مٹی دا پترمٹی دے حوالے

روہیل اکبر

سب توں پہلاں پاکستان دا حامی ملک دا محسن عوام دا غمخوار تے سرسید دا ہمسایہ پرویز مشرف ایس مٹی دا پتر سی جہڑا ایس مٹی دے حوالے کردتا گیا۔ مشرف اوہ مرد آہن سی جہنے آمر ہوندیاں ہوئیاں وی بنیادی جمہوریت دا بہترین نظام دتا تے آزاد میڈیا دی بنیاد رکھی۔ مشرف دے تریخی دور وچ ای اسیں موبائل نیٹ ورک توں آشنا ہوئے ورنہ پی سی او توں 10 روپے یونٹ گل کرنا ہن شاید 50 روپے یونٹ تک پہنچی ہوندی۔ جنرل پرویز مشرف کشمیریاں دے وی عظیم محسن سن۔ 2005 دے خوفناک زلزلے مگروں جنی تیزی نال متاثرین زلزلہ دی بحالی تے آبادکاری دا کم اوہناں نے کیتا اوہ ناقابل فراموش اے۔ بعد دی حکومتاں ایس چلدے ہوئے کم نوں وی پورا نہیں کرسکیاں تے باقی ماندہ کم اج تک نامکمل تے ادھورا اے۔ مسئلہ کشمیر دے حوالے نال جنرل پرویز مشرف دے اقدامات توں کشمیریاں نوں براہ راست ریلیف ملیا۔ انٹراکشمیر ٹریڈ‘ انٹرا کشمیر ٹریول تے ستر ورھیاں توں تقسیم شدہ خانداناں دا ویزے تے پاسپورٹ دے بغیر اک دوجے نال ملنا اوہناں دے وڈے کارنامیاں وچوں اک اے۔
پرویز مشرف 11 اگست 1943 نوں دہلی برطانوی ہندوستان وچ اک اردو بولن والے گھرانے وچ پیدا ہوئے۔ اوہناں دے والد سید مشرفالدین تے اوہناں دی والدہ بیگم زرین مشرف سرسید احمد خان دے ہسمائے وی سن۔ پرویز مشرف دے پردادا تمباکو دے تاجر سن جہناں نے پیران شہر توں برصغیر پاک وہند وچ ہجرت کیتی سی۔ اوہناں دا خاندان مسلمان سی جہڑے سید وی سن۔ سید مشرف نے علی گڑھ مسلم یونیورسٹی توں گریجویشن کیتا تے سول سروس وچ داخل ہوئے جو کہ برطانوی دور حکومت وچ اک انتہائی باوقار کیرئیر سی۔
پرویز مشرف سرکاری افسراں دی اک لمی قطار توں فوجی ملازمت وچ داخل ہویا کیوں جے اوہدے پردادا ٹیکس جمع کرن دی ملازمت کردے سن جد کہ اوہناں دے نانا قاضی (جج) سن ۔ مشرف دی والدہ زرین بیگم جو 1920 دی دہائی دے اوائل وچ پدیا ہوئیاں تے لکھنو وچ پلی بڑھیاں اوتھے سکول دی تعلیم حاصل کیتی جہدے مگروں اوہناں نے دہلی یونیورسٹی دے اندرا پرستھ کالج توں انگریزی ادب وچ بیلچر دی ڈگری حاصل کرن مگروں ویاہ کیتا تے اپنے آپ نوں اک خاندان دی پرورش لئی وقف کر دتا۔ پرویز مشرف دے والد اک اکائونٹنٹ سی جہناں نے برطانوی ہندوستانی حکومت وچ فارن آفس وچ کم کیتا تے اخیر اکائونٹنگ ڈائریکٹر بن گئے۔
پرویز مشرف تن بالاں وچ دوجے نمبر تے سن۔ روم وچ مقیم اوہناں دے وڈے بھراں جاوید مشرف اک ماہر معاشیات نیں تے انٹرنیشنل فنڈ فار ایگریکلچرل ڈویلپمنٹ دے ڈائریکٹرز وچوں اک نیں۔ اوہناں دے چھوٹے بھراں نوید مشرف ریاستہائے متحدہ امریکہ دی ریاست الینوائے وچ مقیم اک اینستھیز یولوجسٹ نیں۔ اوہناں دی پیدائش ویلے مشرف دا خاندان اک وڈے گھر وچ رہندا سی جہڑا اوہناں دے والد دے خاندان نال تعلق رکھدا سی جہنوں نہر والی حویلی کہیا جاندا سی۔جہدا مطلب اے ’’نہر کے ساتھ والا گھر‘‘ جتھے سرسید احمد خان دا خاندان وی نال ای رہندا سی جنرل پرویز مشرف اک نامور پاکستانی فوجی افسر‘ سیاستدان تے پاکستان دے دسویں صدر سن۔ اوہناں نے 1998توں 2001 تک 10ویں چیئرمین جوائنٹ چیفس آف سٹاف کمیٹی تے 1998توں 2007 تک 7ویں چیف آف آرمی سٹاف دے طور تے وی خدمات انجام دتیاں۔برطانوی راج دے دوران دہلی وچ پیدا ہون والے مشرف دی پرورش کراچی تے استنبول وچ ہوئی۔
اوہناں نے لہور دے فارمن کرسچن کالج توں ریاضی دی تعلیم دے نال نال برطانیہ دے رائل کالج آف ڈیفنس سٹڈیز توں وی تعلیم حاصل کیتی۔ مشرف نے 1961 وچ پاکستان ملٹری اکیڈمی وچ داخلہ لیتا۔ 1964 وچ پاکستان آڑمی دی آرٹلری رجمنٹ وچ کمیشن حاصل کیتا۔ مشرف نے 1965 دی پاک بھارت جنگ دے دوران اک سیکنڈ لیفٹیننٹ دے طور تے کارروائی ویکھی تے 1980 دی دہائی تک اوہ آرٹلری بریگیڈ دی کمانڈ کیتی۔ 1990دی دہائی وچ مشرف نوں میجر جنرل دے عہدے اتے ترقی دتی گئی تے اک انفنٹری ڈویژن تفویض کیتا گیا مگروں سپیشل سروسز گروپ دی کمانڈکیتی۔ ڈپٹی ملٹری سیکرٹری تے ملٹری آپریشنز دے ڈائریکٹر جنرل دے طور تے وی خدمات انجام دتیاں۔ 1998وچ وزیراعظم نواز شریف نے اوہناں نوں فورسٹار جنرل دے عہدے اتے ترقی دے کے مسلح افواج دا سربراہ بناد تا مگروں میاں نواز شریف تے مشرف وچ کئی مہینیاں دے متنازعہ تعلقات مگروں میاں نواز شریف نے مشرف نوں فوج دے سربراہ دے طور تے ہٹان دی نکام کوشش کیتی تے ایس فیصلہ نوں فوج نے قبول نہیں کیتا۔
مشرف شروع توں چیئرمین جوائنٹ چیفس تے چیف آف آرمی سٹاف رہے اوہ 2007 وچ ریٹائر ہون تک آرمی چیف رہے۔ مشرف نے 2002وچ آئین نوں بحال کیتا۔ ظفراللہ جمالی تے مگروں شوکت عزیز نوں وزیراعظم مقرر کیتا تے ات گردی دے خلاف پالیسیاں دی نگرانی کیتی۔ مشرف نے اپنے روشن خیال اعتدال پسند پروگرام دے تحت سماجی لبرل ازم نوں اگے ودھایا تے معاشی لبرلائزیشن نوں فروغ دتا۔ مشرف دی صدارت دے دوران مجموعی قومی پیداوار وچ تقریباً 50 فیصد وادھا ہویا۔ پرویز مشرف اپنے دور صدارت وچ کئی قاتلانہ حملیاں وچ بچ گئے۔
جدوں شوکت عزیز وزیراعظم دے طور تے رخصت ہوئے تے 2007 وچ عدلیہ دی معطلی دی منظوری مگروں مشرف دی پوزیشن ڈرامائی طور تے کمزور ہوئی تے 2008وچ مواخذے توں بچن لئی اوہناں نے اپنا استعفیٰ پیش کردیاں ہوئیاں مشرف نے خوساختہ جلاوطنی وچ لندن ہجرت کیتی مگروں پرویز مشرف 2013 دے عام انتخابات وچ حصہ لین لئی پاکستان واپس آئے لیکن ملک دی اعلیٰ عدالتاں ولوں نواب اکبر بگٹی تے بے نظیر بھٹو دے قتل وچ مبینہ طور تے ملوث ہون دے الزام وچ اوہناں دے تے شوکت عزیز دے وارنٹ گرفتاری جاری کیتے جان مگروں اوہناں نوں اوہدے وچ حصہ لین توں نااہل قرار دے دتا گیا۔2013 وچ میاں نواز شریف دے دوبارہ منتخب ہون تے اوہناں نے مشرف دے خلاف ایمرجنسی دے نفاذ تے 2007 وچ آئین نوں معطل کرن لئی سنگین غداری دے الزاماں دا آغاز کیتا۔ مشرف دے خلاف مقدمہ 2017 وچ نواز شریف دے عہدے توں ہٹائے جان مگروں وی جاری رہیا۔
ایسے سال جدوں مشرف نوں دبئی منتقل ہون دی وجہ نال بھٹو قتل کیس وچ ’’مفرور‘‘ قرار دتاگیا تے غیر حاضری تے غداری دے الزام وچ سزائے موت سنائی گئی مگروں لہور ہائیکورٹ نے سزائے موت نوں کالعدم قرار دے دتا سی۔ پرویز مشرف 5فروری 2023نوں دبئی دے امریکن ہسپتال وچ 79 سال دی عمر وچ ایمپلائیڈ وسس دے لمے کیس وچ مبتلا رہن مگروں انتقال کر گئے۔
اللہ تعالیٰ کولوں دعا اے کہ اوہ مرحوم نوں جنت الفردوس وچ اعلیٰ مقام عطا کرے تے اہلخانہ سنے سارے لواحقین نوں صبر جمیل عطا کرے۔ آمین