میں حیران آں

ارشاد بھٹی

الیکشن کمیشن دا توشہ خانہ ریفرنس فیصلہ’ عمران خان نے گوشواریاں وچ اثاثیاں بارے حقائق چھپائے’ تحفے ویچ کے حاصل کیتی گئی رقم ڈکلیئر نہیں کیتی۔ پیش کردہ بینک رپورٹ تحفیاں دی قیمت نال مطابقت نہیں رکھدی جو تحفے خریدے فیر اوہ تحفے دوجیاں نوں تحفیاں دی صورت وچ دتے فارم ب وچ اوہناں دے حوالے نال کوئی وضاحت نہ دے کے جان بجھ کے حقائق چھپائے۔ الیکشن کمیشن وچ کیوں جے جھوٹا بیان حلفی’ غلط بیان جمع کرایا ایس لئی الیکشن کمیشن دی شق 173 دے تحت بدعنوانی دے مرتکب ہوئے۔ جو رقم اکائونٹ وچ آئی اوہ ایہناں تحفیاں دی ویلیو نال مطابقت نہیں رکھدی۔ عمران خان دا جواب مبہم’ ٹال مٹول والا’ عمران خان نوں آئین دے آرٹیکل 63 ون پی دے تحت نااہل کیتا جاندا اے۔ عمران خان نے الیکشن ایکٹ دی دفعات 173,167,137 دی خلاف ورزی کیتی۔ عمران خان دی نااہلی وقتی 2023ء دا الیکشن لڑ سکن گے اوہ تاحیات نااہلی توں بچ گئے۔ اوہناں دے کول اپیل لئی ہائیکورٹ’ سپریم کورٹ دو فورم موجود’ عین ممکن اوہناں نوں ہائیکورٹ یاں سپریم کورٹ توں ریلیف مل جاوے جیویں کہیا ایہ وقتی نااہلی’ مطلب موجودہ اسمبلی توں نااہلی’ ایہ نااہلی برقرار رہے اوہناں نوں عدالتی ریلیف نہ ملے تے وی عمران خان دی سیاست تے ایس نااہلی دا کوئی اثر نہیں پوے گا۔
سوکھے لفظاں وچ الیکشن کمیشن فیصلے نال عمران خان ڈی سیٹ ہوئے’ اوہ میانوالی توں رکن اسمبلی سن۔ ہن اوہ ایس سیٹ توں رکن اسمبلی نہیں رہے پر عمران خان ایہ سیٹ چھ مہینے پہلاں ای چھڈ چکے’ باقی رہ گئیاں اوہ چھ سیٹاں جو ہنے عمران خان نے جتیاں’ جے ایہ فیصلہ نہ وی آندا فیر وی عمران خان نے کہڑا قومی اسمبلی جانا سی۔ ایہناں سیٹاں تے دوبارہ الیکشن ہوندا یاں ایہ چھ سیٹاں لٹکیاں رہندیاں’ ایہ وکھری گل ایس ضمنی الیکشن وچ الیکشن کمیشن دا اک سیٹ تے ساڑھے ست کروڑ روپیے دا خرچہآیا’ مطلب جے صرف عمران خان دیاں ست سیٹاں دی گل کیتی جاوے تے ساڑھے 52 کروڑ روپیہ خرچہ تے حاصل وصول کیہ’ ایہ تہاڈے سامنے’ کیہ ایہ وقتی نااہلی رہوے گی’ فوجداری مقدمہ’ قید’ جرمانہ ہووے گا یاں سب کجھ اڑ جاوے گا۔ ایہ فیصلہ ہائیکورٹ’ سپریم کورٹ وچ ہووے گا انج تے تسیں عمران خان دی توشہ خانہ کہانی پڑھ ای چکے جے’ پر کیوں جے ساڈی یادداشت کمزور اے ایس لئی ایس کہانی دا خلاصہ حاضر خدمت’ مقدمہ ایہ کہ بحیثیت وزیراعظم عمران خان 14کروڑ 20 لکھ 42 ہزار دے تحفے 3کروڑ 81 لکھ 77 ہزار وچ گھر لے گئے۔ اوہ اٹھ لکھ روپیے مالیت دے تحفے بناں قیمت بھرے لے گئے۔
ایہ اک حقیقت کہ ایس سدھے سادے معاملے نوں پیچیدہ بنایا عمران خان نے’ ایس معاملے نوں کھچ کھچ کے توشہ خانہ ریفرنس تک اپڑایا عمران خان نے’ اوہناں نوں کئی موقعے ملے اوہ بڑی آسانی نال ایہ معاملہ سلجھا سکدے سن کیوں جے اوہناں نے تحفے ویچ دتے سن ڈکلیئر نہیں سن کیتے’ تحفے لین ویلے ادائیگی دا معاملہ وی گڑ بڑ سی’ ایس لئی اوہ چیزاں چھپاندے’ معاملے نوں طول دیندے گئے تے نوبت ریفرنس تک اپڑ گئی’ ایہ وی اک حقیقت کہ تحفیاں دے حوالے نال عمران خان نے آپ ایک اک اخلاقی معیار مقرر کر رکھیا سی جہدے مطابق حکمراناں نوں تحفے نہیں لینے چاہیدے اوہ کہندے سن’ تحفے تے ریاست دی ملکیت’ حکمران کیوں لے آن’ عمران خان اونے پونے مُل تے تحفے لین نوں بددیانتی وی کہندے’ کل جدوں نواز’ زرداری’ گیلانی توشہ خانہ قصے سامنے آئے’ جدوں ایہ سارے اپنے اپنے تحفیاں دی تلاشی توں نس رہے سن اودوں عمران خان نے ای کہیا کہ اک پاسے ساڈے حکمراناں دا ایہ طرزعمل جد کہ دوجے پاسے اسرائیل دا وزیراعظم نیتن یاہو’ چپ چاپ پولیس توں تفتیش کروا رہیا’ حالاں کہ اوہدا جرم وی ایہو کہ اوہنے بحیثیت وزیراعظم تحفے وصول کیتے۔ عمران خان ریاست مدینہ دے داعی وی’ اوہ گل گل تے ریاست مدینہ دیاں مثالاں دین’ ہن اوہناں ساریاں گلاں نوں سامنے رکھدے ہوئے میرا مسئلہ توشہ خانہ ریفرنس یاں توشہ خانہ فیصلہ نہیں’ میں تے ایہ منن لئی تیار آں کہ الیکشن کمیشن عمران خان دے خلاف’ ایہ وی منن نوں تیار کہ چیف الیکشن کمشنر عمران خان دے خلاف’ ایہ وی منن نوں تیار کہ توشہ خانہ فیصلہ کمزور’ ایہ وی منن نوں تیار کہ ہائیکورٹ یاں سپریم کورٹ جا کے ایہ فیصلہ اڑ جاوے گا۔ عمران خان دی نااہلی ختم ہو جاوے گی ایہ وی منن نوں تیار ایہ فیصلہ اجہی جلدبازی وچ سنایا گیا کہ اک بیمار رکن دے دستخطاں دے بناں ای سنا دتا گیا۔
عمران خان تے کہندے سن کہ ایتھے پرویزمشرف ہون یاں آصف زرداری’ نوازشریف ہون یاں یوسف رضا گیلانی ساریاں نے توشہ خانہ توں ہتھ صاف کیتے پر میں ایہ سب نہیں کراں گا’ فیر عمران خان نے ایہ سب کیوں کیتا’ اوہ تے اوہناں ورگے نہیں سن فیر اوہناں ورگے کیوں ہوئے۔ اوہ تے تبدیلی لیان آئے سن فیر آپ کیوں تبدیل ہو گئے۔ میں حیران آں اک پاسے عمران خان تے اوہناں دا اعلیٰ اخلاقی معیار تے دوجے پاسے گھڑیاں’ کف لنکس’ انگوٹھیاں’ پین’ پرفیوم’ آئی فون’ کپڑے’ وڈباکسز’ عطر دیاں بوتلاں’ ہیریاں دے لاکٹ’ بندے’ سونے دے کڑے’ برتن’ تسبیح’ ٹیبل میٹس تے پتہ نہیں کیہ کیہ’ حیران آں اک پاسے عمران خان کہہ رہے اللہ نے مینوں وزیراعظم بنن توں پہلاں ای عزت’ شہرت’ دولت نال نواز دتا مینوں بھلا کس شے دا لالچ جد کہ دوجے پاسے اجیہا لالچ کہ تحفے لیندے رہے’ تحفے ویچدے رہے۔ میں حیرا ن آں۔٭