دھرم پورہ وچ دفن اہم شخصیتاں

کجھ لوک لہور نوں باغاں دا شہر تے کجھ کالجاں دا مگر میں مشاہیر دا شہر کہنا واں

مرزا عثمان بیگ

لہور واقع ای لہور اے۔ میں ایہہ گل اکثر کردا رہنا واں۔ کجھ لوک لہور نوں باغاں دا شہر کہندے نیں تے کجھ کالجاں دا مگر میں اوہنوں پہلے دن توں ای مشاہیر دا شہر کہنا واں۔ جنی اہم تے مشہور شخصیات لہور وچ رہیاں نیں۔ شاید ای پاکستان بلکہ دنیا دے کسی ہور شہر وچ رہیاں ہون۔ لہور پنجاب دا سب توں وڈا شہر اے۔ لہور دی تریخ صدیاں اتے پھیلی ہوئی اے۔ لہور توں متعلق بہت سارے واقعات تے جملے مشہور نیں۔
اک جملہ تے تسیں اکثر سن رکھیا ہووے گا کہ لہور لہور اے ‘ جنے لہور نہیں ویکھیا اوہ جمیا ای نہیں وغیرہ۔ لہوردے بارہ بوہیاں اتے تے تقریباً ہر مرخ دی خواہش ہوندی اے کہ کجھ نہ کجھ لکھے۔ کیوں جے کئی سو ورھیاں پہلاں زیادہ تر آبادی اندرون شہر لہور وچ ای واقع سی۔ جتھے صدیاں توں اندرون شہر موجود اے اوتھے صدیاں توں ای اندرون شہر دے آسے پاسے بہت سارے علاقے آباد موجود نیں۔ اوہناں وچوں اک دھرمپورہ دا علاقہ اے۔
جو ورھیاں تے موجود اے تے اک دلچسپ تے گہری تریخ رکھدا اے۔ میں پچھلے اٹھ نو ورھیاں توں شہر لہور دے مختلف علاقیاں تے تریخی عمارتاں اتے ریسرچ کر رہیا واں تے لہور وچ موجود اہم شخصیات دی آخری آرام گاہواں دی تلاش کر رہیا واں ۔ جنی اہم شخصیات لہور شہر وچ موجود نیں شاید ای کدھرے ہور ہووے۔ ایتھے اسیں اوہناں شخصیات دا ای ذکر کرن گے جہناں دی آخری آرامگاہواں میاں میر قبرستان وچ واقع نیں۔ لہور شہر وچ شروع توں ہر علاقے وچ کسی نہ کسی اللہ تعالیٰ دے نیک بزرگ نے ڈیرے پائے ہوئے سن تاں جے اللہ تعالیٰ دا پیغام لوکاں تک پہنچائے۔ ایسے طرحاں دھرمپورہ دے علاقے وچ وی کئی بزرگان دین ویکھن نوں ملدے نیں مگرسب توں بوہتے مشہورحضرت میاں میر بالاپیر نیں۔
تسیں تقریباً سٹھ سال تک لہور وچ تبلیغ کردے رہے۔ تہاڈا سلسلہ نسب 28واسطیاں توں امیر المومنین سیدنا عمر فاروقؓ نال جا ملدا اے۔ تسیں 957 ہجری المقدس بمطابق 1575 نوں پیدا ہووے تے 17ربیع الاول 1045 یعنی 1636 نوں ایس فانی دنیا توں رخصت ہوئے۔ آپ دا عرس ہر سال ربیع الاول دے مہینے وچ منایا جاندا اے۔ تہاڈے عرس وچ نہ صرف مسلمان بلکہ مختلف مذہباں دے لوک شریک ہوندے نیں ۔ آپ دا مزار انفینٹری روڈ دے کول واقع اے۔
اوہدے نزدیک ای مشہور قبرستان میاں میر واقع اے۔ ایتھے اسیں مختصر کجھ مشہور شخصیات دا ذکر کراں گے جہناں دی تدفین میاں میر قبرستان وچ واقع اے۔ اکبر لہور ی مشہور شاعر ادیب مصنف اکبر لہوری 5جولائی 1910نوں چودھری ابراہیم دے ہاں پیدا ہوئے۔ آپ اسسٹنٹ سیکرٹری پنجاب اسمبلی رہے۔ آپ دی مشہور کتاباں وچ موج تبسم تے اکبر دی کہانیاں مشہور نیں۔
آپ24 ستمبر 1976 نوں لہور وچ وفات پائی تے آپ دی آخری آرامگاہ میاں میر قبرستان وچ واقع اے۔ اداکار محمد علی پاکستان فلم انڈسٹری دے مشہور اداکار محمد علی جو لوکاں وچ علی بھائی دے نام توں مشہور سن۔ تسیں 19 اپریل 1931 نوں لہور وچ وفات پائی تے آپ دی آخری آرام گاہ میاں میر قبرستان وچ واقع اے۔
اداکار محمد علی پاکستان فلم انڈسٹری دے مشہور اداکار محمد علی جہڑے لوکاں وچ علی بھائی دے نام توں مشہور سن۔ آپ 19 اپریل 1931 نوں سید مرشد علی دے ہاں پیدا ہوئے۔ اک اندازے دے مطابق آپ نے تن سو توں ودھ فلماں وچ کم کیتا۔ آپ مشہور اداکارہ زیبا دے شوہر سن۔ آپ نے علی زیب دے نام توں اک فائونڈیشن وی بنائی۔ آپ دے نام اتے گلبرگ لہور وچ علی زیب روڈ وی واقع اے۔ آپ دے گھر دے باہر علی زیب دے نام دی تکتی لگی اے۔
تہاڈی مشہور فلماں وچ چراغ جلتا رہا‘ آگ کا دریا‘ انصاف اور قانون تے سلاخیں مشہور نیں۔ تسیں 19مارچ 2006 نوں وفات پائی۔ تہاڈی آخری آرامگاہ احاطہ حضرت میاں میر محمد واقع اے۔
شوکت خانم دے مشہور کرکٹر پچھلے کپتان پاکستان کرکٹ تیم تے پچھلے وزیراعظم چیئرمین تحریک انصاف عمران خان دی والدہ شوکت خانم 1921 نوں جالندھر وچ پیدا ہوئیاں۔
تہاڈا تعلق جالندھر دے پڑھے لکھے گھرانے نال سی۔ تہاڈا ویاہ اکرام اللہ خان نیازی نازل ہویا۔ تہاڈی وفات 10فروری 1985 نوں کینسر نال ہوئی۔ تہاڈی آخری آرام گاہ خاندانی احاطہ افغاناں جالندھر وچ واقع ای۔ تہاڈے نام تے شوکت خانم کینسر ہسپتال پاکستان دے کئی شہراںوچ واقع اے جتھے کینسر دے مریضاں دا مفت علاج کیتا جاندا اے۔ ڈاکٹر جہانگیر خان منے پرمنے ماہر تعلیم عظیم کرکٹر جہانگیر خان 27ستمبر 1909نوں پیدا ہوئے۔
تسیں مشہور بیٹسمین ماجد خان دے والد تے پچھلے وزیراعظم عمران خان دے ماموں سن۔
تسیں متحدہ ہندوستان دی اولین کرکٹ ٹیم دے رکن سن۔ اوہناں دی گیند نال چڑیا دی ہلاکت دا مشہور واقعہ پیش آیا۔ تسیں زمیندار انٹرکالج گجرات دے پہلے پرنسپل سن۔ تسیں ڈائریکٹر ریسرچ سوسائٹی آف پاکستان وی رہے۔ تسیں 23جولائی 1988 نوں لہور وچ وفات پائی۔ تہاڈی آخری آرامگاہ میاں میر قبرستان وچ واقع اے۔ کرکٹر عبدالقادر پچھلے ٹیسٹ کرکٹر عبدالقادر ساری عمر دھرمپورہ دے علاقے وچ رہے۔
تہاڈی رہائشگاہ انفنٹری روڈ اتے واقع اے۔ تسیں 15 ستمبر 1955 نوں لہور دے علاقے دھرمپورہ وچ پیدا ہوئے۔ حال ای وچ تہاڈا نام پی سی بی دی ہال آف فیم دی لسٹ وچ شامل کیتا گیا اے۔ تہاڈے نام تے لہور دا قذافی سٹیڈیم دا گیٹ نمبر4وی اے۔ تسیں پاکستان کرکٹ بورڈ دے چیف سلیکٹر وی رہے۔ تسیں مشہور کرکٹر عمر اکمل دے سسر تے عثمان قادر دے والد او۔ تہانوں 1988 نوں پرائیڈ آف پرفارمنس 2020وچ ستارہ امتیاز نال نوازیا گیا۔ تہاڈا انتقال 6دسمبر 2019 نوں لہور وچ ہویا۔
تہاڈی آخری آرامگاہ میاں میر قبرستان وچ واقع اے۔ انسپکٹر نوید پنجاب پلس دے دبنگ انسپکٹر نوید سعید دا تعلق وی دھرمپورہ توں سی۔ تسیں 24جولائی 1963 نوں پیدا ہوئے۔ تسیں اک دلیر نڈر تے جرات مند قابل پلس افسر سن۔ تسیں مشہور انکائونٹر سپیشلسٹ سن۔
تسیں کئی وجوہات تے واقعات دی وجہ نال خبراں دی سرخیاں وچ رہندے۔ اک واری تسیں پاکستان پیپلز پارٹی دے ایم پی اے سلمان تاثیر نوں گرفتار کرن دی کوشش کیتی تے مزاحت تے چپیڑ مار دتی جہدا اخباراں وچ کافی چرچا رہیا۔
تسیں اپنے دوستاں دے نال 10نومبر 2005وچ فائرنگ نال ہلاک ہوئے تے تہاڈی آخری آرامگاہ قبرستان میاں میر وچ واقع اے۔ ایس طرحاں مولوی غلام نوری‘ چیف جسٹس سردار محمد اقبال‘ اداکار جاوید حسن‘ غیور اختر‘ شیخ اکرم‘ بریگیڈیئر حامد نواز تے کئی اہم شخصیات دی آخری آرامگاہواں دھرمپورہ دے علاقے وچ واقع نیں۔