رنگاں دی جادوگری

دنیا بھر دے سارے علوم و فنون اوس دی ذات نال منسوب ہو کے عظمت دے مقام تک پہنچدے نیں

طوبیٰ رحمن

لوح و قلم دے ذریعے اسیں اللہ دی جلوہ گری دے کرشمے ویکھنے آں۔ دنیا بھر دے سارے علوم و فنون ایہدی ذات نال منسوب ہو کے عظمت دے مقام تک پہنچدے نیں۔ انسان دی نیت ایہدے عمل نوں خراج دوا ندی رہندی اے۔ہمت تے استقامت دے نال نال جے وسائل وی بروئے کار لیانے آسان ہو جان تے اللہ دی راہ وچ اٹھیا ہویا ہر قدم رستے دی رکاوٹاں نوں عبور کردا ہویا چھیتی منزل مقصود تک پہنچ جاندا اے۔
اللہ دی مخلوق نال محبت کرنا اللہ دی قربت حاصل کرنا اے مگر اللہ دی ذات نال عشق کردے ہوئے اوہدے اک اک مبارک نام اتے سالہا ل رنگ بھرنا اوہدے وچ تصوف دی لکیراں توں نفس لوامہ تے مطمئنہ نوں واضح کرنا ماں دے ڈھڈ وچ بچے دا اذان سننا تے اوہدے تاثرات نوں حسیاتی خطاطی وچ نمایاں کرنا بڑے اعزاز دی گل اے۔ مصوری دے رنگاں وچ نہ کدی رنگ دھندلا ہوندا اے نہ ویلے دی گرد دی دبیز تہہ اوہدے اتے پیندی اے۔ جدوں مصور تے خطاط اوہدے وچ اپنا خون جگر‘ تنہائیاں‘ اداسیاں‘ زندگی بھر دی مشقت تے اپنے جنون دے رنگ بھردا اے تے تصویر گفتگو کرن لگدی اے۔
جیویں صاقین نے خطاطی نوں نشاثانیہ تے اوہدے مختلف زاویاں نوں کینوس اتے منعکس کیتا تے اوہ دنیا بھر دے دیدہ بینا نوں تصوف وچ متغرق کر دتا ایسے طرح محمد شفیق فاروقی دی خطاطی دی کتاب لا الہ الا اللہ اتے جدوں میری نظر پئی تے تادیر بحر استعجاب وچ غرق رہی۔ اللہ تعالیٰ دے متبرک ناماں تے اوہناں دی تفسیراں نوں بارہا سنیا تے پڑھیا سی مگر ایس کتاب وچ مصنف تے مصور نے ایس طرح اللہ تعالیٰ دے اک اک نام نوں رنگاں دے لباس وچ کرناں دے معنی پہنائے نیں کہ انسان دل و جان نال جے اوہناں وچ ڈب جاوے تے یقینا بخشیا جاوے۔ جتھے مصور نے الجبار لکھیا تے اوہدے رنگاں وچ جہنے وی رنگاں دی آمیزش کیتی اوتھوں کدھرے وی سزا دا رنگ جزا دی چادر پائے بنا نظر نہیں آیا جتھے کجھ سیاہی جھلکدی اے اوتھے کدھرے نہ کدھرے محبت دی بدلی رحم دی کرناں وی عود آئیاں نیں۔ انسان جدوں دنیا توں بیگانہ ہو جاندا اے اوہدے نفس اتے نفس مطمئنہ دا راج ہوندا اے تے اوہ اپنے اندر جھانکدا اے جتھے اوہنوں سب توں پہلاں خدا رب ذوالجلال دی ملاقات دا شرف ہوندا اے ایہہ گل اے نصیباں دی تے شفیق فاروقی نوں ای نصیب دان کیتا گیا اے۔صادقین‘ رامے‘ گل جی تے شاکر علی دے نال ہن خطی مصوری وچ شفیق فاروقی صاحب دا نام وی لکھیا جاوے گا جہڑا وی انسان تعریف ستائش توں بیگانہ ہو کے اللہ دی مخلوق دی غلامی کردا اے یا اپنی تخلیقات نوں قادر مطلق دی رضا لئی سپرد الٰہی کردا اے اوہدا اجر صرف اللہ دی ذات ای دے سکدی اے۔ جیویں شاعری وچ تخلیق دی آبشار پھٹ پیندی اے اوسے طرح مصوری وچ بے ساختہ پن دی آمیزش دے حسین امتزاج وچ موجود افسانہ‘ نعت‘ آیتاں دی تفسیر‘ جلال و جمال‘ حمدو ثنا‘ تسلسل خیال نوں فکری ارتکاز پایا جاندا اے۔
خطاطی اپنی ارتقائی منزلاں طے کر دے ہوئے ہن موجودہ دور وچ داخل ہو گئی اے۔ صدیاں توں جاری ایس فن نوں خلافت راشدہ دے دور وچ اک نویں جہت ملی۔ الفاظ قرآنی تے آیات قرآنی نے ایس خطاطی دا طرز اسلوب بدل دتا۔ فیر رسم الخط وجود وچ آیا۔ شفیق فاروقی صاحب نے اپنی بساط دے تھال وچ اپنے ہنرو فن تے عشق و جنون تے معرفت و تصوف نوں یکجا کر دتا۔ عاشق الٰہی تے عاشق نبی لئی رنگاں دا ایہ امتزاج روح وچ اک نواں دریچہ کھولدا اے۔ اوہناں دے رنگاں دی انفرادیت ایہہ اے کہ ہر رنگ اک نویں رنگ توں جنم لے رہیا اے تے محبت دی انوکھی خشبو پھیلی محسوس ہوندی اے۔ روحانی تے وجدانی کیفیات جدوں سنہرے پراں نوں پھیلائے پرواز لیندیاں نیں تے اندر دی نظر روشن تے باہر دی انھی ہو جاندی اے۔ باہر دا انھیرا کف افسوس ملدا رہ جاندا اے۔ دستک دیندا اے مگر اوہنوں اجازت نہیں ملدی کہ اوہ روح دے اندر تریکی پھیلا سکے۔ جتھے مصوری خطاطی تے تفسیر یکجا ہو جاوے اوتھے بدل دھمال پان لگدے نیں روحاں وجد وچ آ جدنایاں نیں دل دے تار غیب الٰہی نال جا ملدے نیں ارتعاش ایس قدر شدید ہوندا اے کہ اوہ قاری ہووے یا سامے متاثر ہوئے بغیر نہیں رہ سکدا۔ڈاکٹر انعام الحق جاوید اسلام آباد توں لکھدے نیں کہ محترمہ محمد شفیق فاروقی دا شمار ملک دے نامور تے مایہ ناز خطاطاں وچ ہوندا اے اوہناں نے ایس میدان وچ یادگار نقش تخلیق کیتے ہیں۔قاضی جاوید لکھدے نیں کہ شفیق فاروقی صاحب نے مولانا روم دے تصور عشق وچ مگن لوکاں دی سرشاری نوں بڑے عمدہ انداز وچ پیش کیتا اے تے اوہناں دی ایہہ کتاباں اسلام دی تبلیغ دا حق ادا کر رہیاں نیں۔خورشید عالم گوہر دا آکھنا اے شفیق فاروقی نہ صرف ایس عہد وچ نیں بلکہ خطاطی تے مصوری وچ خود اک عہد بن چکے نیں۔ غالباً اوہ رنگ و حروف دے سفر وچ اپنا ثانی نہیں رکھدے۔
جمال شاہ اسلام آباد توں لکھدے نیں ’’رنگ باتیں کریں اور باتوں سے خوشبو آئے ‘‘دا مصرعہ مصور تے خطاط شفیق فاروقی اتے صادق آندا اے۔ اوہناں نے اسمائے حسنہ دی بہت خوبصورت مصوری کیتی اے۔