زلزلے دے اثرات توں بنچ وی ٹُٹ گیا

طلعت عباس خان

2005ء دے بعد مارچ 2023ء وچ اک واری فیر خوفناک زلزلے نے جڑواں شہراں نوں گھیر لیا جہدے نال پنڈی‘ اسلام آباد کنب گیا۔ زمین اک منٹ تک ہلدی رہی۔ ایس طرح لگا جیوی ںکسے ڈھگے نے زمین نوں سنگھاں تے چک کے گھما دتا ہووے۔ زلزلے نال ایڈا کوئی نقصان تے نہ ہویا پر اوس ویلے توں سپریم کورٹ وچ زلزلے دے اثرات وکھائی دے رہے نیں بنچ بار بار ٹُٹ رہیا اے جہدے نال مالی تے جانی نقصان تے نہیں ہویا پر شہرت نوں ڈاڈھا نقصان اپڑ رہیا اے۔ مارچ والے زلزلے وچ اوس دن فیملی دے نال اسلام آباد دی اچی عمارت دے دوجے فلور تے سی۔ ہر کوئی اپنی جان بچان لئی سب کجھ چھڈ کے نس رہیا سی۔ اجہے وچ نیک دل لوک اک دوجے دی مدد کردے رہے۔ بزرگاں نوں غیراں نے موڈھیاں تے چکدے ویکھیا۔ زلزلے دی شدت 6.5 توں ودھ سی۔ ویکھیا جاوے تے ایہ قدرتی آفات انساناں نوں یاد دہانی کران آندی اے کہ اے انسان ایہ دنیا عارضی اے ایتھے دل نہ لگا‘ میں اک منٹ وچ بے گھر کر سکنا واں۔ ساڈے وچ زیادہ گنتی اجہے لوکاں دی اے جہناں نوں دِلوں ایہ یقین نہیں کہ ایہ دنیا عارضی اے۔ وقتی طور تے اللہ دا ورد کرنے آں پر اللہ توں ڈردے نہیں۔ ایہناں وچ شمار اجہے لوکاں دا اے جہڑے پڑھے لکھے کہلاندے نیں۔ ایہ وی ہر اوہ کم کردے نیں جہدے نال دوجیاں دی زندگیاں تنگ ہو جاندیاں نیں تے ایہ چار پیسے بنا لیندے نیں۔
دنیا والے سائنس وچ ترقی ایس لئی کردے نیں کہ دوجے انساناں لئی سوکھتاں پیدا ہون جد کہ اسیں سائنس توں فائدہ چک کے ددھ جعلی طریقے نال بنانے آں۔ مجھ نوں ددھ زیادہ لین لئی ٹیکے لانے آں ایس لئی کہ دولت وچ وادھا ہووے۔ ڈاکٹر بن کے گردیاں دا کاروبار کرنے آں۔ عام بندہ ملاوٹ کردا اے‘ جھوٹ بولدا اے۔ وڈے عہدے رکھن والے حلف چک کے پاسداری نہیں کردے‘ سیاستدان جھوٹ بولدے نیں‘ قوم نوں سبزباغ وکھاندے نیں۔ ایہ سب کجھ کر کے عمرہ تے حج کر آندے نیں سمجھدے نیں کہ جو کجھ گناہ کیتے سن اوہ انج کرن نال معاف ہو جاندے نیں۔ پڑھے لکھے تے ان پڑھ سارے اک صف وچ کھڑے نیں۔ واردات ہر اک دی وکھری ہوندی اے۔ ایہدے وچ سارے سگوں علماء سارے شامل نیں۔ ایہ سب کجھ ایس لئی کردے نیں کہ ایہ نہ خدا توں ڈردے نیں تے آئین نہ ملکی قنون توں‘ کوئی وی اپنے کیتے تے شرمندہ نہیں ہوندا شاید ایس لئی کہ اسیں دنیا دے اجہے خطے وچ واقع آں جتھے غلطیاں تے شرمندہ ہونا لکھیا نہیں جتھے اک عمرہ کرن نال سارے گناہ معاف ہو جاندے نیں۔
دنیا وچ ایس ویلے ساڈی عدلیہ دا 126 واں نمبر اے پر کیہ مجال کہ ایہدی بہتری تے کسے نے سوچیا ہووے یاں ایہدی بہتری لئی کم کیتا ہووے۔ ہن تے اعلیٰ عدلیہ دے اندر دے اختلافات کھل کے سامنے آ چکے نیں۔ ماضی دے غلط فیصلیاں دی وجہ نال تبصرے ہر کوئی کر رہیا اے گروپ بندی وکھائی دے رہی اے۔ ہر فیصلے توں پہلاں بنچ نوں ویکھ کے عام بندہ وی دس دیندا اے کہ فیصلہ کیہ آوے گا؟ الیکشن بحران وچ عدلیہ نے سوموٹو لیا۔ حکومت رولا پاندی رہی کہ ایہدے لئی لارجر بنچ بنایا جاوے پر انج نہ ہویا۔ 9 رکنی بنچ ٹٹ گیا تے پنج رکنی بنچ نے چھیتی نال فیصلہ سنا دتا جہدے نتیجے حکومت نے تے الیکشن کمیشن نے نہیں منے۔ الیکشن کمیشن نے کافی سوچ وچار دے بعد فیصلہ دتا کہ پورے ملک وچ الیکشن اکٹھے اٹھ اکتوبر نوں کرائے جان گے۔ الیکشن نہ کران دی وجہ وی دسے پر میں نہ مناں دی رٹ لان والیاں نے اک واری فیر عدالت دا بوہا کھڑکایا۔ ہن عدلیہ دا بوہا کھل چکیا اے ہن گیند عدلیہ دے کورٹ وچ اے جنہوں کھیڈن لئی پندراں رکنی ٹیم نوں دفاع کرنا چاہیدا سی تے نتیجے سارے من لیندے۔ پر اک واری فیر پنج دا بنچ بنیا تے فیر ٹُٹ گیا۔ نواں بنچ بنے گا‘ ہن وی اٹارنی جنرل تے دوجیاں جماعتاں دے نمائندیاں نے لارجر بنچ دی درخواست کر رکھی اے پر اوہناں دی ایہ درخواست بیکار وکھائی دے رہی اے۔ دوجے پاسے حکومت نے ایہ ضروری سمجھیا کہ سپریم کورٹ دے رولز وچ تبدیلی کیتی جاوے تاں جے سوموٹو وچ ون مین شو دا خاتمہ ہووے۔ قنون دے پاس ہو جان نال سوموٹو دے کیساں وچ اپیل کیتی جا سکے گی۔ ایس توں پہلاں انج نہیں سی جہدا نقصان سیاستداناں تے عام شہریاں نوں ہویا۔ماضی وچ ساڈی عدلیہ زوال پذیر رہی اے ایہدے قصوروار ساڈے ماضی دے چیف جسٹس صاحبان نیں۔ جہناں نے قنون دے مطابق فیصلے نہیں سن لکھے آپ تے ایہ لکھ کے چلے گئے پر اوہناں دے فیصلے اوہناں دی یاد دواندے رہندے نیں۔ ایس نویں قنون دی وجہ نال تریہہ دن دے اندر اپیل کیتی جا سکے گی۔
وفاقی حکومت نے وکلاء پروٹیکشن ایکٹ 2023ء منظور کر لیا اے جہدے نال وکیلاں نوں حقوق مل گئے نیں جہناں دی خواہش وکیل رکھدے سن۔ جہدے تے پی ڈی اے تے اعظم نذیر تارڑ مبارکباد دے مستحق نیں۔ جتھے حکومت نے سپریم کورٹ دے رولز تے کم کر وکھایا اوہو اوہناں نوں چاہیدا سی کہ ججاں دی سلیکشن تے وی بل پاس کرا لیندے تے بڑا چنگا ہوندا۔ اجے تک انگلیاں ججاں تے اٹھ رہیاں نیں تے ایہدی وجہ ایہہ وے کہ اوہناں دی سلیکشن دے طریقے کار توں کوئی خوش نہیں۔ سارے ججاں دی سلیکشن توں پہلاں تے سلیکشن دے ہر سال اوہناں دے جسمانی تے نفسیاتی چیک اپ گھٹو گھٹ پنج رکنی سینئر ڈاکٹراں توں کرایا جانا ضروری اے۔ اوہناں دے ہر سال اثاثے تے بینک دی تفصیل شو کیتی جاوے کہ کیہ سن تے ہن کیہ نیں۔ چیف جسٹس صاحب بنچ بنان توں پہلاں سارے ججاں نال صائب مشورہ کر لیندے تے انج نہ ہوندا۔ بہرحال جو کجھ ہو رہیا اے ٹھیک نہیں ادارے تے انگلیاں اٹھ رہیاں نیں۔ اللہ ساڈے حال تے رحم فرمائے۔٭