نیب ترمیم نے ٹرائل اینہا مشکل بنا دتا کہ کرپشن ثابت نہیں ہو سکدی:سپریم کورٹ

اسلام آباد(پنجابی میڈیا گروپ)پاکستان تحریک انصاف دے چیئرمین عمران خان ولوں نیب ترمیم دے خلاف دائر درخواست اُتے سماعت دے دوران سپریم کورٹ دے جسٹس اعجاز الاحسن نے آکھیا اے کہ نیب ترمیم نے ٹرائل اینہاں مشکل بنا دتا اے کہ کرپشن ثابت نہیں ہو سکدی۔چیف جسٹس عمر عطا بندیال دی سربراہی وچ جسٹس اعجازالاحسن تے جسٹس منصور علی شاہ اُتے مشتمل سپریم کورٹ دے 3 رُکنی بنچ نے درخواست اُتے سماعت کیتی۔پی ٹی آئی دے وکیل خواجہ حارث نے نیب ترمیم دے بنیادی انسانی حقوق نال متصادم ہون اُتے دلائل دیندیاں ہویاں آکھیا کہ سارے نیب کیس احتساب عدالتاں نوں گھلے تے کئی افراد سارے الزاماں توں بری ہوئے،کرپٹ افراد دے بری ہون نال عوام دے بنیادی حقوق براہ راست متاثر ہوئے نیں۔ایس اُتے چیف جسٹس جسٹس عمر عطا بندیال نے عمران خان دے وکیل نال مکالمہ کیتا کہ لگدا اے کہ تہانوں ہر ویک اینڈ توں بعد کیس وچ اک نوا نکتہ کَڈ لیندے نیں۔دوران سماعت جسٹس منصور علی شاہ نے ریمارکس دیندیاں آکھیا کہ نیب ترمیم نال براہِ راست بنیادی انسانی حقوق دی خلاف ورزی کِنج ہو رہی اے؟ کیا بجٹ پیش ہون اُتے ہر دُوجا شخص عدالت آ سکدا اے کہ ایہ غلط بنایا گیا؟ ایف بی آر کسی نوں ٹیکس چھوٹ دیوے تے کیا ایہ بنیادی انسانی حقوق دی خلاف ورزی وچ آئے گا؟