غربت، بسنت تے کرکٹ

سعد اللہ شاہ

میرے بازو نہیں رہے میرے
لو مرا آخری سہارا گیا
اور پھر میری قیمت وصول ہوتے ہی
سعد دشمن پہ مجھ کو مارا گیا
قیمت تے کدوں دی وصول ہو چکی کہ تہاڈے کیس ختم ہو گئے تے طفل تسلیاں وی تہانوں مل گئیاں پر عوام رُل گئے تے سانوں کمل طور تے آئی ایم ایف دے حوالے کر دتا گیا جو اجے وگڑی دلہن وانگوں ہور کجھ منگدی اے۔ اوہدے منہ نوں خون لگ چکیا اے بار بار اک ای گل کہ اسیں کسے نوں ملک تباہ نہیں کرن دیاں گے بابا اوہ تے برباد ہو چکیا اے۔ تسیں کہندے او عدلیہ سنے ہر ادارہ تقسیم ہو چکیا کوئی نویں گل کرو۔ ایہ کڑوا سچ اے یاں کڑوی حقیقت‘ اغماض دی قیمت رشوت توں اڈ کیہ اے فی النار۔ گل کڑوی ضرور اے پر دل کٹیا ہویا اے کسے وی ریاست تے حکومت کرن والا امن و امان تے معاشی صورتحال دا ذمہ دار ہوندا اے حوالے سارے ای حضرت عمرؓ دے دیندے نیں تے زیرعتاب آن تے استعارا کربلا نوں بنا لیندے نیں اپنی اوقات نہیں ویکھدے تسیں نہ تخت دے قابل تے تختہ دے۔ دل دکھدا اے کہ جدوں حالات ول دھیان جاندا اے۔ سویرے سویرے گھر دی گھنٹی وجی تے میں باہر آیا اک برقع پوش خاتون نے نظراں اک پاسے کردے ہوئے کہیا جی رات دا کوئی کھانا بچیا ہووے گا دل ای تے کٹ گیا۔ سفیدپوش کتھے جان کیہ مر جان میں واپس آیا تے میری بیگم نے کجھ کھانا پیک کر دتا پر اوہ خاتون اک خراش دماغ تے پا گئی ایہ مکار جو مگرمچھ دے اتھرو کیردے نیں ایہ جہناں نوں اک روپیہ ودھن تے دل تے تیر لگدے سن ہن نویاں کہانیاں گھڑدے نیں۔
مینوں پتہ اے میں تہانوں مغموم کر دتا اے پر کیہ کیتا جاوے جو نظر آندا اے اوہ کجھ ہور نظر نہیں آن دیندا۔ ہائے ہائے اللہ تو اللہ اے جنہے سارا علم تخلیق کیتا تے اوہ اذہان و دل وی جو ایہنوں اندر اتار لیندے ینں اللہ کہندا اے جاہل اوہناں نوں غنی سمجھدا اے کہ اوہ سوال کرن والے نہیں ہوندے تے نہ اوہ لپٹ کے منگدے نیں۔ اجہے پیارے لوک وی نیں پیسے اگے کرکے کہندے نیں جنی ضرورت اے لے لوو‘ سبحان اللہ۔ چلو میں موضوع بدلنا واں پر تلخی تے ہر شے دے اندر موجود اے۔ میرا موضوع پی ایس ایل میچ نہیں سگوں بابراعظم نیں کہ جنہے شاندار اننگز کھیڈی تے 64 رنز سکور کیتے میں تہانوں ایہ وی دسدا جاواں کہ بابر نے 2020ء وچ تیز ترین 9000 رنز دا ریکارڈ وی قائم کر دتا اے ویکھیا جاوے تے اوہ اپنی من مانیاں دے باوجود ٹیم وچ ریڑھ دی ہڈی اے اجہے پلیئر روز روز پیدا نہیں ہوندے ساری عرض دے بعد کہنا ایہ وے کہ ساڈے ایس پیارے کھڈاری دے نال نجم سیٹھی نے چھیڑچھاڑ شروع کر رکھی اے اوہ کسے طرح ایس کھڈاری نوں غصہ چڑھا رہیا اے کہ اوہ کوئی غلط قدم اٹھائے اوہنوں نظرانداز کیتا جا رہیا اے میں سوچنا واں کہ نجم سیٹھی دا کرکٹ نال کیہ تعلق اوہ سراسر سیاسی بندہ اے ایہدے وچ وی کوئی حرج نہیں پر ٹیم دا ستیاناس کیوں کر رہیا اے۔
چلو اک ہور موضوع تے گل کرنے آں اوہ شادباغ وچ چھ سالہ بچے علی حیدر دی پتنگ بازی پاروں موت‘ ہائے ہائے ایس بچے نے اپنے والد دے ہتھاں وچ تڑپ تڑپ کے جان دتی اصل وچ اسیں آپ وی اپنے دشمن آں کجھ لوک اجہے سانحے تے کہندے نیں لوک انج وی تے ایکسیڈنٹ وچ مر جاندے نیں۔ مرن تے مارن وچ بڑا فرق اے بسنت دا نتیجہ ساریاں نوں پتہ اے کہ تیزدھار والی ڈور گنجان آباد شہراں وچ دھوناں تے کٹے گی پولیس بالکل بے بس اے یاں فیر اوہ وقت تے کاروائی نہیں کر رہی چنگی گل کہ محسن نقوی نے ایہدے تے سخت غصے دا اظہار کیتا اے تے پتنگ بازاں تے کاروائی کرن دا حکم دتا اے۔ ایس حوالے نال شہبازشریف نے ضرور کنٹرول کیتا سی پر اوہ تے وزارت عظمیٰ وچ چلے گئے جو اوہناں دے وَس دی گل نہیں۔ تہانوں جے بسنت دا شوق زیادہ ستا رہیا اے تے شہر توں باہر کھلے میدان وچ چلے جائو۔ تسیں ایس توں اگے وی جس خبر نوں ہتھ پائو گے اوہ کرنٹ بن کے ای تہانوں لگے گی اک تے کرایہ ودھ رہیا اے کہ ٹرانسپورٹراں نے اعلان کر دتا اے پر ایس توں پہلاں سجری خبر ایہہ وے کہ تن روپیے 23 پیسے فی یونٹ بجلی ودھ گئی اے کم دوآتشہ ہو جاوے گا کہ اک تے گرمی وچ پکھیاں دے بناں گزارا نہیں یاں فیر صاحبان حیثیت اے سی چلان گے ایہدے تے مُل دا مہنگا ہونا جیویں ایہ سن کے ای مڑھکے آ گئے ہون گے ایہ وی ٹھیک کہیا جا رہیا اے کہ چوری ودھ جاوے گی۔ سرکاری افسراں نو ںایہ چوری وی نہیں کرنی پوے گی۔ بجلی دے جھٹکے تے بار بار دتے جا رہے نیں۔ڈار صاحب فرماندے نیں کہ رکاوٹ تے صرف آئی ایم ایف ولوں اے ایدھر تے سارا کم تیار اے غلاماں دے کول چوائس نہیں ہوندی۔ بندہ عام زبان وچ اوہناں توں پچھے تے کیہ تسیں امب کھان آئے سی اوہ کہن گے امب دا سیزن تے ہن آ رہیا اے تے اوہ یقینا امب ای کھان گے تے غالب دی خواہش دے مطابق مٹھے وی ہون گے تے کثرت وچ ہون گے۔
آخر وچ اک بڑی دلچسپ خبر تے گل کر لینے آں کہ بھارت وچ میاں بیوی سموسے ویچ کے کروڑ پتی ہو گئے پتہ لگا کہ اوہناں نے گھر ویچ کے ایہ کاروبار شروع کیتا سی فیر اوہ یومیہ 12 لکھ روپیے دے سموسے ویچدے۔ انج کمال اے فیر لوک ساڈے حکمراناں توں کیوں پچھدے نیں کہ اوہ ارب پتی کیویں بن گئے تہاڈے بچے ارب پتی کس طرح ہن دسو اوہ تے سموسیاں دی تھاں وڈیاں وڈیاں شیواں ویچدے نیں اک فالودہ والا تے ساڈا ارب پتی وی رہیا اے ایہدے وچ حرج وی نہیں نوازشریف نوں فالدہ تے ربڑی والا ددھ بڑا پسند سی جاوید قاسم دا اک شعر:
نہ بات کرے گا نہ پیار دے گا مجھے
میرے دنوں کی طرح وہ گزار دے گا مجھے