14مارچ …….. پنجاب ثقافت دیہاڑ

پنجاب علاقائی رسم و رواج تے ثقافتی روایتاں دا امین اے
پنجابی کلچر منفرد تریخی روایتاں دا حامل تے متنوع ثقافتی حسن اپنی مثال آپ اے
پورے پنجاب دیاں تریخی عمارتاں تے رہتل جگ وچ وکھرا مقام رکھدے نیں
پنجاب دی لوک داستاناں‘ روایتی کھیڈ‘ فوک میوزک تے ثقافتی رنگ ساڈے متھے دا جھومر نیں۔
لوگو وچ پہلی واری زنانیاں نوں وی نمائندگی دتی گئی اے، اچے شملے والی پگ نوں پگڑی وچ تبدیل کیتا گیا اے

پیغام وزیراعلیٰ پنجاب
کسے وی قوم دی پچھان اوہدی بولی تے رہتل نال ہوندی اے۔ ثقافت ای بندے دی پوری حیاتی دی تصویر ہوندی اے۔ پنجاب دی مٹی بڑی زرخیز اے‘ ایہہ چار موسماں دی دھرتی اے۔ حکومت پنجاب نے ایس دھرتی دی ثقافت دے ودھا لئی ’’پنجاب ثقافت دیہاڑ‘‘ مناون دا فیصلہ کیتا اے۔ جیہدے نال ہر سال 14 مارچ نوں ’’پنجاب ثقافت دیہاڑ‘‘ پورے پنجاب وچ سرکاری سطح تے منایا جائے گا کیوں جے لوگ اپنی ثقافت نال پیار کرن۔ وسدے رہو۔
سید محسن رضا نقوی(وزیراعلیٰ پنجاب)

پیغام وزیر اطلاعات و ثقافت‘ پنجاب
پنجاب دی دھرتی اپنی ثقافت پاروں پوری دنیا وچ اپنی پچھان رکھدی اے۔ اوہ ای قوماں جیوندیاں نیں جیہناں دی بولی تے ثقافت جیوندی اے۔ پنجاب دی ثقافت ساڈا مان تے سیان اے۔ ایسے پاروں پنجاب حکومت نے ہر سال 14 مارچ نوں ’’پنجاب ثقافت دیہاڑ‘‘ مناون دا آہر کیتا اے۔ تہانوں ساریاں نوں ایہدے وچ رلت کرن دا سدا اے کیوں جے اپنی دھرتی دی ثقافت وچ ای ساڈی پچھان دی دس پیندی اے۔ سدا وسدا رہے پنجاب
عامر میر(وزیر اطلاعات و ثقافت حکومت پنجاب)

پنجاب ثقافت دیہاڑ
پنجاب ہزاراں سالاں دے تواریخی پچھوکڑ دا وارث اے۔ ایہدے دریا تے باراں دی تریخ وچ جھاتی پائیے تے کئی سورمیاں دی بہادری دیاں داستاناں دا پتا لگدا اے۔ ایسے لئی کسے وی قوم دی سیان اوہدی رہتل تے وسیب توں ہوندی اے جیہنوں ثقافت دا ناں دتا جاندا اے۔ ثقافت بندے دی پوری حیاتی نال جڑی ہوندی اے۔ جیہدے وچ اوہدی بولی‘ پہناوا‘ رہن سہن‘ خوشی تے غمی مناون دے سارے رنگ ڈھنگ ویکھن نوں ملدے نیں۔ کسے وی علاقے دی آب و ہوا وی لوکاں دی ثقافت تے اپنا گوڑھا اثر چھڈدی اے۔ پنجاب دی دھرتی نوں رب نے سارے موسم عطا کیتے نیں۔
14مارچ نوں حکومت پنجاب ولوں ’’پنجاب ثقافت دیہاڑ‘‘ مناون دا سب توں وڈا کارن ’’موسم بہار‘‘ چیتر دا مہینہ وی اے جیہڑا دیسی مہینیاں دا پہلا مہینہ اے۔ بندہ جنی وی ترقی کر لوے اوہنوں دلی خوشی اپنی رہتل تے وسیب وچ ساہ لے کے ہوندی اے۔ پنجاب حکومت دا ایہہ بڑا وڈا کم اے جیہنے پنجاب دی تواریخ دی سانبھ سنبھال لئی 14مارچ نوں ’’پنجاب ثقافت دیہاڑ‘‘ مناون دا جتن کیتا اے…تے ایس دیہاڑ دا ’’لوگو‘‘ وی بنایا اے۔
ایسے لئی حکومت پنجاب محکمہ اطلاعات و ثقافت تے پلاک نے ’’پنجاب ثقافت دیہاڑ‘‘ دے موقع تے رنگا رنگ تقریبات کران دا آہر کیتا اے۔ جیہدے وچ ڈھول پرفارمنس‘ گھوڑا ناچ‘ اونٹ ناچ ‘ ونجلی‘ جوڑی‘ شہنائی‘ چمتا‘ ہیر گائیکی‘ ٹپے‘ ماہیے‘ گدا تے بھنگڑے دا پربندھ کیتا اے۔ دستکاری بازار‘ کرتے‘ چادراں‘ کھسے‘ زیورات‘ مٹی دے بھانڈے تے لکڑی دیاں بنیاں چیزاں تے پنجابی کھابے وی ہوون گے۔جیہدے وچ پنجاب دے سارے رنگ نظریں آون گے۔ ایہدے نال نال پنجابی فوک موسیقی وی سنن نوں ملے گی۔ سارے پنجابی اپنی ثقافت دا آدر کرو تے ایہدا مان ودھائو۔ وسدے رہو۔
علی نواز ملک(سیکرٹری محکمہ اطلاعات و ثقافت‘ حکومت پنجاب)

جاوید یونس

خداوند قدوس نے پاکستان نوں پرکشش‘ دیدہ زیب‘ دلکش قدرتی مناظر‘ حسین وادیاں‘ تریخی ورثے تے دل فریب روایتاں نال نوازیا اے۔ پنج دریاواں دی دھرتی پنجاب عظیم ورثے‘ قدرتی مناظر‘ مذہبی مقامات‘ تریخی مقامات تے عمارتاں‘ کلچر ‘ میلے ٹھیلے‘ کھابے‘ نایاب جنگلی حیات‘ شاندار روایتاں‘ چار موسم‘ اسماناں نال گلاں کردے درخت تے پھلاں نال مالا مال نیں۔ ایس دے علاوہ ایتھے ورسٹائل لینڈ سکیپ موجود اے۔ پنجاب خوبصورت ثقافتی رنگاں دی دھرتی تے ایتھے دی بدلدی رتاں محبتاں ونڈدیاں نیں۔ انج کہیا جاوے تے بے جا نہیں ہووے گا کہ پنجاب دے علاقائی رسم و رواج تے ثقافتی روایتاں عماشرے دے متھے دا جھومر نیں۔ پنجاب دے مکین پوری دنیا وچ اپنی مہمان نوازی لئی مشہور نیں۔
پنجاب دے مختلف علاقیاں پوٹھوہار‘ مشرقی پنجاب‘ سون ویلی‘ سرائیکی وسیب‘ سنٹرل پنجاب تے صحرائے چولستان بہاولپور دا رنگا رنگ تے متنوع ثقافتی حسن اپنی مثال آپ اے۔ ایہناں علاقیاں دی شاندار ثقافت تے تہذیب ساڈے لئی قابل قدر سرمایہ اے۔ پنجاب دی ثقافت اک گلدستہ وانگوں اے جہدے وچ تقریباً ہر رنگ تے خشبو دے پھل موجود نیں تے اوہدی نہ صرف ثقافت منفرد تریخی روایتاں دی امین اے بلکہ عصر حاضر وچ وی اپنی اک ممتاز حیثیت رکھدی اے۔ حکومت پنجاب نے پنجاب دے ہر علاقے دی ثقافت نوں اجاگر کرن تے بین الاقوامی سیاحواں نوں راغب کرن لئی الحمرا تے پنجاب آرٹ کونسل جئے ادارے قائم کیتے ہوئے نیں مگر افسوس اوہ اپنے مقاصد حاصل نہیں کر سکے جہناں لئی اوہناں نوں قائم کیتا گیا سی۔ پنجاب دی تریخ و تمدن ہزاراں سال اتے محیط اے۔ محکمہ آثار قدیمہ دے مطابق پنجاب دی تریخ پنج ہزار سال پرانی اے۔ ہڑپہ تے ٹیکسلا دے کھنڈراں توں ایہہ گل عیاں اے۔ پنجاب دے ثقافت وچ بہار نوں اک خاص اہمیت حاصل اے ایس لئی 14 مارچ نوں ثقافتی دن دے طور تے منایا جاندا اے تے بہار نوں جی آیاں نوں کہیا جاندا اے۔ ایس موقع تے مختصف قسم دے میلے ٹھیلے لگدے نیں۔ زنانیاں رنگ برنگے کپڑے پا کے ایہناں میلیاں وچ جاندیاں نیں۔ اوہناں دی چوڑیاں دی کھنک تے اوہناں دے قہقیاں دی گونج رت نوں ہور نکھار دیندی اے۔ مجموعی طور تے پنجاب ثقافت وچ شلوار قمیض تے پگ نوں خاص اہمیت حاصل اے۔ روایتی ڈانس‘ جھومر‘ ماہیے‘ ٹپے تے دھوڑے‘ پنجاب دے کلچر نوں دوجے کلچر توں ممتاز کردے نیں۔ پنجاب روایتی کھانیاں وچ مکھن‘ لسی‘ ساگ تے مکئی دی روٹی نوں نمایاں حیثیت حاصل اے۔ نگران وزیراعلیٰ پنجاب محسن نقوی تے اطلاعات و ثقافت دے نگران وزیر عامر میر نے پنجاب ثقافتی روایتاں نوں زندہ رکھن لئی 14 مارچ نوں پنجاب ثقافت دیہاڑ نوں بھراوں انداز وچ منان لئی ہدایات جاری کیتیاں نیں۔ ایس توں نہ صرف صوبے دے لوکاں دا باہمی میل جول ودھے گا بلکہ اتحاد و یگانگت‘ پیار محبت پروان چڑھے گا۔
نگران وزیراعلیٰ پنجاب محسن نقوی دی خصوصی ہدایت تے 14 مارچ نوں پنجاب ثقافت دیہاڑ نوں منفرد انداز وچ منایا جا رہیا اے۔ نگران صوبائی وزیر عامر میر ایہدی خود نگرانی کر رہے نیں۔ پنجاب کلچر ڈے دے لوگو نوں تبدیل کیتا گیا اے تے اوہدے وچ پہلی واری مرد دے نال زنانی دا سکیچ وی شامل کیتا گیا اے جہڑا حقیقی معنیاں وچ پنجاب دی ثقافت توں مکمل طور تے ہم آہنگ اے۔ ایہدے وچ کوئی شک نہیں کہ زنانیاں گھر گرستی دے نال کھیتی باڑی وچ مرداں دے نال کم کردیاں نیں۔ زنانیاں نے ہر شعبہ خواہ اوہ کھیڈ ہووے‘ ملکی دفاع‘ سیاست‘ فن و ثقافت‘ موسیقی تے ادب وچ اپنا لوہا منوایا اے۔ صوبائی دارالحکومت سنے صوبہ بھر دے سارے ڈویژنل‘ ضلعی سطح اتے پنجاب ثقافت دیہاڑ دے حوالے نال تقریبات دا انعقاد کیتا جا رہیا اے جہناں وچ پنجاب دے صحرائی ‘ میدانی تے پہاڑی علاقیاں دی تہذیب و ثقافت نوں اجاگر کیتا جاوے۔ا یس دے علاوہ پنجاب دے رہن سہن تے ماں بولی زبان دے رنگ نمایاں ہون گے۔ پنجاب دے قافت اتے بنائی گئی ڈاکو منٹیریاں دے مقابلے پروگرام دا حصہ ہون گے۔ زندہ دلان لہور دے شہر وچ تقریب الحمرا تے بلاک وچ منعقد ہووے گی جہدے وچ ثقافتی ویلج‘ کلچرل شو‘ ثقافتی شتالز‘ لڈی‘ بھنگڑا‘ بلوچی ڈآنس وی شامل ہووے گا۔ پنجاب دی تہذیب و ثقافت اپنے حسن تے دل پذیری دی وجہ نال پوری دنیا وچ مشہور اے۔ نگران صوبائی وزیر اطلاعات و ثقافت عامر میر نے نویں لوگو دی منظوری دتی جد کہ پنجاب کلچر ڈے ہن پنجاب ثقافتی دیہاڑ کہلاوے گا۔ پنجاب کلچر دیہاڑ دی میزبانی پنجاب انستی ٹیوٹ آف لینگوئج اینڈ لٹریچر کر رہیا اے۔ صوبائی وزیر نے کہیا کہ موجودہ لوگو پنجاب دی ثقافت دی بھرواں نمائندگی کردا اے جہدے وچ پنجاب مرد تے زنانیاں نوں پنجابی کپڑے وچ وکھایا گیا اے۔ پنجاب دے عوام دی ایہدے وچ نمائندگی یقینی بنان لئی اچے شملے والی پگ نوں پگڑی وچ تبدیل کیتا گیا اے۔ پنجابی ثقافتی دیاہڑ وچ کلچر بیانیہ ‘ فوک میوزک‘ صوفیانہ کلام‘ بھنگڑا‘ گدا پیش کیتا جاوے گا جد کہ ملک دے منے پرمنے فنکار عارف لوہار‘ فضل جٹ‘ سائیں ظہور‘ صائمہ جہاں تے دوجے فنکار اپنے فن دا مظاہرہ کرن گے۔
نگران وزیراعلیٰ پنجاب محسن نقوی دی ہدایت تے لہور تے فیصل آباد وچ 5مارچ توں 12مارچ تک جشن بہاراں دا انعقاد کیتا گیا۔ایس موقع تے لکی ایرانی سرکس‘ لیز لائٹس شو‘ میرا تھن ریس‘ سائیکل ریس‘ معذظر افراد لئی وہیل چیئر ریس دا انعقاد کیتا گیا۔ جیلانی پارک الحمرا وچ صوبہ بھر دے کلچر نوں اجاگر کرن لئی مختلف سٹالاں دے علاوہ کھانیاں دے سٹالز وی لائے گئے نیں۔ زندہ دلان لہور ولوں مختلف علاقیاں دے کھابیاں وچ غیر معمولی دلچسپی ویکھن وچ آئی اے۔
جشن بہاراں دے مقوع تے پہلی واری 5مارچ تک صوفیائے کرام دے مزاراں اتے قوالی تے صوفی نائٹس دا پربندھ کیتا گیا تے ملک دے نامور قوال حضرات تے نعت خواہاں حضرات نے نعتیہ تے عارفانہ کلام پیش کر کے لوکاں دے دلاں نوں منور کیتا۔صوبائی دارالحکومت لہور تے فیصل آباد دی نہراں نوں خوبصورتی نال سجایا گیا سی تے رات ویلے رنگ برنگی لائٹاں تے قمقمے محسور کن نظارہ پیش کردے نیں۔ ایہدے وچ کوئی سک نہیں کہ گھٹن دے ایس ماحول وچ عوامی تفریح دے موقعے آکسیجن دا کم کردے نیں۔