پستہ

حکیم حارث نسیم سوہدروی
موسم سرما وچ خشک میوہ جات بڑی رغبت نال کھائے جاندے نیں جہناں وچ اک پستہ اے۔ سردیاں دی بھجی راتاں وچ لحاف وچ منہ لکائے نمک لگے پستہ دا استعمال بڑا مزیدار ہوندا اے۔ ایہدی غذائی تے دوائی افادیت بہت زیادہ اے۔ مدافعتی نظام نوں مضبوط بناندا اے۔ دل و دماغ ‘ جگر تے معدہ لئی بڑا مفید اے۔ کولیسٹرول دی سطح نوں گھٹ کردا اے تے شرائین قلب دے تھکے کھولدا اے مگر ایہدا استعمال اعتدال وچ رہ کے کرنا چاہیدا اے تے ودھے ہوئے لہو دے دبائو یعنی ہائی بلڈ پریشر دے مریض پستہ اتے نمک نہ لان ۔
پستہ دا درخت معلوم تریخ توں قدیم درختاں وچ شمار ہوندا اے۔ ایہہ دس انچ تک اچا تے سینکڑاں سال تک رہندا اے۔ ایہدا آبائی علاقہ مغربی ایشیا‘ شام تے افغانستان قرار دتا جاندا اے۔ قدیم فارس وچ ایہہ میوہ بڑا قیمتی خیال کیتا جاندا تے دولت‘ شہرت تے خوشحالی دی علامت تصور کیتا جاندا۔ اک پیالی پستے جوکہ بغیر چھلکے دے ہون وچ کیلوریز 159‘ پروٹین 5.72‘چکنائی 13گرام‘ فائبر 7.70‘ کاروبا ہائیڈریٹس34ملی گرام‘ میگنشم 291ملی گرام ‘ پوٹاشیم 0.482ملی گرام‘ وٹامن بی 6تھایامین247ملی گرام اجزا ہوندے نیں۔ پستہ دا شمار اوہناں گری دار میوہ جیات وچ ہوندا اے جہناں وچ کیلوریز امینوایسڈ‘ معدنیات تے حیاتین دا تناسب بہت زیادہ اے۔پوٹاشیم دے نال نال فاسفورس تے منگنینشیم دی بڑی مقدار ہوندی اے۔
پستہ آنٹی اکسیڈینٹ خصوصیات دا حامل اے جہڑا فینولک کمپانڈز تے حیاتین ای دا مواد فراہم کردے نیں۔ زمانے قدیم وچ اطبا ایہنوں شباب آور یعنی جوانی لوٹان لئی استعمال کرواندے سن تے ایہنوں قیمتی میوہ قرار دتا جاندا سی۔ پستہ انتہائی مفید چیر بیلے تیزاباں (فیٹی ایسڈ) توں بھرپور ہوندا اے جہڑا جلد نوں صحت مند ملائم تے نرم تے چمک نوں قائم رکھدے نیں۔ پستہ وچ موجود روغن جلد نوں ملائم تے پرکشش رکھدے نیں۔ ایہہ اپنی آنٹی اکیسدنٹس خصوصیات دے کارن چھیتی ای ڈھلدی عمر دے کارن ظاہر ہون والی علامتاں نوں روکدا اے۔ پستہ دا باقاعدہ استعمال سورج دی شعاعواں توں جلد تے مضر اثرات نوں روکدا اے۔ دھپ دی جلن تے تپش گھٹ کردا اے تے سرطان دے خطرہ توں محفوظ بناندا اے۔ پستہ وچ موجود بائیوٹن بالاں نوں ڈگن توں روکن وچ مدد دیندا اے۔
جے پستہ پیس کے پنج چمچے فیر اوہدے وچ ناریل دا تیل 2چمچ ملا کے کریم بنا لووتے ایہہ کریم سر دی جلد اتے لا کے 20منٹ تک چھوڑ دیو تے مگروں بالاں نوں کھلا چھڈ دیو جہدے توں بالاں وچ لچک تے تازگی ہووے گی۔ 2017 وچ ہون والی اک تحقیق دے مطابق ایہہ فائبر (پھوک) دی وجہ نال آنتاں دے سرطان نوں روکن وچ مفید اے جہڑا زنانیاں خوبصورت رہنا چاہندیاں نیں اوہناں نوں پستہ روزمرہ دی غذا وچ شامل رکھنا چاہیدا اے۔
اک تحقیق دے مطابق جدوں شوگر ودھان والی غذاواں دے نال پستے دتے گئے تے اوہدے توں لہو وچ شکر دی مقدار نہیں ودھی۔ ایس طرحاں خیال ایہہ اے کہ پستہ لہو وچ شکر دی مقدار متوازن رکھدا اے۔ پستہ دا استعمال موٹاپا نہیں کردا کیوں جے ایہدے وچ بہت گھٹ کیلوریز ہوندی اے۔ 50 پستیاں وچ صرف 159کیلوریز پائی جاندی اے۔ اپنی انٹی اکیسدنٹس خصوصیات دی وجہ نال سرطان (کینسر) تے امراض قلب توں محفوظ بناندا اے۔ پستہ وچ موجود انٹی اکیسڈنٹس لیوٹین تے زی ایلنتھسن موتیا تے بڑھاپے دے امراض وچ مفید اے۔ پستہ جسم انسانی دی لوڑ پروٹین (لحمیات) نوں پورا کردا اے۔ اک پستہ دا 21فیصد وزن پروٹین ہوندا اے۔ اج کل گوشت مہنگا اے تے لوک گھٹ ای استعمال کردے نیں۔
انج دے لوک پستہ دا استعمال کر کے جسم دی اہم ضرورت پروٹین دی کمی نوں محفوظ رہ سکدے نیں۔ پستہ وچ فائبر (پھوک) بڑی مقدار وچ ہوندا اے ایس لئی معدہ تے آنتاں لئی بہت مفید اے۔ معدہ تے آنتاں دا فعل درست رکھدا اے قبض دور کردا اے تے معدہ دے مفید بیکٹریا دی تعداد ودھاندا اے جہدے صحت اتے چنگے اثرات ہوندے نیں۔
2012 وچ ہون والی اک تحقیق دے مطابق پستہ دا استعمال موٹاپا گھٹ کردا اے۔ پستہ فائبر دی وجہ نال شکم یعنی ڈھڈ بھرن دا احساس پیدا ہوندا اے فیر ایہناں وچ کیلوریز وی گھٹ ہوندے نیں ایس طرحاں اسیں اوہناں نوں وزن گھٹ کرن لئی وی استعمال کر سکنے آں۔ اگرچہ ایہہ زمانہ قدیم دا میوہ اے تاہم ہن ایہدے درخت ایران‘ یونان‘ سپین‘ اٹلی‘ امریکہ‘ ترکی‘ آسٹریلیا تے مغربی افریقہ دے نال نال ایشیا وچ وی اگائے جاندے نیں۔ ترک دنیا بھر وچ مارکیٹ دی ادھی سپلائی کردا اے۔
ایہہ اک لکڑی والا پودا اے جدوں ایہدا پھل خشک ہو جاندا اے تے ایہدا گودا خشک ہو جاندا اے تے پتھریلے ہوئے دو حصیاں وچ ہوندا اے جہدے وچ نٹ ظاہر ہوندا اے جد کہ ایہنوں تل کے نمکین کر کے گری دار میوہ دی صورت ویچیا جاندا اے۔ موسم سرما وچ سردی دی شدت دا مقابلہ کرن تے سردی توں ہون والے عوارضات توں محفوظ رہن لئی قدرت دے عطا کردہ خشک میوہ جات جہناں وج پستہ وی شامل اے دا استعمال کرن تے قدرت دی عطا کردہ ایہناں نعمتاں توں بھرواں استفادہ کرن۔ قدرت نے انسان لئی ہر موسم دی مناسبت نال ایسی غذاواں دا پربندھ کیتا اے جہناں دے دو فیدے وی نیں تے صحت لئی بڑے مفید نیں۔سانوں ایہناں دا استعمال کر کے اللہ تعالیٰ دا شکر گزار ہونا چاہیدا اے۔