اسیں کدوں جاگاں گے؟

مطلوب ورائچ

دنیا اگے ودھدی چلی گئی‘ کلاواں بھردی ہوئی‘ ایہنے سمت مقرر کیتی تے اوہدے ول ٹردی گئی۔ ساڈا وی سفر شروع ہویا‘ بے سمت سفر دائرے وچ سفر کوہلو دے دوالے گھمدے رہے‘ فخر کردے نیں۔ داستاناں سناندے نیں مسلم امہ دی رہنمائی دے دعویدار نیں۔ دنیائے اسلام دی پہلی ایٹمی قوت ہون دا تمغہ سجائے پھردے نیں۔ اوس ملت دی رہنمائی کرن چلے نیں جنہے ابن خلدون دے بعد سوئی تک ایجاد نہ کیتی۔ ایٹم بمب بنا لیا کیویں بنایا‘ ایہ ایجاد نہیں‘ ایہ نقل اے۔ جے ایف ٹھنڈر تے ناز اے۔ ایکسپورٹ وی کردے نیں‘ ایہدے وچ کیہ کمال کر لیا ‘چین دے جہازاں دی نقل کیتی جتھے مینوفیکچرنگ شروع کر دتی۔ پنا وی کجھ ہے؟۔
ساڈے تے ہیرو وی اپنے نہیں‘ غوری‘ غزنوی‘ ابدالی‘ ایوبی‘ طارق بن زید‘ خالد بن ولید‘ حجاز بن یوسف تے محمد بن قاسم کتھوں آئے‘ رائے احمد خان کھرل‘ بھگت سنگھ‘ راجہ پورس‘ جہڑے دھرتی دے سپوت نیں ایہناں دا ناں وی بھلا دتا گیا اے۔ پتہ نہیں اسیں خواب غفلت توں کدوں جاگاں گے؟ اسیں انگریز توں آزادی حاصل کیتی‘ ستاریاں تے کمند پان دے ارادے سن پر ستارہ شناسی تے ستارہ پرستی وچ پے گئے۔ ہندو نے مسلماناں توں آزادی حاصل کیتی تے کتھوں دا کتھے پہنچ گیا۔ اج ہندوستان دی کرنسی روپیے نوں دنیا دے 18 ملک عالمی کرنسی ڈکلیئر کرن دا اعلان کر رہے نیں۔ بھارتی روپیہ مضبوط اے۔ 80 روپیے دا ڈالر‘ ساڈے ایتھے تن سو روپیے دا‘ افغان کرنسی کدی بے وقعت سی اک روپیے 30افغانی۔ اج اک افغانی تن روپیے دے برابر۔ ایہو عالم بنگلہ دیش دے ٹکے دا اے۔ اک ٹکے دے تن روپیے۔ بنگلہ دیش نے وی پاکستان توں آزادی حاصل کیتی۔ معیشت وچ وڈا ناں پیدا کیتا۔ اج عالمی سطح تے اسیں معیشت وچ 140 ویں نمبر تے آں۔ 216 ملکاں وچ ایہ ساڈی اوقات اے۔ باقی جو ساڈے توں پچھے ملک نیں اوہناں دی آبادی ای کنی اے‘ لکھاں وچ ہووے گی۔
اسیں رشوت‘ اقرباپروری‘ میرٹ دے قتل نے وی ڈوبیا اے تے ساڈے اداریاں نے طاقت ور ہون دے نشے وچ چور ہو کے سارے اختیارات دا مالک تے قابض بن جانا چاہیا۔ اسیں اپنے محافظ نوں اپنی حفاظت لئی بندوق پھڑائی اوہنے ایسے بندوق نال ساڈے تے کئی واری چڑھائی کر دتی۔ جد کہ کافر و اغیار نال جنیاں وی ساڈیاں لڑائیاں سن ایہدا اج تک پتہ نہیں چل سکیا کہ کون جتیا‘ کون ہاریا‘ دنیا اگے بہت اگے چلی گئی اسیں اک دوجے دی ہرمیدان وچ لتاں کھچ رہے آں۔ سیاسی میدان وچ اک دوجے نوں ناقابل برداشت سمجھنے آں۔ اک تھاں بیٹھن نوں تیار نہیں۔ علماء کرام جو اک دوجے دے پچھے نماز پڑھن نوں تیار نہیں اوہ سیاست دے میدان دے شہسوار بن دے نیں تے شیروشکر ہو کے باہم اقتدار ول لپکدے نیں۔ سلطنت عثمانیہ‘ مغلیہ ایمپائر توں گھٹ دا اسیں نہیں لیندے۔ اجہی سلطنت اوہ سیاسی سپوت بنان گے جہناں دیاں اولاداں‘ جائیداداں ملک چوں باہر نیں۔ جو صرف اقتدار دی خاطر ملک وچ آندے نیں۔ اک دوجے نوں غدار‘ ملک دشمن‘ نالائق‘ ناسور قرار دیندے نیںتے فیر اقتدار دی منزل حاصل کرن لئی دشمنی تک دے اختلافات بھلا کے ہم رکاب تے ہم نوالا ہو جانے آں۔
میں پچھلے چالھی ورھیاں وچ دنیا دے ہر براعظم دے تقریباً اک سو پنجی ملکاں دا نہ صرف وزٹ کیتا اے سگوں اک لکھاری ہون دے ناطے اوتھوںدے سماجی‘ سیاسی‘ معاشی نظام نوں وی سمجھن دی کوشش کیتی اے تے آخر میں ایس نتیجے تے اپڑیا واں کہ وطن عزیز پاکستان دے لوکاں دی اک وڈی گنتی نہ صرف منافق اے سگوں جھوٹی‘ مکار تے مبالغہ آرائی توں کم لین والی اے۔ اکثریت ای اجتماعیت دی عکاسی کردی اے ایہنوں ای قوم کہیا جاندا اے۔ اجہی سوچ رکھن والے بندے نوں اوہدے حقیقت پسندانہ خیالات دے اظہار پاروں اوہنوں غدار‘ ملت فروش‘ باغی ورگے القابات نال نوازیا جاندا اے۔ کجھ مذہب فروش تے سر دی قیمت لان تے اتر آندے نیں۔ مینوں ایہدے نال تے حقیقت نوں وی ایہدے نال کوئی فرق نہیں پیندا کوئی کجھ کہے پر میرا تے پیغام اصلاح اے جتھوں تک اپڑے۔ ایس لئی آئو اپنی نسل و قوم دی تربیت تے اصلاح کریئے‘ اج دے تقاضیاں دے مطابق اک سچے مسلمان وانگوں۔
دوستو! بحیثیت پاکستانی مینوں ایس گل دا پتہ اے کہ میرے ہم وطناں نوں سچ سنن دی عادت نہیں۔ پچھلے دیہاڑے خطے دے چار وڈے ملکاں دے وزراء خارجہ دی موجودہ معاشی‘ سیاسی تے جغرافیائی صورتحال تے میٹنگ تے مکالمہ سی۔ ایہناں ملکاں وچ ایران‘ روس‘ چین تے پاکستان دے وزراء خارجہ نے شرکت کرنی سی کیوں جے امریکہ نوں ایس کانفرنس توں خطرہ محسوس ہویا تے اوہناں نے پاکستانی وزیر خارجہ جناب بلاول زرداری نوں اک عام پارلیمنٹرین نال ملاقات لئی سد لیا۔ جد کہ دوجے پاسے خطے دے وزراء خارجہ دی میٹنگ وچ پاکستان دے وزیر خارجہ نوں موجود ہونا چاہیدا سی پر اوہدی تھاں امور خارجہ دی چھوٹی وزیر حنا ربانی کھر نوں ایس میٹنگ وچ گھل دتا گیا تے روسی وزیراعظم نے وفاقی وزیر خارجہ دی تھاں جونیئر منسٹر نوں ویکھیا تے لقمہ دتا کہ تہاڈی ٹیم دے سینئر ممبر کتھے نیں؟ جہدے تے حنا ربانی کھر آئیں بائیں شائیں کرن لگ پئیاں جہدے توں باقی تنے وزراء خارجہ محظوظ ضرور ہوئے ہون گے۔ ملک دے اندر سیاسی کشمکش دا ایناں گھمبیر ہونا یقینا ملکی سلامتی لئی چنگا نہیں پر سیاسی لڑائی دا ایہ مقصد نہیں کہ مخالف دھڑے نوں قنون تے آئین توں ہٹ کے ہراساں کیتا جاوے یاں اوہناں نوں اغوا کرکے تشدد تے ٹارچر کیتا جاوے۔ پاکستان جہدی سلامتی نوں ایس ویلے ان گنت خطرات دا سامنا اے اوہنوں بڑی ذہانت تے ڈپلومیسی نال حل کرنا چاہیدا اے نہ کہ سیاسی مخالفت نوں دشمنی دی حد تک لے جا کے ٹیبل ٹاک دے راہ بند نہیں کر لینے چاہیدے۔٭