اصلاح دی ڈاڈھی لوڑ اے

غلام شبیر عاصم

ایہ گل سچ اے کہ اجکل لڑائی جھگڑے ودھ گئے نیں،تے نِکی نِکی گل توں لوک بندے نْوں جانوں مار چھڈدے نیں۔کِسے نال شْغل نال وی کوئی گل کرن لگیاں ڈر جہیا لگدا اے۔جے کدی بغیر سوچے سمجھے عادتاً کسے نال کوئی مذاق دی گل مونہوں نِکل وی جائے تے اللہ پاک دا شکر ادا کری دا اے کہ کِدھرے ایس نے غصہ نہیں کرلیا۔نئیں تے جھگڑا ہوسکدا سی۔کدی لوک اک دوجے نال ہاسا مذاق،چیزا تے جْگت بازی کردے سن تے اگلا بندہ بجائے غصہ کرن دے ہسدا تے خوش ہْندا سی۔بلکہ اگلے بندے نوں جان بْجھ کے وی چھیڑیا جاندا سی کہ کِدھرے ایہ کوئی جْگت مارے۔دراصل اوہدوں اک دوجے دا حیا کیتا جاندا سی،لوکاں اندر حوصلہ تے برداشت ہْندی سی،جیہڑی کہ اج ساڈے اندروں مْک گئی اے۔ایس وجہ توں لڑائیاں جھگڑے حدوں ودھدے جارہے نیں۔ہْون ویلے دے نال نال سانوں اپنا آپ بدلنا پوے گا۔مذاقیہ سبھا دے لوکاں نوں ہون گل سوچ سمجھ کے کرنی پوے گی۔اپنے آپ نوں گْھٹ وٹ کے رکھنا پوے گا،پہلے دی طرحاں مْونہوں چْھرل کردی جْگت یا مذاق نہیں کڈھنا چاہیدا۔کیوں جے کسے ویلے وی گل دا گلان تے ہاسے دا مڑاسا بن سکدا اے۔ہون برداشت مْک گئی اے۔نِکے نِکے بال عقل دی گل آکھن توں وی چنگے بھلے بندے دی پان پت لاہ کے ہتھ پھڑاوندے نیں۔ہْون کسے پکے پِیڈے اصول تے عمل کرکے اپنی عادت بدلنی پوے گی۔جِسراں کہ مولائے کائنات حضرت امام علی علیہ السلام دا فرمان اے کہ’’ دو گلاں اپنے اندر پیدا کرلوو چْپ رہنا تے معاف کردینا،کیونکہ چپ رہن توں ودھ کے کوئی جواب نہیں تے معاف کر دین نالوں ودھ کے کوئی بدلا تے انتقام نہیں‘‘۔سماج وچ امن امان قائم رکھن لئی تے اپنے آپ نوں کسے شرمندگی تے لڑائی جھگڑے توں بچاون لئی ایہ اک انمْلا اصول اے۔ایس تے عمل ضرور کرنا چاہیدا اے۔حضرت علی کرم اللہ وجہہ الکریم دے ایس فرمان پاک دا پرچھاواں جہیا جناب انور اداس ہوراں دے اک شعر وچ وی جھلکدا نظر آوندا اے۔تے حضرت امام علی علیہ السلام دی ایس عِلمی اچیائی تے سچائی دے صدقے وچ ایس شعر نوں وی ہمیشگی تے امرتا تے دے رنگ چڑھ گئے نیں۔انور اداس ہوریں آکھدے نیں کہ
اوہنے مینوں گالاں کڈھ کے اپنا بھرم گوایا
اُتوں میں چُپ رہ کے اوہدے نال بتھیری کیتی
سانوں کسے طرحاں وی اج اپنے اندر برداشت پیدا کرنی تے کسے نوں معاف کرن دا حوصلہ پیداکرنا چاہیدا اے۔جے اسیں موقعے اْتے ای ’’اِٹ دا جواب پتھر نال دینا‘‘شروع کردتا تے پھیر سگوں ماحول ہور خراب ہوجائے گا۔ہون اپنے آپ نوں حضرت امام علی علیہ السلام دے فرمان تے جناب انور اداس ہوراں دے شعر والی فکر ول اپنے آپ نوں موڑن دی لوڑ اے۔کوئی مندا بول وی جاوے تے جے اگوں اسیں چْپ رہواں گے تے اوہ بندہ شرم نال ای مرجائے گا۔تے انج اوہدی اصلاح وی ہووے گی تے لڑائی جھگڑے دے ودھدے ہوئے ماحول دا راہ وی ڈکیا جائے گا۔برداشت مْکن نال ’’غصہ تے شیطانیت‘‘ انسان دے اندر آ وڑدی اے۔تے ایہ انسان نوں تباہی تے گھاٹے ول لے کے جاندی اے۔ویکھن دی گل اے،برداشت مْکن وجہوں لڑائی جھگڑے تے شیطانی چالے تے شرارتاں ساڈے ملک دیاں اسمبلیاں اندر اپڑ گئیاں نیں۔پڑھے لکھے تے چنگے چنگے گھراں قبیلیاں دے لوک اج اسمبلیاں اندر اخلاق تے حیا توں ڈِگیاں گلاں کردے وکھالی دیندے پئے نیں۔اسمبلیاں اندر اک دوجے نوں جانوراں تے حیواناں نال تشبیہاں دے کے رولا رپا پایا جاندا اے۔جہدے نال پْورے مْلک دی دنیا بھر وچ بے عزتی تے لہائی ہْندی اے۔ساڈی سیاست اج عجیب جہئے رنگ وچ رنگی جا چکی اے۔اک دوجے دی ذات تک گالھ مندا کردے نیں۔سیاست نوں سیاستداناں نے ذاتی ویر بنا لیا اے۔جے ایہو ای حال رہیا تے اللہ معاف کرے ملک دا بیڑا غرق ہوجائے گا۔ایہناں بھیڑے کرتوتاں دی وجہ توں مْلک ہولی ہولی تباہی دے ایس پاسے جا رہیا اے۔سانوں اپنی اصلاح کرن دی ڈاہڈی لوڑ اے۔جے اساں اپنی اصلاح آپ کرن دا پکا پِیڈا ارادہ نہ کِیتا تے پھیر سانوں تباہ کرن لئی دشمن نوں سرحداں اْتے ارباں کھرباں اجاڑ کے محاذ تتیّ کرن دی کوئی لوڑ نہیں،اسیں اپنے ہتھیں آپ ای تباہ تے برباد ہوجاں گے۔٭