غزل
مسعودمنور
حوالہ حال دا دے دے حوالاتی اڈیکن پئے
جویں قیدی کوئی عمراں دے ملاقاتی اڈیکن پئے
ترکلے توں ٹری کڑیئے کہانی کھیس نہیں بن دی
ترا لاڑا فکر مند اے تے باراتی اڈیکن پئے
پگا لئی میٹ اوہناں نے کدوں دے سوں گئے قبریں
جو میرے ہان دے ہانی مری پاتی اُڈیکن پئے
لے عرشاں والیا تیری توجہ دی گھڑی آئی
نمانے پانیاں مارے تری جھاتی اڈیکن پئے
کہوو سلطان نوں جا کے اساڈا دل نہ توڑے چا
خبر کوئی خیر دی آوے ایہ خیراتی اڈیکن پئے
