آرمی چیف دی تعیناتی چیف جسٹس طرز تے ہونی چاہیدی اے، عمران خان

لہور( پنجابی میڈیا گروپ)پاکستان تحریک انصاف دے چیئرمین تے سابق وزیراعظم عمران خان نے آکھیا اے کہ آرمی چیف نال میری لہور وچ کوئی ملاقات نہیں ہوئی۔ صدر عارف علوی دی آرمی چیف نال ملاقات ہوئی اے، ملاقات دا واحد ایجنڈا چھیتی تے شفاف الیکشن سی ۔ عام الیکشن توں بعد سیاسی جماعتاں نال اتحاد ممکن اے، مسلح افواج دے سربراہ دی تعیناتی چیف جسٹس سپریم کورٹ ونگوں ہونی چاہیدی اے، اوہناں دے مقدمے درج کران وچ سب توں وڈی رکاوٹ سنئیر پلس افسر بشمول سابق آئی جی پنجاب پلس سن۔سینئر صحافیاں نال غیر رسمی گل بات دے دوران سابق وزیراعظم نے آکھیا کہ موجودہ حکومت آرمی ایکٹ وچ ترمیم اپنے فائدے لئی کررہی اے، آرمی ایکٹ وچ ترمیم کرکے مسلح افواج نوں پنجاب پُلس دے برابر لیانا چاہندے نیں ،آرمی ایکٹ وچ ہون والی مجوزہ ترمیم اعلی عدلیہ وچ چیلنج ہو جائے گی، نوازشریف اوہ آرمی چیف لانا چاہندا اے جیہڑے مینوں نااہل کرے تے نوازشریف دے کیس ختم کرن ، فیر ایس وچ اقتداروچ لیان ۔ پی ٹی آئی چیئرمین دا کہنا سی کہ مسلح افواج دے سربراہ دی تعیناتی چیف جسٹس سپریم کورٹ ونگوں ہونی چاہیدی اے، صدر عارف علوی دی آرمی چیف نال ملاقات ہوئی اے، اوہناں دے بیک ڈور رابطیاں دے سلسلے وچ آرمی چیف سنے کسی نال لہور وچ ملاقات نہیں ہوئی، صدر علوی دے نال ملاقات ضرور ہوئی اے مگر ایس ملاقات دا واحد ایجنڈا چھیتی شفاف الیکشن سی ۔ اپنی گل بات جاری رکھدیاں ہویاں اوہناں نے آکھیا کہ میرے معالجین کل میرا معائنہ کر کے اپنی رائے توں آگاہ کرن گے، پنڈی توں لانگ مارچ دی قیادت آپ کراں گا، ارشد شریف دے معاملے اُتے اوہناں دا کیہ گیا ظلم سب دے سامنے اے، توشہ خانہ کیس وچ اوہناں نے میرے آپ عدالت وچ جان دا موقع دتا اے۔عمران خان دا کہنا سی کہ وزیرآباد مرکزی ملزم نوں14 دن بعد عدالت پیش کیتا گیا، خدشہ اے اینہاں 14 دناں وچ شواہد ضائع نا ہوجان ، ق لیگ ساڈے اتحادی نیں، پرویز الٰہی دے نال بہترین اتحاد چل رہیا اے، میں تاں الیکشن وچ الیکٹرانک ووٹنگ مشین (ای وی ایم)مشین نال دھاندلی رکوان دی بھر پور کوشش کیتی ، ای وی ایم دے معاملے اُتے نواز زرداری الیکشن کمیشن تے ہینڈلز اک پیج اُتے سن، مکمل اختیار ملن گے تے وزیراعظم بناں گا، ایہ نہیں ہوسکدا کہ اختیار کسی دے کول ہون تے ذمہ داری کسی ہور دے کول ہوئے، کسی نال کوئی مذاکرات نہیں ہورہے۔