ٹارگٹ صرف لوکائی!

سعد اللہ شاہ

سحر کے ساتھ ہی سورج کا ہم رکاب ہوا
جو اپنے آپ سے نکلا وہ کامیاب ہوا
میں جاگتا رہا اک خواب دیکھ کر برسوں
پھر اس کے بعد میرا جاگنا بھی خواب ہوا
ایہ زندگی اے تے زندگی پھُلاں دی سیج نہیں پر میں زندگی دے ہر اک مرحلے چوں گزریا واں۔ کدی میں خار بنیا تے کدی گلاب۔ پر کیہ کیتا جاوے‘ زمینی حقائق اپنی تھاں نیں۔ اخبار پڑھو تے پڑھیا نہیں جاندا۔ ادب آداب تے پرانیاں گلاں نیں لحاظ تے وضع داری متروک الفاظ نیں۔ نہ کوئی شخصیت محفوظ اے تے نہ کوئی ادارہ۔ پر سوال تے اوہی اے کہ بنیاد وچ ای کوئی اٹ ڈنگی رکھی گئی اے۔ کہ ہن بقول سعدی اس دیوار کو ٹیڑھا ہی جانا ہے۔ کجھ نہ کجھ خرابی تے ہے کہ لمیاں لمیاں زباناں منہ چوں باہر آ رہیاں نیں اوہی جو مولانا روم نے کہیا کہ:
چون عرض آمد ہنر پوشیدہ شد
صد حجاب از دل بسوئے دیدہ شد
اوہناں دے دل دے پردے اکھاں تے ضرور آن پئے کہ سیاستدان دا دل تے انج ہوندا ای نہیں جے ہووے تے پتھر دا ہوندا اے۔ انج ہن سیاست صرف سیاستداناں تک محدود نہیں رہی۔ ایسے طرح سیاست وچ آمریت وڑ آئی۔ اہی کہ کوا ہنس کی چال چلا تو اپنی چال بھول گیا۔ ہن ویکھو ناں کہ کیہ تماشا لگا ہویا اے کہ آپ رسوا ہون دے بہانے لبھے جاندے نیں۔ ساریاں نے اپنا اپنا تماشا لا رکھیا اے۔ لوکاں دی تے ملک دی کسے نوں فکر نہیں۔ کدی کدی انج لگدا اے کہ ملک تے کوئی قابض ہو چکیا اے تے سانوں بربادی ول دھک دتا گیا اے تے قسطاں وچ ماریا جا رہیا اے۔ کدی پٹرول بمب چلایا جاندا اے کدی بجلی دے جھٹکے تے گیس چیمبر وچ پا دتا جاندا ے۔ تسیں اک منٹ لئی خبراں ویکھو‘ شرم آندی اے کہ ایہ ہو کیہ رہیا اے۔ وگڑی شہزادی ججاں تے حملے کر رہی اے تے ہدف الیکشن توں فرار‘ اسیں ویکھدے چلے آ رہے آں کہ نشانہ کدی عسکری ادارے سن تے ہن عدلیہ کوئی چنگی گل نہیں:
اس کے لب پر سوال آیا ہے
یعنی شیشے میں بال آیا ہے
ہر کسے دا کوئی نہ کوئی ٹارگٹ ضرور اے تے حکومت دا ٹارگٹ عوام نیں۔ اپوزیشن پہلاں تے ہے ای نہیں جے احتجاجی پارٹی نوں ویکھیا جاوے تے اوہ وی ابتری توں علاوہ کجھ نہیں پھیلا سکی۔ ذرا دل تے ہتھ رکھ کے کہو کہ کیہ ایہ بہتر اے کہ جدوں چاہو اسمبلیاں توڑ دیو تے ارباں روپیے دا خرچ ملک تے پا دیو۔ کیہ اسیں ایہدے متحمل ہو سکنے آں۔ کیہ اسمبلیاں وچ رہ کے زیادہ چنگے انداز وچ مقابلہ نہیں سی کیتا جا سکدا۔ گل میں کر رہیا سی ٹارگٹ دی تے اوہ ساریاں لئی عوام تختہ مشق نیں۔ ہنے میں پڑھ رہیا سی کہ بلاول جی فرما رہے سن کہ اوہناں دا مقابلہ بیروزگاری تے غربت نال اے۔ شاید انج نہیں پوری حکومت دا مقابلہ غریباں تے بیروزگاراں نال اے۔ دوجا تنخواہ دار سفید پوش جہڑا تھوڑا بہت ذہن تے دانش رکھدا اے اوہنوں بری طرح مدھ کے رکھ دتا گیا اے۔ ہن تعلیم دا مقصد وی فوت ہو گیا اے کہ غریب دا بچہ جیویں تیویں پڑھ کے معمولی ملازمت حاصل کر لیندا اے ہن ملازمت کتھے کہ ہن سرمایہ دار وی اپنے نال نعرے لان والے درباری رکھدے نیں۔ ہزاراں جو سوشل میڈیا تے گند پھیلاندے نیں ساری اخلاقیات توں اوہ بالا نیں۔ مہنگائی دا مقابلہ وی اوہو کرے گا جو پیسے پیدا کرے گا جیویں تیویں اوہ ڈھڈ دی اگ بجھاوے گا۔ شریف بندہ تے مریض بن جاوے گا تے ہن علاج وی سستا نہیں مرنا تک مشکل ہو چکیا اے۔ قبرستاناں وچ وی امیرلوک سمائے نیں۔ مایوسی دی گل نہیں کر رہیا سچ مچ انجدی ای صورتحال اے۔ میں آپ ویکھیا لوکاں نوں اک انڈا تے اک کلو آٹا لیندے۔ وچارے چائے کیہ پین اک پاء دا ڈبہ جہڑا تریہہ روپیے دا آندا سی ہن ستر روپیے دا اے۔ تاجراں نے رہی سہی کسر کڈھ دتی اے۔سبزی والے تک بے رحم ہو گئے نیں کہ جو دل کرے قیمت منگدے نیں۔
کوئی قنون‘ کوئی ضابطہ موجود نہیں تے بنانا سٹیٹ کنہوں کہندے نیں؟ جیل بھرو تحریک چلی تے گمان سی کہ غریب بندے دا فائدہ ہو سکے گا کہ پارٹی ولوں کجھ مدد تے جیل وچ گھٹو گھٹ کھانا تے دو تن ویلے مل جاوے گا۔ پر پولیس والیاں نوں وی عجیب ہدایتاں نیں کہ غریب بندے نوں اوہ پھڑدے ای نہیں۔ پولیس والے وی تے اپنا فائدہ ویکھدے نیں کہ اوہناں توں کیہ ملنا اے سوائے بدبو تے مغلظات دے۔ انج ایہ چال غلط سی کہ تسیں رانا ثناء اللہ توں کجھ اخلاقیات دی توقع کرو۔ جو وی اے حکومت آئی ایم ایف دی مدد کر رہی اے کہ لوکاں توں انج لہو نچوڑیا جا رہیا اے جیویں بھارت توں کیکڑیاں نوں شکنجے وچ کس کے نیلا تیل کڈھدے نیں۔ حیرت دی گل اے کہ جہناں نوں باہر رہ کے پی ٹی آئی لئی احتجاج کرنا سی اوہ آپ ای حکومت دے قابو وچ آ گئے۔ اوہ جہڑے قومی اتحاد دی تحریک سی اوہدے پچھے مذہب دی طاقت سی۔ اوہ تے جیویں کفر دے خلاف جنگ سمجھی جا رہی سی۔ عقیدت تے عقیدے وچ بڑا زور ہوندا اے کہ کوئی موت نوں وی گلے لان لئی تیار ہو جاندا اے۔ ایہ تے بانگے جہے لوگ نویں دور دے نمائندہ دوجی گل‘ پر حقیقت اے کہ رہنما ہمیشہ اگے ہوندا اے۔ قاضی حسین احمد نوں ویکھیا کہ اوہناں تے ڈنڈے برسائے گئے۔ ایدھر اک ڈار صاحب نیں جو ودھ چڑھ کے گلاں کردے سن ہن دبئی جا بیٹھے نیں تے اک ادارہ اوہناں دے پچھے اے۔ اوہ پیپلزپارٹی وانگوں سخت جان نہیں‘ میرا خیال اے کہ کالم سمیٹ دیئے اک شعر دے نال:
بحر رجز میں ہوں نہ میں بحر رمل میں ہوں
میں تو کسی کی یاد کے مشکل عمل میں ہوں