پی ٹی آئی دی ناقابلِ معافی مہم

ایس نال عوام وچ مایوسی وی ودھ ہُندی جا رہی اے جیہڑی کسی صورت وی نیک شگون نہیں

رابعہ رحمن

پاکستان مسلسل مسائل تے غیر یقینی دا شکار اے۔ خطریاں دے نال عوام وچ مایوسی وی ودھدی جا رہی اے جوو کسی وی صورت نیک شگون نہیں۔ ویسے تے اپنی آزادی دے 76ورھیاں دے دوران بیشتر ویلے اسیں مسائل تے مشکلاں دا شکار ای رہے آں جہہناں دی کوئی وجوہات نیں مگر اج کل ایہناں مسائل دی نوعیت وکھری اے۔ اج سانوں بیرونی خطریاں توں ودھ اندرونی خلفشار دا سامنا اے۔ پاکستان دی جوہری صلاحیت تے ساڈی فوجاں دی پیشہ وارانہ مہارت دے کارن ہن بیرونی دشمن لئی سانوں روایتی طور تے ٹارگٹ کرنا آسان نہیں تے ایسے وجہ نال ہن دشمن دی بھرواں کوشش اے کہ اوہ سانوں اندرونی طور تے کمزور کرے جہدے وچ اوہ ہن کافی حد تک کامیاب نظر آندا اے۔کوئی وی بیرونی دشمن ایسا اوس ویلے تک نہیں کر سکدا جدوں تک اوہنوں اندرونی طور تے ایسے لوک نہ مل جان جہڑے اوہدے سہولت کار ہون۔ بدقسمتی نال ملک دے اندر اک شدید سیاسی عدم استحکام اے تے سیاست ہن مخالفت توں ودھ کے دشمنی تے ذاتیات تک آ گئی اے۔ ساڈے سیاسی رہنما بالخصوص پچھلے وزیراعظم تے پاکستان تحریک انصاف دے سربراہ عمران خان جہناں دی ساری سیاست ای محاز آرائی تے تنازعات اتے مشتمل اے اوہ ملک وچ ایس شدید سیاسی عدم استحکام دی بنیادی وجہ نیں۔ اج کل بھارت دا میڈیا تے رائے عامہ نوں ہموار کرن والے دوجے ادارے تے شخصیات عمران خان تے اوہناں دی جماعت دے گن گاندے نظر آندے نیں۔ دشمن نوں ہور کیہ چاہیدا اے کہ جہڑا کم کوشش تے بھرواں سازشاں دے باوجود اوہ اج تک کامیابی نال نہیں کر سکیا اوہ ساڈے اندروں ای کجھ لوک کردے نظرآ رہے نیں۔ دشمن دا ہمیشہ ای توں ہدف پاک فوج تے ساڈا معاشرتی نظام رہیا اے۔ اج پاک فوج تے اوہدی قیادت دے خلاف اک گندی ترین تے ناقابل معافی مہم چلائی جا رہی اے تے ایسے طرحاں قوم دی اخلاقی اقدار تباہ کیتیاں جا رہیاں نیں۔ آرمی چیف جنرل عاصم منیر دے خلاف اک غلیظ مہم چلائی جا رہی اے دے بدقسمتی نال چلان والے کوئی ہور نہیں ساڈے اپنے ای نیں۔ایس مہم دے روح رواں عمران خان تے اوہناں دے حواری نیں۔ تحریک انصاف دا سوشل میڈیا سیل فیک اکائونٹ کھول کے ایس مہم وچ خوب حصہ پا رہیا اے۔
پچھلے دناں لندن تے واشنگٹن وچ باقاعدہ مظاہرے وی کیتے گئے جہناں وچ مٹھی بھر لوکاں نے تحریک انصاف دے جھنڈے چک کے فوج تے سپہ سالار دے خلاف شرمناک تے ناقابل معافی نعرے لائے تے پلے کارڈ چک کے اوہناں اتے درج انتہائی شرمناک نعرے دنیا نوں وکھائے۔ ایس حرکت دی نہ صرف بھرواں مذمت کیتی جانی چاہیدی اے بلکہ ایس گھنائونے فعل وچ شامل افرد تے اوہناں دے پاکستان وچ بیٹھے سہولت کاراں تے رہنماواں نوں قنون دے کٹہرے وچ وی لیانا چاہیدا اے۔ شرمناک گل تے ایہہ اے کہ عمران خان جو ساڈے تن سال تک ملک دے اعلیٰ ترین انتظامی عہدے اتے فائز رہے اوہناں ولوں ایس شرمناک مہم تے اک لفظ وی نہیں بولیا گیا بلکہ جدوں ایس سلسلے وچ کجھ افراد نوں قنون دی گرفت وچ لیان دی کوشش کیتی گئی تے اوہ الٹا اوہناں دے نال اظہار یکجہتی کردے نظر آئے۔ پی ٹی آئی دا سوشل میڈیا سیل ریاست تے اوہدے اہم ترین اداریاں دے خلاف ایس منظم مہم دا ہر اول دستہ اے۔ لوکاں دے ذہناں نوں آلودہ کیتا جا رہیا اے تے نشانہ بالخصوص نوجوان تے پڑھے لکھے لوک نیں جہڑے پاکستان دا مستقبل نیں۔
اج پاکستان نوں شدید ترین خطرات دا سامنا اے تے پاکستان فوج تے اوہدی قیادت نوں ایس طرحاں نشانہ بنانا کھلی ملک دشمنی اے۔ پاک فوج ساڈی بقا تے سلامتی دی علامت اے۔ بھارت سنے پاکستان دے سارے دشمن ساڈی فوج کولوں خوفزدہ نیں۔ فوج وچ کمان نوں مرکزی حیثیت حاصل ہوندی اے تے کمان دے متعلق بدگمانی پیدا کرن دی کوشش اک جرم اے جہدی کوئی معافی نہیں۔ اک وڈی سیاسی جماعت جو ملک دی حکمران وی رہ چکی اے ولوں اپنی سیاست چمکان لئی ایس طرحاں دی غلیظ مہم چلانا دراصل دشمن دے ایجنڈے نوں اگے ودھان دے مترادف اے۔ بدقسمتی نال ایس مہم وچ کجھ ریٹائرڈ آرمی افسر وی شامل نیں جہناں وچوں کجھ بیرون ملک بیٹھ کے ایہہ کم کر رہے نیں۔ ایس طرحاں دے شرمناک کرداراں نوں نشان عبرت بنانا چاہیدا اے۔ ایہہ سب بظاہر تے سیاست تے جمہوریت دے نام تے کیتا جا رہیا اے مگر اوہدے پچھے دشمن دا باقاعدہ ہتھ اے۔د نیا وچ کدھرے ہور ایسی مثال نہیں ملدی کہ اک سیاسی جماعت اپنی ای فوج دے خلاف بیرون ملک ایس طرحاں دی مہم چلاوے۔
اج بھارت دا میڈیا ایس طرحاں دی خبراں نوں ودھا چڑھا کے پیش کر رہیا اے کیوں جے ایہہ اوہ کم اے جہڑا اوہ کوشش دے باوجود نہیں کر سکیا۔ ایس مہم وچ بنیادی کردار نوجواناں نوں دتا گیا اے جد کہ کجھ نام نہاد صحافی وی ایہدے وچ شامل نیں۔ ایس طرحاں نوجواناں نوں ملک دی فوج بارے بدظن کرنا وطن دشمنی اے کیوں جے ایہناں نوجواناں نے اگے چل کے ملک دی باگ ڈور سنبھالنی اے۔ فوج دے جواناں تے نوجوان افسراں دا مورال وی ایس توں متاثر ہوندا اے جہدے توں اوہ اپنے فرائض منصبی ایس طرحاں ادا نہیں کر سکدے۔ لوڑ ایس امر دی اے کہ ایس شرمناک مہم نوں فی الفور روکیا جاوے تے سارے زمہ داراں دے خلاف آئین تے قنون دے مطابق سخت ترین کارروائی کیتی جاوے۔ ایہنوں سیاست یا مخالفت سمجھ کے درگزر کرنا وی انتہائی خطرناک ہووے گا‘ ایہہ نہ تے شخصی آزادی دے زمرے وچ اندا اے تے نہ ای ایہدا کوئی تعلق بنیادی انسانی حقوق نال اے۔