ورلڈ بینک نے پاکستان لئی قرضیاں دی منظوری مؤخرکردتی

اسلام آباد/کراچی(پنجابی میڈیا گروپ)ورلڈ بینک نے پاکستان لئی1ارب10کروڑ ڈالر دے قرضیاں دی منظوری مؤخرکردتی اے۔ورلڈ بینک نے پاکستان لئی قرض دی منظوری آئندہ مالی سال تک مؤخر کیتی اے۔ ورلڈ بینک نے درآمدات اُتے’’فلڈ‘‘لیوی لان دی وی مخالفت کیتی اے۔خیال رہے کہ پائیدار معیشت لئی ورلڈ بینک دے قرضے دی مالیت45کروڑ ڈالر سی، ایس دے علاوہ سستی توانائی لئی60کروڑ ڈالردا قرضہ وی مؤخر کیتا گیا اے۔ ورلڈبینک دے ترجمان دا کہنا اے کہ پائیدار معیشت لئی بورڈ ڈسکشن مالی سال2024 وچ متوقع اے جدکہ سستی توانائی لئی قرضے وی اگلے مالی سال منظور کیتا جاسکدا اے۔ دُوجے پاسے وفاقی ایوان ہائے صنعت و تجارت وچ خطاب کردیاں ہویاں گورنر اسٹیٹ بینک جمیل احمد نے آکھیا اے کہ امپورٹ دا پریشر بوہت وَدھ اے ، جس لئی ڈالر ناکافی نیں۔گورنر اسٹیٹ بینک نے آکھیا کہ ایہ مسائل کجھ دناں وچ پیدا نہیں ہوئے، ساہنون ویکھنا اے کہ کس طرح معیشت نوں بہتر کیتا جا سکدا اے۔اوہناں نے آکھیا کہ اسیں2022 وچ کجھ سرکلرز کیتے، جس دا مقصد کرنٹ اکائونٹ خسارے نوں کنٹرول کرنا سی ۔اسٹیٹ بینک دی اجازت درآمدات اُتے رکھی گئی، جس نال درآمدات گھٹ ہوئی ،انفلوز گھٹ تے آٹ فلوز وَدھن نال خسارا ودھیا ۔گورنر اسٹیٹ بینک نے آکھیاکہ اسیں33ہزار کیس کلیئر نیں، ایہ کم اسیں اضافی کیتا ، جیہڑ اکہ ساڈا نہیں ہُندا سی ۔ ہر مہینے6500 امپورٹ دے کیس کلیئر کررہے ہاں۔دسمبر وچ اوہناں دی کلیئرنس کیسز11ہزار توں تجاوز کرگئے۔ امپورٹ دا پریشر ایہنا اے کہ جس لئی ڈالر ناکافی نیں ۔ ایف پی سی سی آئی وچ تقریب نال خطاب کردیاں ہویاں گورنر اسٹیٹ بینک نے ہور آکھیاکہ اسیں کمرشل بینکاں نوں ہدایت جاری کیتی اے کہ اوہ ویکھ کے ایل سیز کھولن۔ کھان پین دیاں شیواں،دوایاں،تیل و گیس تے زراعت نوں ترجیحی بنیاد اُتے رکھیا گیا اے ایس دے علاوہ ٹیکسٹائل تے ہور ایکسپورٹ سیکٹر دے کیسز وی حل کیتے گئے نیں ۔