضی حسین احمد دی قیادت وچ ملین مارچ دے نام توں کیتا’ ایہدا مقصد اوس ویلے دی وزیراعظم بے نظیر بھٹو دی حکومت دا خاتمہ سی۔ 27,26 اکتوبر نوں جماعت اسلامی ولوں بے نظیر حکومت دے خلاف دھرنا دتا گیا جہدے نتیجے وچ 5 دسمبر نوں صدر فاروق لغاری نے اسمبلی توڑ دتی۔ اوہدے کجھ ہفتیاں مگروں پاکستان پیپلز پارٹی دی حکومت ختم ہو گئی۔ لانگ مارچ تے دھرنے جماعت اسلامی نال ایس طرح منسوب ہوئے کہ اوہدا ٹریڈ مارک بن گئے۔ساڈی سیاسی تریخ وچ اوہ لانگ مارچ وی شامل نیں جہناں دے آغاز دے چند گھنٹیاں مگروں ای مطالبیاں نوں تسلیم کر لیتا گیا۔ مارچ 2007 وچ شروع ہون والی وکلا تحریک دا فیصلہ کن مرحلہ اوس ویلے آیا جدوں مسلم لیگ ن ولوں وکلا تحریک دی حمایت دا اعلان کیتا گیا۔ 15مارچ 2009 نوں نواز شریف دی قیادت وچ لہور توں شروع ہون والا مارچ گوجرانوالہ پہنچیا ای سی کہ اوس ویلے دے وزیراعظم یوسف رضا گیلانی نے پچھلے چیف جسٹس افتخار چودھری تے دوجے ججاں نوں بحال کرن دا اعلان کردتا۔ اوہدے نال اوہ لانگ مارچ وی شامل نیں جو اپنے مطالبے منوان وچ کامیاب تے نہ ہو سکے مگر اوہناں نے شہرت بہت پائی۔ ایس حوالے نال پاکستان عوامی تحریک دے سربراہ ڈاکٹر طاہر القادری دے 2013 دا لانگ مارچ جد کہ عمران خان دا 2014دا آزادی مارچ سرفہرست نیں۔2013وچ پاکستان پیپلز پارٹی دے دور حکومت وچ ڈاکٹر طاہر القادری دی پاکستان عوامی تحریک نے الیکسن کمیشن آف پاکستان دی غیر آئینی تشکیل دے خلاف لہور توں اسلام آباد تک لانگ مارچ کیتا گیا۔
ایہہ لانگ مارچ 5دن (13جنوری 2013تا 17جنوری 2013) تک جاری رہیا۔ ایس لانگ مارچ دے نتیجے وچ حکومت وقت تے پاکستان عوامی تحریک وچ معاہدہ طے پایا۔ اوہنوں اعلامیہ اسلام آباد لانگ مارچ دا نام دتا گیا۔ ایس اعلامیہ دے تحت قومی اسمبلی نوں (اپنی مقررہ معیاد )16مارچ 2013 توں پہلاں کسی وی ویلے تحلیل کردتا جاوے گا تاں جے اوہدے مگروں 90دن دے اندر اندر انتخابات دا انعقاد کروایا جاسکے۔ 14 اگست 2014 نوں پاکستان تحریک انصاف دے چیئرمین تے پاکستان عوامی تحریک دے سربراہ ڈاکٹر طاہر القادری ولوں اسلام آباد ول مشترکہ لانگ مارچ کیتا گیا۔ اوس لانگ مارچ دا مرکز ڈی چوک اسلام آباد بنیا۔ اوس دھرنے دا مقصد نواز شریف حکومت دا خاتمہ تے نویں انتخابات سن۔ عمران خان ولوں اوس دھرنے دی بنیادی وجہ 2013 دے عام انتخابات وچ ہون والی مبینہ دھاندلی سی۔ ایہہ دھرنا ملکی تریخ دا لما دھرنا سی جہدا دورانیہ 126 دن رہیا تاہم ایہہ دھرنا کسی قسم دے سیاسی مقصد حاصل کیتے بغیر 17 دسمبر 2014 نوں اختتام پذیر ہویا۔
ایسے طرحاں 2015 وچ معرض وجود وچ آن والی مذہبی سیاسی جماعت تحریک لبیک پاکستان نے 2017 وچ فیض آباد وچ ختم نبوت توں متعلق حلف نامے وچ مبینہ ترمیم مگروں دھرنا دتا۔ تحریک لبیک پاکستان دا دھرنے توں متعلق ایہہ موقف سامنے آیا کہ حکومت ولوں الیکشن بل 2017 وچ کیتی جان والی آئینی ترمیم وچ حلف نامہ دے لفظاں نوں بدل دتا گیا سی۔ ٹی ایل پی دے مظاہرین ولوں حکومت نوں مطالبہ کیتا گیا سی کہ اوہ اوس ویلے دے وزیر قنون زاہد حامد کولوں استعفیٰ لووے۔ حکومت ولوں ٹی ایل پی دے خلاف اپریشن کیتا گیا جہدے مگروں ملک بھر وچ مظاہرے شروع ہو گئے۔ کئی شہراں وچ مظاہرین نے سڑکاں بلاک کر دتیاں تے ذرائع نقل و حمل نوں معطل کردتا گیا جہدے کارن حکومت ہور دبائو وچ آ گئی۔
نومبر نوں مذاکرات مگروں دھرنے نوں ختم کردتا گیا۔ اوس دھرنے دے نتیجے وچ وزیر قنون زاہد حامد نے استعفیٰ دتا جد کہ معاہدے دے تحت ٹی ایل پی دے سارے گرفتار کارکناں نوں رہا کردتا گیا۔ نومبر 2017 وچ تحریک لبیک نے فیض آباد وچ دھرنا دتا جہدے نتیجے وچ اسلام آباد تے راولپنڈی دا پورے ملک نال رابطہ منقع ہو گیا۔ اوس دھرنے وچ موٹر وے نوں وی کئی مقامات توں بلاک کردتا گیا۔ 27 نومبر نوں حکومت دے نال کامیاب مذاکرات مگروں اوس دھرنے نوں ختم کردتا گیا۔
اکتوبر 2019 وچ مولانا فضل الرحمان ولوں اسلام آباد ول آزادی مارچ کیتا گیا۔ اوس مارچ دا مقصد اوس ویلے دی حکومت دا خاتمہ تے وزیراعظم عمران خان دا استعفیٰ سی۔ اگرچہ پاکستان پیپلز پارٹی تے ن لیگ نے اوس لانگ مارچ وچ حصہ نہیں لیتا تاہم دونویں جماعتاںولوں اوس مارچ دی سپورٹ دا اعلان کیتا گیا۔ ایہہ مارچ 9نومبر 2019نوں اختتام پذیر ہویا۔ ایہہ وی اپنے مقصد حاصل نہیں کر سکیا البتہ مولانادے سیاسی قد کاٹھ وچ ضرور وادھا ہو گیا۔
اکتوبر 2021 نوں تحریک لبیک ولوں اسلام آباد ول مارچ کیتا گیا۔ تحریک لبیک ولوں کیتے جان والے اوس مارچ مقصد حکومت وقت ولوں ٹی ایل پی اتے لائی جان والی پابندی نوں ختم کرنا’ فرانسیسی سفیر دی ملک بدری تے سعد حسین رضوی دی رہائی سی۔ ایہہ لانگ مارچ 22اکتوبر2021نوں پنجاب دے شہراں لہور’ ملتان’ گجرات تے گوجرانوالہ توں شروع ہویا۔ 7نومبر 2021نوں حکومت ولوں تحریک لبیک پاکستان اتے نافذ پابندی نوں ختم کردتا گیا۔ ایہہ لانگ مارچ 18 نومبرنوں ٹی ایل پی دے سربراہ سعد حسین رضوی دی رہائی مگروں ختم ہویا۔ چالوں سال مسلم لیگ ن دی رہنما مریم نواز نے 24مارچ نوں اسلام آباد ول مہنگائی مارچ دے نام توں مارچ کیتا۔ اوس مارچ نوں کامیاب قرار نہیں دتا گیا۔ مارچ وچ لیگی کارکناں دی عدم دلچسپی دی وڈی وجہ ایہہ سی کہ قیادت دے ایجنڈے دا ای پتہ نہیں سی کہ لانگ مارچ دے مقاصدکیہ نیں تے کیہ ایہہ اسلام آباد جا کے دھرنے دی شکل اختیار کرے گا کہ نہیں؟ ایسے بے یقینی دی کیفیت نے مارچ دی نکامی وچ اہم کردار ادا کیتا۔
بلاول بھٹو نے وی 27فروری 2022نوں کراچی توں اسلام آباد ول لانگ مارچ دا آغاز کیتا’ اوس مارچ نے کامیابی تے حاصل نہیں کیتی مگر پیپلز پارٹی دے کارکناں نوں متحرک ضرور کردتا۔ خاص طور تے جدوں ایہہ مارچ جدوں جنوبی پنجاب پہنچیا تے اوہنے پیپلز پارٹی دے کارکناں وچ اک نویں روح پھونک دتی۔ ملتان’ مظفر گڑھ تے رحیم یار خان وچ لانگ مارچ دا پرتپاک استقبال کیتا گیا تے عوام دی کثیر تعداد نے اوہدے وچ رلت کیتی۔اسلام آباد ولوں لانگ مارچ صرف سیاسی جماعتاں تک ای محدود نہیں رہیا۔ معاشرے دے دوجے طبقے وی ہن اپنے مطالبے منوان لئی لانگ مارچ دا ای سہارا لیندے نیں۔ کساناں نے 24 جنوری 2022نوں اسلام آباد ول لانگ مارچ کیتا۔ مزدور’ استاد وی اپنے مطالبے لئی لانگ مارچ دا ہتھیار استعمال کردے نیں۔ انج کہو کہ 2022وچ لانگ مارچ دا سلسلہ عروج اتے رہیا۔
تحریک عدم اعتماد کامیاب ہون دے نتیجے وچ اقتدار توں نکلن مگروں پچھلے وزیراعظم عمران خان ولوں 25مئی 2022نوں اسلام آباد ول لانگ مارچ کیتا گیا جہدے وچ تحریک انصاف نے 10لکھ افراد نوں جمع کرن دے عزم دا اعلان کیتا تاہم ایہہ مارچ کامیابی حاصل کرن وچ نکام رہیا۔ عمران خان دی قیادت وچ مارچ اسلام آباد پہنچیا تے حکومت نوں آئندہ الیکشن دی تریخ دا اعلان کرن لئی چھ دن دا الٹی میٹم دیندے ہوئے ختم کردتا۔ عمران خان نے 23اکتوبر نوں اک واری فیر لانگ مارچ دا اعلان کیتا جہدا آغاز 28اکتوبر نوں لبرٹی چوک لہور توں ہویا۔
پچھلے وزیراعظم عمران خان نے اپنے سیاسی مقاصد حاصل کرن لئی اک واری فیر لانگ مارچ دا سہارا تے لے لیتا اے لیکن سوال ایہہ اے کہ کیہ اوہ اپنے مقاصد حاصل کرن وچ کامیاب ہو جان گے؟ ایس لانگ مارچ دی سبت وں دلچسپ گل اوہدا ست دناں اتے مشتمل لما دورانیہ اے۔ کیہ عمران خان ایس دوران اتحادی حکومت نوں ایس گل تے مجبور کر لین گے کہ اوہ قتل توں پہلاں انتخابات دا اعلان کر دیوے۔ سیاسی ماہرین تے عمران خان دے ایس لانگ مارچ نوں اگلے عام انتخابات دی تیاری قرار دے رہے نیں تے ایس لانگ مارچ نوں تحریک انصاف دے کارکناں نوں متحرک تے منظم کرن دا اک ذریعہ یا موقع تصور کر رہے نیں کیوں جے کوئی وی سیاسی مشق ہمیشہ جمہوریت نوں مضبوط کردی اے۔ ایس لانگ مارچ دے نتائج بھلے کجھ وی ہون’ جے ایہہ اپنی منزل اتے پرامن پہنچ جاندا اے تے ایس توں جمہوری رویاں نوں فروغ ملے گا۔
دنیا دے وڈے لانگ مارچ
ماوزے دا انقلابی مارچ:
پاکستان ای نہیں دنیا بھر وچ لانگ مارچ دی تریخ بہت پرانی اے۔ ایس حوالے نال چینی رہنما ماوزے تنگ دا لانگ مارچ اک نظیر دے طور تے پیش کیتا جاندا اے۔ اوہناں نے اپنے لانگ مارچ دا آغاز اکتوبر 1934 وچ کیتا۔ ایس لانگ مارچ 368 دناں وچ 6ہزار میل دا سفر طے کیتا۔ ماوزے دے کول بے یارومددگار غریب لوکاں دا ایسا اجتماع سی جہناں دے کول ٹینک تے اسلحہ نام دی کوئی چیز موجود نہیں سی جد کہ دشمن جنرل چیانگ کائی شیک دے کول ہتھیاراں سنے مغرب دی وی مکمل حمایت سی۔ ایہہ مارچ شروع ہویا تے اوہدے وچ سشرکا دی تعداد تقریباً دو لکھ سی۔ جدوں مختلف مرحلیاں نوں طے کردے ہوئے اپنی منزل اتے پہنچیا تے اوہدے وچ شرکا دی تعداد صرف 40ہزار رہ گئی سی۔ اک لکھ 60 ہزار لوک بھک پیاس دی نذر ہو گئے۔ اوس مارچ وچ دریائے تاتو نوں عبور کرنا اک اوکھا مرحلہ سی۔ جے ایہہ دریا پار نہ ہوندا تے شاید چین دا انقلاب شرمندہ تعبیر نہ ہوندا۔ اوس مارچ دے دوران مائو سنے بہت سارے لوکاں دے بیوی بچے تے رشتہ دار قتل کردتے گئے۔ اک مرحلے تے مائو نوں گرفتار وی کر لیتا گیا۔
جدوں مائو نوں اک ٹرک وچ پا کے لے جیا جا رہیا سی تے مائو نے چھال مار دتی۔ اوس دوران مائو اک تالاب دے کنڈے لمی گھاس وچ لک گیا۔کئی واری فوجی اوہناں دے بالکل کول پہنچ گئے۔ مائو اوتھوں کئی راتاںپہاڑاں وچ پیدل چلدا رہیا۔ اوہدے پیر لہولہان ہو گئے۔ مائو نے پورا سفر عام سپاہیاں دے نال پیدل تے خچراں اتے طے کیتا۔ صرف علالت دے دناں وچ اوہ گھوڑے اتے سوار سی۔ اعدادوشمار دے مطابق سرخ فوج نوں اوسطاً روزانہ اک جھڑپ نال واسطہ پیا۔ اوس لانگ مارچ وچ موجود شرکا نوں پندرہ دن جم کے لڑن نال واسطہ پیا۔ لانگ مارچ دے 368 دناںوچوں 235دن سفر کردے ہوئے لنگھے۔18دن تک رات دے سفر کیتے جد کہد وجے دناں نوں قیام دا عرصہ شمار کیتا جاندا اے۔ دنیا دے دشوار گزار رستیاں اتے اینی وڈی فوج تے اوہدے جانواراں دے نال ایہہ سفر اک غیر معمولی حیثیت رکھدا اے۔ مارچ دے شرکا نے 24 دریا عبور کیتے۔ 20وکھرے صوبیاں توں لنگھے۔ 62 وڈے شہراں اتے قبضہ کیتا۔ 10وکھرے جنگی سرداراں دی ناکہ بندی نوں توڑیا۔ اک لحاظ نال ایہہ لانگ مارچ انسانی تریخ وچ سب توں وڈا انقلابی مارچ سی۔مائو جن صوبیاں توں لنگھے اوہناں وچ کم و بیش 20کروڑ لوک وسدے سن۔ ماوزے نے اوس مارچ نال مزاحمت کیتی۔ اک نویں تریخ لکھ دتی جہنوں اج وی اک مثال دے طور تے یاد رکھیا جاندا اے۔ موزے تنگ نے 9ستمبر 1976 نوں وفات پائی۔
مہاتما گاندھی دا سالٹ مارچ:
12مارچ 1930 نوں ہندوستان دے لیڈر مہاتما گاندھی نے احمد آباد توں نمک ستیاگرہ یعنی نمک مارچ دا آغاز کیتا۔ اوس مارچ نوں ڈنڈی مارچ یا سالٹ ستیاگرہ وی کہیا جاندا اے۔ ایہہ مارچ 385 کلومیٹر لما سی۔
تے اوہدا مقصد نمک دی پیداوار اتے برطانوی حکومت دی قائم اجارہ داری نوں ختم کرنا سی۔ ہندوستان وچ ہون والے نمک مارچ دی وجہ سلطنت برطانیہ ولوں لوکاں اتے لایا جان والا نمک ٹیکس سی۔ مہاتما گاندھی ولوں ایہہ تجویز سامنے آئی کہ ہر ہندوستانی غیر قنونی نمک بنان یا خریدن لئی ٹیکس ادا کرن توں انکار کرے۔ ایس نمک مارچ نوں وائٹ فلوئنگ ریور وی کہیا جاندا اے کیوں جے مارچ وچ شریک ہر شخص نے چٹی کھدر پا رکھی سی۔ اگرچہ ایہہ مارچ ہندوستان دی تریخ دے لمے مارچ وچ شمار کیتا جادنا اے تاہم مہاتما گاندھی اوس مارچ دے دوران پرامن رہے۔ مہاتما گاندھی دا خیال سی کہ برطانوی سلطنت ولوں نافذ کیتے جان والے نمک ٹیکس نے ہندوستان دے ہر شخص چاہے اوہ ہندو’ مسلم یا سکھ ہووے نوں براہ رست متاثر کیتا سی۔
ایہہ مارچ 24دن لما سی جہڑا 12مارچ 1930 نوں شروع ہو کے 6اپریل 1930نوں اختتام پذیر ہویا۔ اوس سالٹ مارچ دے نتیجے وچ مہاتما گاندھی نے تقریباً اک سال قید گزاری جد کہ 80ہزار توں ودھ ہندوستانیاں نوں وی جیل ہوئی۔