غزل

بیراجی

بوہتی شہرت اپنا ناں کمانا وی اک فتنا ایں
پٹھے ایدھر اودھر دے کماں توں چنگا لکھنا ایں
کیہ ہویا جے اجے پرائمری دے وچ نافذ ہوئی نہیں
دیس پنجاب دے وچ آخر میری ماں بولی جتنا ایں
سچ آخر سچ ہوندا جھوٹھ نوں کوئی کِتے سلاہندا نہیں
ٹھگنا اچی کرسی اچے منصب تے وی ٹھگنا ایں
بھاویں سارے اکھاں میٹن ہے وڈیائی چنگے نوں
کھلیاں اکھاں بھیڑے نوں آخر بھیڑا ای متھنا ایں
منیں کوئی یا نہ منیں ایہو اک حقیقت اے
ادب چ اج وی شاعراں والا حصہ دونا تگنا ایں
رڑکدیاں جد ددھ مٹیاراں پیر تلکدے موراں دے
مکھڑے سوہنے اثر وکھاندے مکھن وی تے چکنا ایں
طاقتوراں وی جانا دنیا توں ایہہ قدرت دسدی اے
ٹہنی اُتوں ہر اک پتہ آخر اک دن ڈگنا ایں
رت پیائی غزل نوں اپنے لہو دے اک اک قطرے دی
خورے کس دن تاریاں وانگوں ناں انبرتے ٹِکنا ایں
منی گل اے بیراجی اصلیت سامنے آ جاندی
جو وکائو ادب دے وچ نیں اوہناں اک دن وکنا ایں