الائیڈ سکول سوئی گیس روڈ دا سپورٹس گالا

عتیق انور راجہ
کجھ دن پہلاں میں الائیڈ سکول سوئی گیس روڈ دے ڈائریکٹر چوہدری طاہر جاوید نمبردار دے نال کدھرے سفر وچ سی تے اوہناں نے کہیا راجہ صاحب! تسیں 26جنوری بدھ والے دیہاڑ اپنی کوئی مصروفیت نہیں رکھنی۔ اوس دن تسیں سارا ویلا ساڈے نال سٹیڈیم وچ گزارنا اے۔ مینوں بچپن توں کھیڈاں نال دلچسپی رہی اے تے سکول دور وچ اسیں ٹیپ بال ہارڈ بال کرکٹ ہاکیفٹبال والی بال چڑی چھکاتیراکی رسہ کشی بنٹے تاش ایتھوں تک کہ باندر کلہ سارے کھیڈ کھیڈے ہوئے نیں۔ ایہناں کھیڈاں نال جڑیاں چنگیایاداں اج وی دل تے دماغ وچ اک عجیب جئی خوشی پیدا کردیندیاں نیں۔ جہڑے دن سپورٹس گالا منعقد ہونا سی اوس دن دی سویر بڑی سرد تے دھند وچ لپٹی ہوئی سی۔ لیکن یاراں دے نال کدھرے جانا ہووے تے نہ ٹھنڈ متاثر کردی اے تے نہ دھند رستہ روکدی اے۔ اسیں گھروں گنگناندے ہسدے تے ٹھر ٹھراندے سٹیڈیم ول چل پئے۔ ہتھاںوچ پھلچہرے اتے دل فریب ہاسے سجائے ساڈے میزبان چوہدری محمد شاہد تے چوہدری محمد طاہر کیمرہ مین لطیف بٹ دے نال سانوں جی آیاں نوں آکھن لئی کھڑے نظر آئے۔ بچے اپنے استاداں دی نگران وچ وارم اپ ہو رہے سن۔ معصوم بال اک پاسے سردی نال کپکپا رہے سن تے دوجے پاسے اوہناں دے چہریاں اتے شرارتاں دس رہیاں سن کہ اج اوہ بڑے خوش نیں۔ سپرنٹنڈنٹ جیل محمد اقبال اختر ڈپٹی ڈائریکٹر زاہد فاروق وی مقررہ وقت تے تشریف لے آئے تے سکول انتظامیہ نے مشعل جلا کے سپورٹس گالا دا باقاعدہ افتتاح کیتا۔
بالاں کولوں حلف لیتا گیا کہ اوہ کھیڈن ویلے قنون دی پاسداری کرن گے۔ چوہدری محمد شاہد تے چوہدری محمد طاہر نے کھیڈاں دی اہمیت تے افادیت تے ایس سپورٹس گالا اتے سیر حاصل گل بات کیتی۔ محمد اقبال اختر سویرے سویرے بالاں نوں کھیڈدا ویکھ کے خود نوں تازہ دم محسوس کر رہے سن ۔ اوہناں دا کہنا سی کہ ایہہ بڑی چنگی کوشش اے۔ بالاں لئی انج دے مقابلے منعقد کروانا بڑا ضروری اے۔ڈپٹی ڈائریکٹر زاہد فاروق نے کہیا کہ اوہ چاہندے نیں کہ کالجاں وچ طلبا و طالبات نوں ایس طرحاں کھیڈاں نال جوڑیا جاوے کہ آن والے ویلیاں وچ ساڈے نوجوان عالمی سطح اتے ملک دا نام روشن کرن۔ کجھ ای دیر مگروں دھند ہٹ گئی تے سورج نکل آیا۔ جہدے توں ماحول ہور سوہنا ہو گیا ۔ گرائونڈ وچ ہر پاسے بچے اچھلدے نسدے تے چھالاں ماردے نظر آ رہے سن۔ مینوں یقین اے کہ بچے ایس دن دی خوشگوار یاداں نوں تادیر یاد کرن گے۔
کھیڈ انسانی زندگی وچ بہت اہم کردار ادا کردے نیں۔ کھیڈ وچ جتھے جتن والے خوشیاں ماندے نیں اوتھے ہارن والے اگلے مقابلے وچ کامیابی لئی بہتر کوشش کرن دا منصوبہ تیار کردے نیں۔ جہڑے بچے شروع عمر وچ کھیڈ دے میدان جانا شروع کر دیندے نیں اوہناں دا سوچن سمجھن تے کم کرن دا انداز دوجے بالاں توں جہڑے صرف گھروں سکول ای جاندے نیں بڑا مختلف ہو جاندا اے۔ زمانہ قدیم توں دنیا دے ہر خطے وچ رہن والے لوک اپنے اپنے انداز یا اپنی اپنی سمجھ دے مطابق وکھرے کھیڈ کھیڈدے چلے آ رہے نیں۔ جیویں کہیا جاندا اے کہ جنگل وچ کوئی قنون نہیں ہوندا۔ انج ای پہلے وقتاں وچ کھیڈ وی بغیر کسے قاعدے قنون دے کھیڈن دا رواج رہیا ہووے گا۔ لیکن جیویں جیویں انسان نے شعوری ترقی دا سفر طے کیتا تے ایہہ وی ضروری سمجھیا گیا کہ کھیڈاں لئی وی قاعدے قنون طے کر لیتے جان۔ اج دی دنیا ترقی تے سائنسی ایجادات دی انتہا اتے منی جا رہی اے تے جے اسیں تھوڑا جیا غور کرئیے تے سانوں بخوبی اندازہ ہو جاوے کہ جہناں ملکاں دی معیشت چنگی اے اوہناں دے کھیڈاری عالمی میداناں وچ اپنی برتری ثابت کیتے ہوئے نیں۔گل جے اولمپکس دی کیتی جاوے تے ہرواری امریکہ روس چین تے فیر پنج ست مغربی ملک اینے ایوارڈ جت لیندے نیں جنے باقی دو سو دے کول ملک رل کے وی نہیںجت سکدے۔
ہن ایہدے وچ سمجھن والا نقطہ ایہہ اے کہ جہناں ملکاں دی معیشت چنگی اے اوتھے دے نوجوان کیوں ہر واری میدان مار لیندے نیں ۔ جہناں ملکاں دے نوجوان کھیڈاں وچ عمدہ کارکردگی دا مظاہرہ کردے نیں اوہناں دی معیشت کیوں مضبوط اے تے اقوام عالم وچ اوہناں نوں اک خاص مقام حاصل اے۔ میراخیال اے کھیڈ نال جو سپورٹس وچ سپرٹ آندی اے اوہ انسان دی ساری حیاتی اوہدت دے نال چلدی اے۔
اک چنگا کھیڈاری کدی وی غلط طریقے نال کامیابی دی کوشش نہیںکردا ۔ اک چنگا کھیڈاری ساتھیاں دے نال ٹیم بنا کے چلن نوںکامیابی ممکن بناندا اے اوسے طرحاں اک چنگا رہنما کدی ذاتی پسند ناپسند اتے فیصلے نہیں کردا بلکہ اوہ ساریاں دی مشاورت نال اک ٹیم بنا کے ملکی عوام دی فلاح لئی نیک نیتی نال کوشش کردا اے۔ بدقسمتی نال پاکستان وچ نہ کھیڈاں دی صورتحال چنگی اے تے نہ سیاست داناں دی۔ سیاست دان کرپٹ نیں تے کھیڈاریاں اتے میچ فکسنگ دے الزامات وچ وی پاکستانی دنیا وچ مشہور نیں۔
ایہہ اک سکول دے سپورٹس گالا لئی تحریر اے ایتھے ملکی سیاست اتے لکھن دا بالکل موڈ نہیں سی لیکن کیہ کریے جدوں ملک دے سیاست داناں دے رویے ویکھدا واں جدوں ملک وچ کھیڈاں دے میداناں دی حالت زار ویکھنا واں جدوں ارباب اختیار دی کھیڈ دشمن پالیسیاں نظراں دے سامنے توں لنگھدی اے۔
جدوں مقامی کھیڈ تے میلیاں دی سرپرستی نہیں کیتی جاندی تے دل دکھدا اے دل دکھدا اے تے میرا قلم میری گل منن توں انکاری ہو جاندا اے کہ میرے ملک وچ اجے تک اک وی ایسا حکمران نہیں آیا جہڑا نوجواناں دی صحت تے بہتر ذہنی تے جسمانی نشوونما لئی کھیڈاں دی اہمیت نوں سمجھدا ہووے تے ملک دے ہر پنڈ قصبے شہر تک مختلف کھیڈاں دے میدان بناوے۔ کھیڈن والے لئی مناسب وظیفے مقرر کرے۔ جے انج ہو جاوے تے اگلے کجھ سالاں وچ اسیں نسبتا بہتر قوم دا مقام حاصل کر سکدے آں۔