سیاست وچ فوجی مداخلت غیر آئینی:غیر ملکی سازش اُتے خموشی گناہِ کبیرہ اے:آرمی چیف

پنڈی( پنجابی میڈیا)آرمی چیف جنرل قمر جاوید باجوہ نے آکھیا اے کہ2018الیکشن وچ کئی پارٹیاں آرٹی ایس دے بیٹھن نوں بہانہ بنا کے جتی ہوئی پارٹی نوں سلیکٹڈ دا لقب دتا،2022 وچ اعتماد دا ووٹ کھون توں بعد اک پارٹی نے دُوجی پارٹی نوں امپورٹڈ دالقب دتا۔شہیداں دے لواحقین نو کَدی وی تنہا نہیں چھڈاں گے۔ جعلی تے جھوٹا بیانیہ بنا کے ہیجان دی کیفیت پیدا کیتی گئی۔ اجے تک ایسی جھوٹے بیانیے نال راہ فراراختیار کیتی جارہی اے، غیرملکی سازش ہوئے تے فوج خموش رہے ایہ گناہ کبیرہ اے، فوج نے فیصلہ کیتا اے کہ سیاسی معاملیاں وچ مداخلت نہیں کرن گے۔ پاک فوج دی سیاست وچ مداخلت غیر آئینی اے۔پنڈی دے جنرل ہیڈ کوارٹرز(جی ایچ کیو)وچ ہون والی یوم دفاع وشہدا دی پروقار تقریب ہوئی، تقریب وچ حاضر سروس تے ریٹائرڈ فوجی افسراں، شہیداں دے لواحقین تے غازیاں رَلت کیتی۔ایہ تقریب ہر سال6ستمبر نوںجنرل ہیڈ کوارٹرز(جی ایچ کیو) پنڈی وچ1965 دی جنگ دے شہیداں دیاں قربانیاں دی یاد وچ منعقد کیتی جاندی اے، لیکن ایس وَرھے پورے ملک دے سیلاب متاثرین نال اظہار یکجہتی لئی ایس نوں ملتوی کردتا گیا سی ۔ تقریب دا آغاز تلاوت قرآن پاک توں ہویا، اوس دے بعد حالیہ تباہ کن سیلاب تے اوس نال وڈے پیمانے اُتے تباہی دے حوالے نال اک ویڈیو وی چلائی گئی، جس وچ سیلاب متاثرین دے نال اظہار یکجہتی کیتا گیا، ایس ویڈیو وچ پاک فوج دے ریسکیو، ریلیف تے بحالی دیاں کوششاں نوں وی وکھایا گیا ۔اک دُوجی فوٹیج چلائی گئی، جس وچ پاک فوج ولوں ملک بھر وچ جاری تعلیم تے صحت ورگے اہم شعبیاں وچ کردار اُتے وی روشنی پائی گئی۔تقریب توں پہلاں سپہ سالار نے یادگار شہدا اُتے حاضری دتی تے ایس دوران یادگار شہدا اُتے پھُل وی چڑھائے۔ شہیداں دی تقریب نال خطاب کردیاں ہویاں آرمی چیف نے آکھیا کہ اج یوم شہدا پاکستان بطورآرمی چیف آخری وارخطاب کر رہیا ہاں ، سیلاب پاروں یوم شہدا دیر نال منعقد کیتا گیا، شہیداں دے لواحقین ساڈا فخر اے، شہیداں دے لواحقین نوںکَدی تنہا نہیں چھڈاں گے۔ 6سالہ مدت وچ شہیداں دے لواحقین نوںہمیشہ اُچا پایا،شہیداں دیاں قربانیاں دا صلہ نہیں دے سکدے لیکن اپنے پیاریاں دیاں قربانیاں نوںرائیگاں نہیں ہون دیاں گے۔ اوہناں نے آکھیا کہ مینوں فخر اے عظیم فوج دا سپہ سالار رہیا ہاں، فوج دا بنیادی کم ملک دی جغرافیائی سرحداںدی حفاظت اے، اج ساڈے شہراں تے دیہاتاں وچ امن اے، اوس پیچھے شہیداں دیاں قربانیاں نیں، فوج نے بے مثال قربانیاں دتیاں ۔ شہداء ساڈے پیرو تے قوم نوں اوہناںاُتے فخراے۔آرمی چیف نے آکھیا کہ کجھ گلاں اج دے سیاسی حالات بارے کرنا چاہواں گا ، پچھلے سال فروری وچ فیصلہ کیتا سی پاک فوج آئندہ کسی سیاسی معاملیاں وچ مداخلت نہیں کرے گی ۔ایس فیصلے دا خیرمقدم کرن دی بجائے فوج اُتے تنقید کیتی گئی، اک جعلی تے جھوٹا بیانیا بنا کے ہیجان دی کیفیت پیدا کیتی گئی۔ غیرملکی سازش ہوئے تے فوج خموش رہے ایہ گناہ کبیرہ اے، دنیا وچ سب توں وَدھ بھارتی فوج انسانی حقوق دی پامالی کردی اے، مگربھارت دی عوام کم وبیش ہی اوہناں اُتے تنقید کر دی اے، اوس دے برعکس ساڈی فوج دن رات قوم دی خدمت کر دی اے، گاہے، بگائے تنقید دا نشانہ بن دی اے، میرے نزدیک ایس دی وڈی وجہ نال70 سال توں فوج دیاں مختلف صورتاں وچ سیاست اندر مداخلت اے، سیاست اندر مداخلت جیہڑی کہ غیرآئینی اے، ایس لئی پچھلے سال فروری وچ فوج نے بڑی سوچ وبچارتوں بعد فیصلہ کیتا آئندہ کسی سیاسی معاملے وچ مداخلت نہیں کرن گے۔ یقین دلاندا ہاں ایس فیصلے اُتے سختی نال کار بند تے آئندہ وی رہن گے۔جنرل قمر جاورید باجوہ نے آکھیاکہ کیا تُسی سمجھدے ہو کہ ملک وچ بیرونی سازش ہوئے تے فوج ہتھ اُتے ہتھ رَکھ کے بیٹھی رہے، اپنے تے فوج دے خلاف جارحانہ رویے نوں درگزر کر کے اگے ودھنا چاہندا ہاں ، مینوں اُمید اے کہ سیاسی پارٹیاں وی اپنے رویاں اُتے نظرثانی کرن گیاں ، ساہنوں غلطیاں توں سبق سِیکھ کے اگے وَدھنا چاہیدا اے، اج پاکستان سنگین معاشی بحران دا شکار اے کوئی اک پارٹی ایس مسائل توں نہیں کڈ سکدی، ویلا آگیا اے سٹیک ہولڈرز ماضی دیاں غلطیاں توں سیکھ کے اگے ودھن، پاکستان وچ اک سچا جمہوری کلچراپنانا ہوئے گا۔سپہ سالار دا کہنا سی کہ ہار جت سیاست دا حصہ اے، ہر پارٹی نوں اپنی شکست تے فتح نوں قبول کرنا ہوئے گا، ساڈے لئی پاکستان نعمت خداوندی اے، شہیداں دے لواحقین دا تقریب وچ آون اُتے شکر گزار ہاں، اج تجدید عہد دا دن اے، اسیں سارے مل کے پاکستان دی بہتری لئی کم کراں گے، مادروطن لئی کسی قربانی توں وی دریغ نہیں کراں گے۔اپنی گل نوں جاری رکھدیاں ہویاں سپہ سالار نے ہور آکھیا کہ 2018الیکشن وچ بعض پارٹیاں نے آرٹی ایس دے بیٹھن نوں بہانہ بنا کے جتی ہوئی پارٹی نوں سلیکٹڈ دا لقب دتا، 2022 وچ اعتماد دا ووٹ کھون توں بعد اک پارٹی نے دُوجی پارٹی نوںامپورٹڈ دا لقب دتا، ساہنوں ایس رویے نوں رَد کرنا ہوئے گا، ہارجت سیاست دا حصہ اے، ہرپارٹی نوںاپنی فتح تے شکست نوںقبول کرن داحوصلہ پیدا کرنا ہوئے گا تاکہ اگلے الیکشن وچ امپورٹڈ یا سلیکٹڈ حکومت دی بجائے الیکٹڈ حکومت آئے۔اوہناں نے آکھیا کہ پاک فوج ہمیشہ اپنی استطاعت توں وَدھ کے اپنی قوم دی خدمت کر دی رہندی اے، ریکوڈک دا معاملہ ہوئے یا کاردے کا جرمانہ، فنانشل ایکشن ٹاسک فورس(فیٹف)دے نقصان ہون یا ملک نوںوائٹ لسٹ توں ملانا یا فاٹادا انضمام کرنا، بارڈر اُتے باڑ لانا ہوئے یا قطر توں سستی گیس مہیا کرانا یا دوست ملکاں توں قرض دااجرا کرانا ہوئے، کووڈ دا مقابلہ یا ٹڈی دل دا خاتمہ، سیلاب دے دوران امدادی کارروائی ہوئے ، فوج نے ہمیشہ اپنے مینڈیٹ توں وَدھ کے قوم دی خدمت کیتی اے تے انشاء اللہ کردی رہے گی۔آرمی چیف نے آکھیا کہ میں اج اک ایسے موضوع اُتے وی گل کرنا چاہندا ہاں جس اُتے عموما لوگ گل کرن توں گریز کردے نیں تے ایہ گل 1971 وچ ساڈی فوج دی سابقہ مشرقی پاکستان وچ کارکردگی بارے اے۔میں ایتھے کجھ حقائق درست کرنا چاہندا ہاں۔سب توں پہلاں سابقہ مشرقی پاکستان اک فوجی نہیں بلکہ اک سیاسی نکامی سی۔ لڑن والے فوجیاں دی تعداد92ہزار نہیں صرف34 ہزار سی، باقی لوگ مختلف گورنمنٹ ڈپارٹمنٹاں دے سن تے اوہناں34ہزار لوکاں دا مقابلہ ڈھائی لکھ انڈین آرمی،2لکھ تربیت یافتہ مکتی باہنی نال سی لیکن ایس دے باوجود ساڈی فوج بوہت بہادری نال لڑی تے بے مثال قربانیاں پیش کیتیاں جس دا اعتراف خود سابق بھارتی آرمی چیف فیلڈ مارشل مانیکشا نے وی کیتا۔اینہاں بہادر غازیاں تے شہیداں دیاں قربانیاں دا اج تک قوم نے اعتراف نہیں کیتا جیہڑی کہ اک بوہت وڈی زیادتی اے۔