آئین، جمہوریت تے قوم نا ل مخول

مظہر برلاس

پاکستان وچ پچھلے یاراں مہینے توں اک اجیہا کھیڈ جاری اے جنہوں ملک و قوم‘ آئین تے جمہوریت دے نال مخول ای کہیا جا سکدا اے۔ یاراں مہینے پہلاں ساڈی اسٹیبلشمنٹ توں اوہو غلطی ہوئی جہڑی 1971ء وچ ہوئی سی۔ اوس ویلے 81 سیٹاں والے بھٹو نوں اکثریت دی نفی کرکے وزیراعظم بنا دتا گیا سی۔ ایس واری وی 55 سیٹاں رکھن والے نوں وزیراعظم بنا دتا گیا تے اکثریت والے نوں اقتدار توں محروم کر دتا گیا۔ پیسے دے منہ زور گھوڑے دے راہیں رچائے جان والے ایس کھیڈ وچ کیہ لوکاں نے نہیں ویکھیا کہ کس طرح 20 ارکان نوں ہوٹل وچ رکھیا تے فیر اوہناں نوں سندھ ہائوس منتقل کر دتا گیا۔ کس طرح سرکاری افسران ارکان دا تحفظ کردے رہے حالاں کہ ایہ ارکان ضمیرفروش سن بھگوڑے سن یاں لالچی سن پر اوہناں دے کردار بے وفائی وچ ضرور لپٹے ہوئے سن۔ اصل وچ ایہ اوہ مرحلہ سی جدوں زور تے زر اکٹھے ہو گئے سن۔ جدوں زور تے زر اکٹھے ہو چکے سن تے فیر اوہناں دے سامنے بند کون بنھ سکدا سی؟ ایس جنج وچ مولوی‘ قاضی تے مافیا سارے شامل ہو گئے۔ وِکن والے وی عجیب سن ایہناں وچوں اک خاتون مبینہ طور تے اوہ سی جہدے دادا نے پاکستان دے خلاف ووٹ دتا سی۔ ایسے ووٹ دی وجہ نال انڈیا نوں کشمیر جان لئی راہ ملیا۔
47ء وچ ونڈ ویلے صوبے تقسیم ہوندے تے ویکھے سن پر ضلعے تے تحصیلاں تقسیم ہوندے نہیں سن ویکھیاں پر ایس اک ضمیرفروش دی وجہ نال ضلع گورداسپور تقسیم ہو گیا تے بھارت نوں کشمیر ول جان دا مستقل راہ مل گیا۔ پچھلے ورھے ضمیر فروشاں دے ایس 20 رکنی ٹولے وچ اک ہور خاتون وی شامل سی جہناں دی شادی دے کجھ مہینے بعد پارلیمنٹ لاجز وچ گولیاں چل گئیاں سن تے نوبت طلاق تے مقدمے تک اپڑ گئی سی۔ انج کیوں ہویا ایہ کہانی فیر سہی۔ 20 دے ایس ٹولے وچ اک پہلوان نما بندہ وی سی اوس بندے دا ناں راجا ریاض اے۔ ایہ بندہ پاکستان دی جمہوریت دے منہ تے زوردار طماچہ سی کیوں جے وکن دے بعد ایس بندے نوں اپوزیشن لیڈر بنا دتا گیا ایس طرح پاکستان وچ وزیراعظم تے اپوزیشن لیڈر اک ای بیڑی دے سوار بن گئے۔ وزیراعظم دا تعلق ن لیگ نال اے جد کہ اپوزیشن لیڈر ن لیگ دا امیدوار اے۔ ہونا تے ایہ چاہیدا سی کہ ساڈی جمہوریت ایہناں 20 اراکین نوں دھکے دے کے پارلیمنٹ چوں کڈھ دیندی تے لوک ایہناں 20 ضمیر فروشاں نوں منہ نہ لاندے۔
ایہ کیہو جہی جمہوریت اے جو جمہور دا خیال ای نہیں کردی جہدے وچ اک ضمیرفروش نوں اپوزیشن لیڈر بنا دتا جاندا اے تے ساڈی پارلیمنٹ اوہدی رکنیت نوں بحال رکھدی اے۔ ایہ ووٹ دے نال مخول اے تے قوم دی توہین اے۔ قوم دے نال 75 ورھیاں توں مذاق جاری اے۔ اک ای فلم دے پردے بدلے جاندے رہے تے لٹ مار دا کھیڈ جاری رہیا۔ ایتھے کجھ خاندان امیر توں امیر ہوندے گئے تے ملکی عوام غریب توں غریب ہوندے گئے۔ ایس کھلواڑ نے لوکاں دے ہتھ خالی کر دتے تے پچھلے یاراں مہینے توں پرانے کھڈاری لوکاں دے منہ چوں آخری لقمہ وی کھوہن دی کوشش کر رہے نیں۔ لوکاں نوں مہنگائی دی چکی وچ پیہہ کے رکھ دتا گیا اے۔ لوکاں دے سراں تے غربت دی تیز چلچلاندی دھپ اے تے افسوس ایہہ وے کہ سامنے کوئی سایہ دار رُکھ وی نہیں۔ ایس ملک دا وزیرخزانہ لوکاں نوں خواب وکھا رہیا اے بھلا اوہ بندہ لوکاں لئی کیہ کر سکدا اے جہنوں مبینہ طور تے جھوٹ بولن تے آئی ایم ایف ولوں سٹھ لکھ ڈالر جرمانہ کیتا گیا سی۔
پر دوستو! ایس واری قوم دھوکھے وچ آن لئی تیار نہیں۔ ایس واری لوک سراب نوں سراب ای سمجھدے نیں۔ ایس واری انھیرے نوں روشنی نال نہیں جوڑیا جا سکدا۔ ایس واری لوک اگ وچ سڑن لئی تیار نہیں سگوں الائو بجھان تے بضد نیں بھاویں اوہدے وچ جاناں ای کیوں نہ چلیاں جان۔ زور تے زر جہنوں بے عزت کرن تے تلے ہوئے نیں تقدیر اوہنوں قوم دے راہیں عزت بخش رہی اے۔ حکمراناں دی ہر چال الٹی پیندی جا رہی اے تے جہنوں کڈھیا گیا سی اوہدے راہ سدھے ہوندے جا رہے نیں۔ ایس واری قوم جمہوریت دے ناں تے مخول برداشت کرن لئی تیار نہیں۔ شعور آندے آندے 75 ورھے لگ گئے ہن اوس قوم نوں دھوکھا دینا اوکھا ہو گیا اے۔
ساڈے آئین دے پہلے چالھی آرٹیکل انساناں دے بنیادی حقوق دی ترجمانی کردے نیں پر افسوس کہ ایہناں آرٹیکلز نوں کدی ویکھیا ای نہیں گیا۔ جنہے ویکھن دی کوشش کیتی اوہنوں کڈھ دتا گیا تے اقتدار دی چھری پرانے قصائیاں دے ہتھاں وچ دے دتی گئی۔ اوہناں نے یاراں مہینیاں وچ ای قوم دی چمڑی لاہ کے رکھ دتی اے۔ اوہناں نے آئین دے نال وی مخول شروع کر رکھیا اے۔ جدوں آئین وچ لکھیا اے کہ الیکشن 90 دیہاڑیاں وچ ہون گے تے فیر ایہ حجتاں توں کم لینا‘ بہانے گھڑنا‘ بددیانتی کرنا‘ جھوٹ بولنا‘ ظلم کرنا‘ لوکاں تے تشدد کرنا آئین دی توہین نہیں تے ہور کیہ اے؟ ایتھے مشرق دی روایات سن پر آڈیو ویڈیو سنٹر اوہناں نوں وی کھا گئے۔ حضرت علیؓ ہوراں دا قول اے کہ خواہشاں بادشاہواں نوں غلام بنا دیندیاں نیں تے صبر غلاماں نوں بادشاہ بنا دیندا اے۔ پچھلے یاراں مہینے دی حکمرانی ویکھ کے غالب یاد آ گئے:
کہیں سے زہر کا تریاق ڈھونڈنا ہو گا
جو پھیلتا ہی چلا جا رہا ہے سینوں میں
یہ لوگ اس کو ہی جمہوریت سمجھتے ہیں
کہ اقتدار رہے ان کے جانشینوں میں
یہی تو وقت ہے آگے بڑھو خدا کے لئے
کھڑے رہو گے کہاں تک تماش بینوں میں