اَت گرد حملیاں بارے دوٹوک اعلان

حمیداللہ بھٹی

مسلم ملکاںنوں کمزور کرن تے ترقی توں روکن وچ اسلام دے نام تے بنن والی ات گرد تنظیماں دا کلیدی کردار اے۔ اکثر ویکھن وچ آیا اے کہ جہڑے اسلامی ملک دی معیشت بہتر ہون لگدی تے اوہ دفاعی حوالے نال قدرے مضبوط ہون یا آزاد خارجہ پالیسی اپنان دی کوشش کردا اے تے اچانک ات گرد کارروائیاں کرن لگدے نیں۔ ایہناں تنظیماں دے ایجنڈے وچ کوئی ابہام نہیں ایس لئی سمجھنا بوہتا اوکھا نہیں کہ ایہہ اغیار دے ہتھاں وچ کھیڈن والی ایسی کٹھ پتلیاں نیں جہڑی مسلم ملکاں نوں ترقی دی شاہراہ توں ہٹان لئی متحرک ہوندیاں نیں۔ سارے مسلم امہ نوں معاشی تے دفاعی حوالے نال کمزور رکھن دے مشن اتے نیں۔ ترکی‘ لیبیا‘ نائیجیریا‘ شام‘ عراق‘ لبنان‘ ایران تے پاکستان وچ ایسی تنظیماں کئی سالاں توں کارروائیاں وچ مصروف نیں۔ حیران کن امر ایہہ اے کہ ایہہ تنظیماں اپنی مسلح جدوجہد اتے فخر کردیاں تے اپنی دانست وچ جہاد سمجھدیاں نیں۔ ایہہ مسجداں تے مدرسیاں تے فوجاں اتے نہ صرف حملے کردیاں نیں بلکہ معصوم تے بے گناہ شہریاں نوں وی بے دریغ نشانہ بناندیاں نیں۔ ہن تک ہون والے جانی تے مالی نقصانات بارے مکمل تے مصدقہ معلومات تے نہیں۔ اک محتاط اندازے دے مطابق ہن تک لکھاں لوک لقمہ اجل بن چکے تے کھرباں ڈالر دا نقصان ہو چکیا اے۔ امن و امان نہ ہون دی بنا تے شام‘ عراق‘ لبنان تے لیبیا تے اج ایہہ حالت اے کہ عملی طور تے نہ صرف حکومتی رٹ نہ ہون دے برابر اے بلکہ ملکی وحدت قائم رکھنا ای اوکھا ہوندا جا رہیا اے۔ ایس حقیقت نوں نظرانداز کرنا اوکھا اے کہ مسلح کارروائیاں نے معاشی تے دفاعی حوالے نال بہت نقصان پہنچایا اے مگر اج وی ایسے عناصر نوں کچلن لئی نائیجیریا‘ ترکی‘ ایران تے پاکستان پرعزم نیں تے حال ای وچ علما دے دو ٹوک فتوے آن توں مسلح تنظیماں نوں ملن والی افرادی کمک دا خاتمہ ہووے گا۔
چالوں ہفتے 5فروری یوم یکجہتی کشمیر دے دن علمائے اہلسنت نے منعقدہ کنونشن دے موقع تے وطن عزیز وچ ہون والے دہشتگردانہ حملیاں بارے دو ٹوک اعلان کیتا اے کہ پاکستان وچ خودکش سنے ات گردی دی ساری کارروائیاں اسلام دشمنی تے انسانیت دشمنی نیں تے ایہہ قطعی طور تے حرام نیں جہدے تے امکان پیدا ہو گیا اے کہ علما دے دو ٹوک فیصلیاں توں مسلح تنظیماں لئی عام مسلماناں دے دل وچ پایا جان والا رحم تے ستائش دا جذبہ گھٹ ہووے گا کیوں جے اوہناں دے فدائی کارندیاں‘ جہناں دے ازہان وچ ایہہ راسخ کر دتا گیا اے کہ اوہ جان دے کے تے جاناں لے کے اصل وچ اسلام دی ای خدمت کر رہے نیں۔سوچن سمجھن دے نویں زاویے کھیڈن گے ایس طرحاں دے دو ٹوک تے غیر مبہم اعلاناں توں اسلامی ریاستاں نوں مسلح گروہ ختم کرن وچ سہولت ہووے گی۔ سچی گل تے ایہہ اے کہ اسلام دشمن طاقتاں توں ودھ اسلام نوں فروغ دین تے شریعت نافذ دے نام تے معرض وجود وچ ان والی مسلح تنظیماں نے عسکری کارروائیاں توں دین دی کوئی خدمت نہیں کیتی بلکہ اسلام نوں بدنام ای کیتا اے۔ ایہناں تنظیماں دا اسلامی ملکاں نوں ترقی دی شاہراہ توں ہٹان وچ مرکزی کردار اے۔ مسلم امہ دے اتحاد نوں پارہ پارہ کرن وچ مسلح تے فرقہ وارانہ تنظیماں دی سرگرمیاں کسی کولوں لکھی چھپی نہیں۔ فرقہ واریت توں ای دہشت گرد تنظیماں جواز پیش کردیاں نیں۔ علما نوں چاہیدا اے کہ فرقہ واریت نوں فروغ دین والے عناصر دی مذمت دا وی دو ٹوک اعلان کرن کیوں جے ایہدے سہارے اسلام دی نامکمل تشریح کیتی جاندی اے تے تے فیر دہشت گرد حملے کردے نیں۔
دہشت گرد حملیاں دی سارے علما مذمت کرن بلکہ میری دانست وچ فوری طور تے سارے مسالک نوں یکجا ہو کے اپنا بھرواں کردار ادا کرنا چاہیدا اے کیوں جے متحدہ موقف توں ودھ بہتر نتائج ہو سکدے نیں۔ علما دے دو ٹوک اعلان توں مسلح تنظیماں دی اسلام دشمنی دا پردہ چاک ہووے گا کیوں جے ایہہ اغیار دے ہتھیں کھیڈونا بنی تنظیماں عام تے اسلام دا گھٹ علم رکھن والے نوجواناں نوں باور کراندیاں نیں کہ خودکش حملے ای دراصل اسلام دی اصل خدمت اے تے ایہہ عمل نہ صرف سہادت فی سبیل اللہ اے بلکہ بغیر حساب جنت دا حصول یقینی بناندا اے۔ ہر مسلمان دل وچ جنت دے حصول دی تمنا رکھدا اے مگر ساڈے کول قرآن دی صورت وچ عمدہ رستہ اے۔ مکی مدنی پیارے آقادی سنت وچ عملی وضاحت اے مکمل ضابطہ حیات ہون مگروں ایہدے وچ ہور کسی ملاوٹ دی لوڑ ای نہیں رہندی کیوں جے اسلام وچ حقوق و فرائض دے حوالہ نال کوئی پہلو تشنہ نہیں مگر مکمل علم نہ رکھن والے جنت دے حصول لئی جدوں اسلام دشمن تے انسانیت دشمن گروہواں دے ہتھے چڑھدے نیں تے اوہ اپنی چکنی چپڑی گلاں توں گمراہ کردے تے ات گردانہ حملیاں ولوں لے آندے نیں۔ لوڑ ایس امر دی اے کہ علمائے دین دہشت گرد حملیاں بارے دو ٹوک اعلان کرن دے نال جہالت دور کرن ولوں وی توجہ دین کیوں جے ایہہ جہالت وی کسی حد تک دہشت گرد گروہواں نوں آلہ کار تلاش کرن وچ معاون تے مددگار ہوندی اے۔
اسلام وچ مسجداں تے منبر اں دی بڑی اہمیت اے۔ ایہہ دین دے فروغ دا اہم ذریعہ اے ایس لئی ایتھوں ملن والے پیغام نوں مسلمان نظرانداز نہیں کردے مگر ویکھن وچ آیا اے کہ ایتھے وی کجھ غلط عناصر گھس بیٹھے نیں جہڑے اپنی گھٹ علمی نال عام لوکاں نوں غلط راہواں ول مائل کردے نیں۔ علما نوں چاہیدا اے کہ دہشت گرد حملیاں بارے دو ٹوک اعلان دے نال اپنی صفاں وچ شامل انج دے لوکاں دا وی محاسبہ کرن جو نہ صرف فرقہ واریت نوں فروغ دیندے نیں بلکہ اک دوجے اتے حملے کرن نوں اسلام دی خدمت قراردیندے نیں۔ علما دے جاندار کردار توں اسلامی ریاستاں نوں ات گردی جئے ناسور توں مستقل طور تے نجات مل سکدی اے۔ خوشی دی گل ایہہ اے کہ علما نوں نازک حالات دا مکمل ادراک اے تے اوہ متحرک وی ہو چکے نیں۔ پاکستان اک اسلامی ملک اے ایہہ تے اسلام دے نام تے ای معرض وجود وچ آیا اے ایس لئی کسی وی دلیل یا جواز دے ذریعے اسلامی شناخت توں محروم نہیں کیتا جا سکدا۔ دارالحکومت اسلام آباد وچ پچھلے مہینیاں دے اخیر وچ پیغام پاکستان کانفرنس منعقد ہوئی جہدا انتہائی اہم تے قابل ذکر پہلو ایہہ اے کہ کانفرنس وچ شامل ملک بھر توں آئے علما تے مشائخ نے متفقہ اعلامیہ جاری کیتا جہدے وچ کہیا گیا اے کہ حکومت سنے فوج تے سکیورٹی ایجنسیاں نوں غیر مسلم قرار دینا نہ صرف شرعی قنوناں دی خلاف ورزی اے بلکہ مذکورہ اوہناں دے خلاف مسلح کارروائیاں دی وی شریعت وچ کوئی گنجائش نہیںایس لئی چاہے شریعت دے نفاذ دے نام تے ای کیوں نہ کیتی جاوے مسلح کارروائیاں حرام فعل اے امید واثق اے کہ انج دے اعلانات تے اعلامیے سامنے آن توں پاکستان دی نظریاتی تے اسلامی حیثیت دے حوالے نال راہ گم کردہ تنظیماں دی پھیلائی بدگمانیاں دا خاتمہ کرن وچ مدد اعانت ملے گی۔