سیاسی منظر نامہ
پیپلز پارٹی‘ قوم پرست‘ بلوچ علما تے پی ٹی آئی سارے موجود نیں
فیصل ادریس بٹ
پنجاب تے خیبر پی کے صوبائی اسمبلیاں دی تحلیل مگروں ہن جہڑی سیاسی صورتحال وچ ابتری ویکھن وچ آ رہی اے اوہدے وچ کراچی دے بلدیاتی الیکشن مگروں دی صورتحال نے ہور تلخی پیدا کردتی اے۔ لامحالہ خیبر پی دے اسمبلی دے کول ایس ایہدا کوئی جواز نہیں سی کہ اوہ برقرار رہندی کیوں جے عمران خان نے کہہ دتا سی کہ ’’پنجاب اسمبلی تحلیل ہون مگروں خیبر پی کے اسمبلی وج تحصیل ہو جاوے گی۔ ہن جد کہ پنجاب دا قائم مقام وزیراعلیٰ نامزد ہون مگروں محسن رضا نقوی نے حلف چک لیتا اے۔ پی ٹی آئی دے کارکن ایس تقرری دے خلاف احتجاجی مظاہرہ کر رہے نیں۔ انج پرویزالٰہی نہایت مہارت نال پی ٹی آئی دے موہنڈھے اتے بندوق رکھ کے چلا رہے نیں جہنوں عمران خان بڑی خموشی نال ویکھ رہے نیں۔ غلغلہ ایہو اے کہ (ق) لیگ چھیتی ای پی ٹی آئی وچ ضم ہو جاوے گی۔ بلوچستان ایس ساری صورتحال دا اثر لیتے بغیر پرو نہیں سکدا کیوں جے اوتھے ’’باپ‘‘ دی حکومت وی اتحادیاں دی حمایت اتے چل رہی اے تے خود بلوچستان عوامی پارٹی ’’باپ‘‘ وچ مختلف الخیال سیاسی جماعتاں دے رہنما شامل نیں اوہ کدی وی کوئی نواں لائحہ عمل تیار کر سکدے نیں۔ جیویں پیپلز پارٹی بلوچستان وچ اپنی ساکھ مضبوط بنان دی کوشش کر رہی اے ایہہ اوسے اتھل پتھل دا نتیجہ اے۔
پشتون علاقیاں وچ ایس ویلے اوہنوں خاص اہمیت حاصل نہیں۔ ایہناں علاقیاں وچ جے یو آئی مولانا فضل الرحمن تے پشتونخواہ میپ محمود اچکزئی نوں مرکزی حیثیت حاصل اے۔ تاہم اے این پی وی موجود اے۔ ایہہ تنوں وی ایس ویلے مرکز وچ قائم ن لیگ دی حکومت دے نال نیں۔ ایہناں ساریاں دی مدد نال ای بلوچستان وچ ایس ویلے ’’باپ‘‘ دی حکومت دا طوطی بول رہیا اے جہدے وچ شامل اہم بلوچ رہنما اجے تک اپنی پارٹی تے حکومت نال کھڑے نیں۔
جے مرکز وچ پی ٹی آئی کوئی اوکھی گھڑی نہ کر دیوے تے فی الحال بلوچستان وچ ’’باپ‘‘ دی حکومت نوں کوئی خطرہ نہیں اے۔ ہاں مگر الیکشن ہون تے حکمران جماعت وچ شامل سیاستدان کدھرے موقع دی مناسبت نال راہ بدل سکدے نیں۔ پی پی پی مگروں ن لیگ تے پی ٹی آئی وی بھرواں کوشش کرن گئیاں تے اندرون خانہ کر وی رہیاں نیں کہ بلوچستان وچ اوہناں نوں ایسے موثر سیاستداناں دی حمایت حاصل ہووے جہڑے الیکشن وچ ووٹ لے کے کامیاب وی ہون۔
قوم پرست بلوچ جماعتاں اپنے اپنے علاقیاں وچ بہت موثر نیں جتھے اوہناں دا زور توڑن لئی پی ٹی آئی نوں منظم کیتا جا رہیا اے۔ پیپلز پارٹی اگے ودھ رہی اے۔ جے یو آئی وی ایہناں علاقیاں وچ پیش قدمی جاری رکھے ہوئے اے۔ مذہبی قیادت بلوچ علما وی موجود نیں۔ ایس سارے سیاسی منظر نامے وچ جے کوئی جماعت اپنی موجودگی ظاہر نہیں کر رہی تے اوہ ن لیگ اے۔ سوال ایہہ اے کہ اوہناں نے ملک دے ایس اہم ترین صوبے نوں سیاسی طور تے کیوں خالی چھڈیا اے؟
دوجے پاسے پنجاب وچ نویں تعیانت ہون والے چیف سیکرٹری انتہائی معاملہ فہم افسراں وچ شمار ہوندے نیں۔ اوہناں دی تعیناتی نال ایس گل نوں تقویت ملدی اے کہ پنجاب وچ انتخابات مقررہ مدت وچ ہوندے نظر نہیں آندے ۔ ویسے سمجھ توں بالاتر اے کہ بیورو کریسی دے گلدستے وچ انتہائی اعلیٰ کردار دے حامل زیرک منجھے ہوئے غیر متنازعہ افسر عبداللہ سنبل نوں قلیل مدت وچ تبدیل کیوں کر دتا گیا۔ گڈ گورننس دے حوالے نال مقبول عام میاں شہباز شریف بذات خود عبداللہ سنبل جئے افسر نوں چنگے طریقے نال جاندے نیں۔ فیراک ویلے تے اوہ آزمائش توں وی لنگھ چکے نیں کہ پچھلے وزیراعظم عمران خان دی بادشاہت دے دور وچ ہائی پاور بورڈ دے اجلاس وچ عبداللہ خان سنبل دا نام گریڈ 22لئی ساری چھانٹیاں توں چھنن مگروں بھجوایا گیا۔ عمران خان نے گریڈ 22حاصل کرن دے خواہشمند افسراں نوں ون ٹو ون ملن دا فیصلہ کیتا تے موصوف صرف تے صرف ’’عمرانی عتاب‘‘ دا شکار ایس لئی بنے کہ سنبل دے بیٹھدے ای خان صاحب نے فرمایا کہ ’’جدوں تسیں شہباز شریف دے نال کمشنر لہور سو تے اوہ تہانوں غیر قنونی کم کہندے سن؟‘‘ عبداللہ سنبل نے فوراً جواب دتا: ’’جی نہیں‘‘ …’’عمرانی غصہ‘‘ پروان چڑھیا تے دوبارہ اوہناں نے ایہو جملہ دہرایا۔ جواب وچ عبداللہ سنبل نے وی جواب دتا تے کہیا ’’جی بالکل کدی نہیں‘‘ جہدے اتے کجھ دیر خموشی چھائی رہی مگروں ایہہ جملہ غضب وار لہجے وچ دہرایاگیا ’’سوچ لوو کہ تہانوں کدی غیر قنونی احکاامت نہیں ملے؟‘‘ تے فیر اوہ ’’نوسر‘ تھینک یو سر کہہ کے‘‘ اپنا گریڈ 22 قربان کر کے اوتھوں چلے آئے۔ ایہہ ملاقات دا احوال مینوں اوس میٹنگ دے اک عینی شاہد نے سنایا۔ اوس واقع دی تصدیق یا تردید عبداللہ سنبل کر سکدے نیں۔ دوجے پاسے پچھلے آئی جی پنجاب عامر ذوالفقار دے نال وی شفقت والا رویہ کرن دے بجائے اوہناں نوں قربانی دا بکرا بنایا گیا حالانکہ اوہ عوامی خدمت دے جذبے نال سرسار ایماندار افسراں وچ شمار ہوندے نیں۔ مخالفین ہمیشہ وانگوں باصلاحیت تے چنگے افسراں دے خلاف پراپیگنڈہ جاری رکھے رہندے نیں مگر فیر وی ساڈے کول ایسے سول سرونٹس دی کمی نہیں۔ ٹیکسٹ بک بورڈ پنجاب دے حوالے نال پراپیگنڈہ عروج تے اے حالانکہ ٹیکسٹ بک بورڈ توں پنجاب دے طالبعلماں دا مستقبل جڑیا اے تے اوہ ایس ادارے اتے پورا اعتماد کردے نیں۔ صوبچ وچ ایہہ ادارہ ایم ڈی ڈاکٹر فاروق منظور دی سربراہی وچ مافیاز دے خلاف کارروائیاں کرن وچ مصروف عمل نیں۔ سیکرٹری عبدالرزاق تے ڈائریکٹر اختر بٹ نے ائے دن طلبا لئی کتاباں دی مصنوعی قلت اتے قابو پا لیتا اے۔ ٹیکسٹ بک بورڈ نے بلاشبہ مافیاز دے خلاف کارروائی کر کے اوہنوں آزاد کروایا اے۔ ایم ڈی فارقو منظور نے اپنی ٹیم عبدالرزاق سلیم ساگر‘ اختر بٹ تے دوجے افسراں دے نال رل کے نا صرف کرپشن دا قلع قمع کیتا اے بلکہ لکھاں طلبا دے مستقبل نال کھیڈن والیاں نوں وی سبق سکھایا اے جہدے تے اوہ تعریف دے مستحق نیں۔
