حضرت حفیظ تائبؒ

رپورٹ
پنجابی یونین دے پربندھ ہیٹھ پنجاب ہائوس وچ مجدد نعت حضرت حفیظ تائبؒ دے جنم دیہاڑ اتے محفل نور منعقد ہوئی۔ محفل دے روح رواں چیئرمین پنجابی میڈیا گروپ مدثر اقبال بٹ سن۔ محفل دی صدارت چیئرمین حفیظ منہاس فائونڈیشن عبدالمجید منہاس نے کیتی۔ سٹیج سیکرٹری دے فرائض ممتاز ملک نے ادا کیتے جد کہ محفل دا انتظام و انصرام بلال مدثر بٹ نے کیتا۔ محفل وچ اہل علم ہستیاں دی بھاری تعداد نے رلت کیتی جد کہ محفل وچ جنہاں ہستیاںنے اظہار خیال کیتا۔ اوہناں وچ طارق شریف زادہ‘ صاحبزادہ کاشف محمود‘ نورالحسن‘ مدثر اقبال بٹ‘ عبدالمجید منہاس‘ حافظ ممتاز ملک‘ اکرم قلندری‘ محمد عدنان‘ ندیم اقبال باہو تے دوجیاں معروف ہستیاں شامل سن۔ جنہاں نے ثنا خوانی دی سعادت حاصل کیتی اوہناں وچ الحاج اختر قریشی‘ حافظ مرغوب احمد ہمدانی‘ سرور نقشبندی‘ اکرم قلندری‘ صوفی اللہ رکھا تے ندیم اقبال باہو دے علاوہ دوجی ہور کئی شہرت یافتہ ہستیاں شامل سن۔
ڈاکٹر طارق شریف زادہ نے بڑی تفصیل نال حضرت حفیظ تائبؒ دی شخصیت تے فکرو فن اتے چانن پایا۔ اوہناں آکھیا کہ مجدد نعت حفیظ تائبؒ نے اردو تے پنجابی وچ نعت دی جہڑی شاندار روایت قائم کیتی تے اگانہہ ودھائی او سلاہن جوگ اے۔ او بلاشبہ پاکستان دے سب توں وڈے نعت گو سن۔ صحیح طور تے عاشق رسولؐ سن۔ اوہناں اسلام دے سچے اصولاں وچ اپنی اپنی حیاتی ڈھالی۔ قرآن شریف تے احادیث دے اصولاں نوں بڑی بریک بینی نال سمجھیا وی تے اپنی نعتیہ شاعری راہیں اگانہہ ودھایا وی۔ تریخ اسلام بارے اوہناں دا مطالعہ بڑا وسیع سی۔ او بلاشبہ عصر حاضر دے سب توں وڈے نعت نگار نیں۔
صاحبزادہ کاشف محمود دے وچارسن۔ نعت کہن دی تمنا رکھن آلے سخن وراں نوں حفیظ تائب نوں پڑھیاں تے سمجھیاں بغیر رستہ نئیں مل سکدا۔ او تے اپنی ذات وچ انجمن سی۔ عجزو انکساری دا نمونہ سن۔ او نعت نگاری وچ نواں اسلوب تے نویں موضوعات لے کے آئے۔ نعت راہین دکھی دلاں دی پکار وی الیکی۔ سماجی قدراں دے پہلو وی آشکار کیتے۔ اوہ عشق رسولؐ دا اظہار ایہو جئے والہانہ انداز وچ کردے سن جو قلب و نظر وچ وس جاندا اے۔ فکری و فنی حوالے نال اعلیٰ مقام رکھن والے حفیظ تائب دی اپنی ہستی وی مجسم نعت سی۔ او نعت گوئی وچ عصر حاضر دے مجتہد سن۔ اوہناں 50 ورھیاں توں ودھ دا عرصہ نعت گوئی وچ گزاریا۔ ایس وچ کوئی شک نئیں کہ اوہ ولئی کامل سن۔ نعت راہیں عصر حاضر دے مسائل وی بڑی ہنرمندی نال سامنے لیائے۔
صاحبزادہ کاشف محمود نے اظہار خیال کردیاں حفیظ تائب ہوران نوں گلشن نعت دا گلاب قرار دتا۔ اوہناں آکھیا کہ حضرت حفیظ تائب نے جس معجزانہ انداز وچ نعت گوئی کیتی اوہدی مہک باقی رہوے گی۔ پنجابی‘ اردو‘ فارسی‘ عربی تے انگریزی زبان دی جانکاری نے اوہناں دے لسانی رویے ہور وی زرخیز کردتے۔تریخ اسلام دے ای حوالے نئیں دتے بلکہ اج کل دیاں سماجی قدراں وی سامنے لے کے آئے۔ اوہناں دا خلا بھرنا ناممکن اے۔او پنجابی تے اردو نعتیہ شاعری دے سرخیل نیں۔ اوہناں دی اپنی شخصیت وی عاجزی تے انکساری دا بہترین نمونہ سی۔ اوہناں قرآن و حدیث نوں سمجھیا وی تے اوس اتے عمل وی کیتا۔
اچیاں قدراں دے نعت گو‘ مجدد نعت حضرت حفیظ تائبؒدے جنم دیہاڑ دی محفل وچ نورالحسن ہوراں اپنے خیالات سانجھے کردیاں آکھیا پاکستان دی تریخ وچ او نعت گو سن جنہاں نوں سرکار ولوں تمغۂ حسن کارکردگی ملیا۔ ایہہ گل وکھری اے‘ اوہناں کدی وی دنیاوی انعام و اکرام دی خواہش نئیں کیتی۔ او تے نعت گوئی نوں اپنا فرض سمجھ کے نبھاندے سن۔ نعتیہ شاعری دے فروغ لئی اوہناں نے اپنی حیاتی وقف کیتی۔ نعتیہ شآعری دا اک نواں جہان آباد کیتا۔ ایہہ اردو تے پنجابی ادب دی خوش نصیبی اے۔ اوس نوں حفیظ تائب ورگا عظیم نعتیہ شاعر نصیب ہویا۔ ایس عاشق رسولؐ تے جنا وی فخر کرئیے گھٹ اے۔
چیئرمین پنجابی میڈیا گروپ مدثر اقبال بٹ ہوراں نے مجدد نعت حضرت حفیظ تائبؒ نوں خراج عقیدت پیش کردیاں آکھیا کہ اوہناں دی نظیر ناممکن اے۔ اوہ سچے عاشق رسولؐ سن۔ نعتیہ شاعری دے تاجدار سن۔ اوہانں بڑی مستقل مزاجی نال نعت دا احیا کیتا۔ نویں افق سامنے لیاندے۔ ساڈا عہد حفیظ تائب دا عہد اے۔ اوس مجسم نعت دی فنی عظمت بیان کرنا میرے وس وچ نئیں۔ اوہناں جس جذب دے عالم وچ نعت لکھی اوہ روحانی کیفیات نوں ہور وی بالیدگی عطا کردی اے۔ نعتیہ شاعری وچ اوہ کلاسیک دا درجہ رکھدے نیں۔ اوہناں دی اپنی شخصیت وی سوزو گداز‘ شائستگی‘ خوش گفتاری‘ ملائمت‘ دردمندی تے عاجزی و انکساری دا بہترین نمونہ سی۔ اوہ قادرالکلام شاعر سن۔ اوہناں حضور پاکؐ دے فیوض و برکات تے تعلیمات نوں وی اجاگر کیتا تے دور حاضر دے مسائل وی الیکے۔ اوہ جدید نعت دے امام نیں۔ اوہناں دی نعتیہ شاعری توں فیض چکیاں بغیر نعت گوئی دا سفر طے کرنا ممکن نئیں۔ او سراپا صداقت سن۔ زبان و بیان تے قدرت رکھدے سن۔ اوہناں نعتیہ شاعری وچ جس طراں اظہار عقیدت کیتا اوس وچ بڑی گہرائی اے۔ اب تعالیٰ اوہناں دے درجات بلند فرمائے۔ اوہناں دا کلام رجحان ساز اے۔ اوہ معمار نعت نیں۔
مجدد نعت حضرت حفیظ تائبؒ دیجنم دیہاڑ دی پرنور محفل وچ چیئرمین حفیظ منہاس فائونڈیشن عبدالمجید منہاس ہوراں نے آکھیا کہ ایہہ میرے لئی قابل فخر اے کہ اوہ میرے بھائی سن۔ اوہناں دی شخصیت وچ جو پروقار عاجزی سی اوس نے نکے توں لے کے وڈے تائیں ہر ہستی نوں متاثر کیتا۔ اوہ ساڈی تریخ دے سب توں وڈے نعت گو شاعر سن۔ انتہائی سادہ مزاج تے خوش کلام سن۔ اوہناں اعلیٰ معیار دی نعتیہ شاعری کیتی۔ اوہ دبستان مدحت سن‘ تخلیقی عظمتاں دی معراج تے سن۔
ریاض مصطفی نے اپنے خطاب وچ کیہا مجدد نعت حضرت حفیظ تائب عشق محمدیؐ وچ ڈب کے نعت کہندے رہے۔ اوہناں دی نعتیہ شاعری وارفتگی تے علمیت دا اوہ بلند پایہ نمونہ اے جو قابل تقلید اے۔ اوہناں سچی نسبتاں دا عشق کیتا۔ کاروان نعت دے سالار نے بے مثل نمونے چھڈے۔ اعلیٰ معیار دیاں آئینہ دار نعتاں تخلیق کیتیاں۔ او بلند پایہ انسان وی سن تے اعلیٰ پائے دے نعت نگار وی۔
ندیم رضا ہوراں نے محفل نور وچ حضرت حفیظ تائب نوں بھرواں خراج تحسین پیش کردیاں آکھیا کہا و ایسے عاشق رسولؐ سن جو ساڈے لئی باعث صد افتخار نیں۔ حمد و نعت دے شاہکار عطا کیتے۔ نعت گوئی نوں اک تحریک بنا دتا۔ او خود ایس قافلے دے سالار نیں۔ اوہناں نوں معیاری نعت دا قرینہ آندا سی۔ حد درجہ منکسر المزاج حفیظ تائب نے نعت گوئی وچ اوہ وسیع امکانات پیدا کیتے جو کہ ناپید سن۔ نعت دے فنی و ادبی تقاضیاںدی تکمیل وچ اوہناں نے تریخ ساز کردار ادا کیتا۔ حضرت حفیظ تائب دا ناں تے مقام عشق رسولؐ وچ بڑا معتبر حوالہ اے۔
عبدالمجید چٹھہ نے اپنے خطاب وچ آکھیا کہ مجدد نعت حضرت حفیظ تائبؒ نے معیاری نعت گوئی اک ایسا معیاری تصور پیش کیتا جو قابل تقلید اے۔ اوہناں نے اپنی حیات عشق رسولؐ وچ فنا کیتی۔ نعت گوئی دے نویں پیمانے تخلیق کیتے۔ اوہ حقیقی نعت گو سن۔ اوہناں نعتیہ شاعری وچ فنی و ادبی تقاضیاں دی تکمیل وچ تریخ ساز کردار ادا کردیاں ایسی نعت کہی جو اوہناں نوں ہمیشہ زندہ رکھے گی۔ اوہ عہد ساز تے رجحان طراز نعت گو سن۔
ممتاز ملک ہوراں دا کہنا سی‘ حفیظ تائبؒ قول و عمل دا اوہ نمونہ نیں۔ اوہناں نعت نوں اینا معتبر بنایا کہ جس دی مثال کوئی نئیں۔ اوہ ساڈے لئی باعث صد افتخار نیں۔ اوہناں نے نعت گوئی دے اوہ پیمانے وضع کیتے کہ سخن وراں نوں نعت کہن دی تمنا ہوئی۔ اوہناں نے نعت گوئی دے فنی و ادبی تقاضیاں دی وی تکمیل کیتی تے عشق رسولؐ وچ وی معتبر ٹھہرے۔ اوہناں دی عہد ساز ہستی نے اوہناں نوں نعت گوئی دا مستند حوالہ بنا دتا۔ اوہ مجسم نعت دا پیکر وی نیں۔ایہہ سعادت موجودہ دور وچ کسی ہور نوں نصیب نئیں ہوئی۔
اکرم قلندری ہوراں دا خیال سی۔ عہد حاضر وچ نعت گوئی اوہناں توں بغیر مکمل نئیں۔ اوہناں بے مثال نعتیہ کلام پیش کیتا۔ جدوں وی نعتیہ شاعری دا ذکر ہندا اے‘ نگاہ انتخاب مجدد نعت حفیظ تائب تے جاندی اے۔ اوہ انتہائی سادہ مزاج سن۔اوہناں دا سوز و گداز دل تے اثر کردا اے۔ اوہناں نوں بھلانا ممکن نہیں۔ اوہناں دی نعت پڑھن دی جدوں وی سعادت ملدی اے۔ ایسی کیفیت طاری ہندی اے جس دی سوغات کتھوں ہوروں نئیں لبھدی۔
مجدد نعت حضرت حفیظ تائب دے جنم دیہاڑ دی پروقار تقریب وچ محمد عدنان دے خیالات سن کہ حفیظ تائب نے جو نعتیہ شاعری تخلیق کیتی اوہ اوہناں نوں عالم اسلام دے اک وڈے نعت گو دی حیثیت عطا کردی اے۔ اوہناں دے فن دی بالیدگی احاطۂ فکر نوں زرخیز بناندی اے۔ اساں اوہناں نوں بھل نئیں سکدے۔
اطہر نوید کوثر دے وچار سن کہ حضرت حفیظ تائبؒ دا فن تے حیاتی ساڈے لئی قابل تقلید اے۔ اوہ بلند پایہ انسان وی سن تے بلند فکر عالم وی۔ عشق نبیؐ دا اوہ نمونہ سن جو جسم و جاں نوں معطر کردا اے۔ کاروان نعت دے اوس رہبر نے جو رستے اجالے‘ اوہناں دا چانن کدی مدھم نئیں ہو سکدا۔
ندیم اقبال باہو نے اپنے خطاب وچ حضرت حفیظ تائب نوں نذرانۂ عقیدت پیش کردیاں آکھیا کہ ساڈے عہد دی نعتیہ شاعری وچ جو مقام اوہناں نوں حاصل اے او کسی ہور دے لیکھے نئیں پیا۔ ایہہ واقعی حقیقت اے کہ اوہ مجسم نعت سن۔ عشق رسولؐ اللہ نے اوہناں نوں اوہ مقام عطا کیتا جو ساڈے لئی باعث فخر وی اے تے باعث تقلید وی۔ اوہناں نوں بھلانا ممکن نئیں۔ اوہناں نعتیہ شاعری نوں معتبر بنایا۔
پنجابی یونین دے پربندھ ہیٹھ پنجاب ہائوس وچ مجدد نعت حضرت حفیظ تائب دے جنم دیہاڑ اتے جو پرنور محفل تقریب ہوئی‘ اوہدا اختتام پرتکلف چا دے اہتمام نال ہویا۔ بلال مدثر بٹ نے معزز رلتیاں دی سیوا وچ کوئی کسر نہ چھڈی تے یادگار تقریب نوں ہور وی یادگار بنا دتا۔