لنڈا بازار

لہور ریلوے سٹیشن دے لنڈا بازار توں گزر ہویا تے اوتھے عام مارکیٹاں دی نسبت بوہتا رش سی

روہیل اکبر

لہور ریلوے سٹیشن دے لنڈا بازار توں گزر ہویا تے اوتھے عام مارکیٹاں دی نسبت بوہتا رش سی۔ لنڈا بازار وچ گرمیاں وچ پہلے کدی اینا رش نہیں ویکھیا۔ شاید ودھدی ہوئی مہنگائی‘ بے روزگاری تے غربت نے مڈل کلاس توں اتے والیاں نوں وی ایس بازار دا منہ وکھا دتا اے۔ ایہو وجہ اے کہ اج کل لنڈا بازار وچ کافی رونقاں نیں۔ لنڈا بازار دی ابتدا کیویں ہوئی ایہدے تے بعد وچ لکھاںگا۔ پہلاں مایوس تے کم ہمت لوکاں نوں گزارش اے کہ ہر انسان دی زندگی وچ مشکلات تے مصیبتاں دا عمل دخل ضرور اے۔ پریشانیاں وی آندیاں نیں مگر کجھ لوک اوہناں پریشانیاں نوں سرا تے سوار کرن دے بجائے اوہناں کولوں چھٹکارے دا سوچدے نیں تے فیر عمل کرنا شروع کر دیندے نیں۔ ساڈے وچ اکثریت ایسے افراد دی اے جہڑے صرف پریشانیاں وچ سوچدے نیں مگر اوہناں دے خاتمے لئی کردے کجھ نہیں۔ زندگی وچ مشکلات دے انھیرے جدوں ساڈے اتے چھا جان تے امید دی کرن نظر نہ آوے تے اپنا محاسبہ کرو کہ میرا رب میرے کولوں کیہ چاہندا اے۔ ساڈی زندگی وچ کدی دن دا چانن ہوندا اے تے کدی رات دا انھیرا۔ ہر رات مگروں دن اے جیویں رات باقی نہیں رہندی اوس طرح ہر اوکھا ویلا وی گزر جاندا اے۔ کرن دے دو کم پہلا کم جدوں اوکھا ویلا ہووے پریشانی ہووے‘ سٹ لگے ‘ اک ٹھہرائو آ جاوے تے سمجھو گویا سوچن دا موقع ملیا اے۔ اپنی غلطی بعض اوقات نظر آن لگدی اے اوہدے اتے غور کرنا چاہید اے۔ دوجا کم مایوس نہیں ہونا بس کوشش کردے رہنا چاہیدا اے۔ اللہ تعالیٰ سانوں مایوس نہیں کرے گا کدی تسیں آسمان اتے غور کیتا اے تے سوچیا اے کہ کہڑا اے جہڑا اینے پیارے تے نفیس رنگ دیندا اے۔ ایس نیلی چادر نوں ساڈے رب دے کول تے آسمان لئی وی منصوبے نیں فیر اسیں جہڑے اشرف آں ساری مخلوق توں۔ اسیں ایہدے خلیفہ آں تے ایہنوں تے ساڈے کولوں کوئی مفاد وی نہیں اے سوائے ایس گل کہ سانوں پہلاں توں بہتر مقام دے دیوے تے جہناں نوں اللہ تعالیٰ نے نوازیا اے سانوں اوہناں کولوں کوئی حسد تے لالچ وی نہیں کرنا چاہیدا۔ ایہناں گلاں اتے کجھ ضرب المثل وی پڑھ لوو فیر لنڈا بازار اتے وی تسیں پڑھنا اے۔ تٹی قلم تے دوجیاں کولوں جلن سانوں اپنی قسمت لکھن نہیں دیندی۔ کم دا آلس تے پیسے دی لالچ سانوں ترقی کرن نہیں دیندی۔ دنیا وچ سب چیزاں مل جاندیاں نیں صرف اپنی غلطی نہیں ملدی۔ جہنی بھیڑ ودھ رہی اے زمانے وچ لوک اوہنے ای کلے ہوندے جا رہے نیں۔ ایس دنیا دے لوک وی کنے عجیب نیں نا سارے کھڈونے چھڈ کے جذبیاں نال کھیڈدے نیں۔ کنارے اتے تیرن والی لاش نوں ویکھ کے ایہہ سمجھ وچ آیا بوجھ جسم دا نہیں ساہنواں دا سی۔ سفر دا مزہ لینا ہووے تے نال سامان گھٹ رکھو تے زندگی دا مزہ لینا ہووے تے دل وچ ارمان گھٹ رکھو۔ زندگی نوں اینا سیریس لین دی لوڑ نہیں اے۔ ایتھوں زندہ بچ کے کوئی نہیں گیا۔ جہناں دے کول صرف سکے سن اوہ مزے نال بھجدے رہے۔ بارش وچ جہناں دے کول نوٹ سن اوہ چھت دی تلاش وچ رہ گئے۔ پیسہ انسان نوں اتے لے جا سکدا اے لیکن انسان پیسہ اتے نہیں لے جا سکدا۔ کمائی چھوٹی یا وڈی ہو سکدی اے پر روٹی دا سائز لگ بھگ سارے گھراں وچ اک جیا ای ہوندا اے۔ انسان جاہندا اے اُڈن نوں پر ملے تے پرندے سوچدے نیں کہ رہن نوں گھر ملے۔ کم توں ای پہچان ہوندی اے۔ انسان دی مہنگے کپڑے تے ’’پتلے ‘‘ وی پاندے نیں۔ دکاناں وچ‘ مینوں پتہ نہیں کہ میں اک بہترین ممبر آں یا نہیں لیکن میں جہڑے گروپ وچ آں اوہدے سارے ممبرز بہت ای بہترین نیں۔
ہن آنے آں لنڈا بازار ول جتھے استعمال شدہ کپڑے‘ جوتیاں تے پرانی دوجی شیواں فروخت ہوندیاں نیں۔ ایس بازار نوں ’’لنڈا بازار‘‘ آکھیا جاندا اے؟ جہدے متعلق مشہور اے کہ اک برطانوی خاتون دا نام Lindaلینڈا سی اوہ بہت رحم دل سی۔ اوہنوں غریباں نال خاصی ہمدردی سی۔ اوہنے غریباں لئی کجھ کرن دا سوچیا۔
ا وہدے کول اپنے وسائل گھٹ سن۔ اوہنے اپنے دوستاں نوں عطیات دین دی درخواست کیتی۔ اوہدے دوستان نے اوہنوں کجھ پرانی جوتیاں‘کپڑے وغیرہ دتے جہڑے اوہنے غریباں لئی اک سٹال اتے سجائے تے غریب لوک اوتھوں اوہ کپڑے مفت لین لگے۔
دوجے لوکاں نوںوی اوہدی ترغیب ہوئی تے اوہناں لوکاں نے وی اپنے پرانے کپڑے تے جتیاں وغیرہ لینڈا نوں دینے شروع کر دتے تے اوہدا ایہہ سٹال کافی مشہور ہوگیا جہڑا مگروں اک مارکیٹ دی شکل اختیار کر گیا۔ اخیر اوس جگہ نوں لینڈا مارکیٹ آکھیا جان لگیا جہڑی درحقیقت غریباں دی مارکیٹ سی۔ انگریزاں دی برصغیر آمد دے نال ای انگریزاں دی پرانی شیواں جہڑیاں بے کار ہو جاندیاں سن۔ سستے داماں ایتھے پاک وہند وچ وک جاندیاں سن۔ انگریز جاندے ہوئے وراثت وچ سانوں لینڈا مارکیٹ وی دے گئے جہنوں اسیں لنڈا بازار آکھنے آں جہڑی ساڈے ایتھے مقامی زبان وچ ایہدا وِگڑیا ہویا نام اے لنڈا بازار دے اندر وی ساڈے لئی اک سبق موجود اے۔ لینڈا اک غیر مسلم ہو کے وی خیر خواہی دے جذبے نال سرشار سی تے اج اسیں اکثر مسلمان جہڑے اسلام دے نام لیوا آں اپنے غریب بھین بھراواں دا خیال تک نہیں رکھدے حالانکہ ساڈے دین اسلام دے نام دا مطلب ای خیر خواہی اے ایس لئی سانوں اک دوجے دی خدمت وچ سبقت لیانی چاہیدی اے۔
اپنے آسے پاسے‘ خاندان‘گلی تے محلے دے لوکاں دی خبر گیری رکھیا کرو کوئی غریب اے تے حقدار اے تے اوہدی ضرور مدد کرو۔ انشاء اللہ ایہہ مدد کرنا تہاڈا رائیگاں نہیں جاوے گا۔
اک دے بدلے ست سو گنا توں وی بوہتا اجر اے جیویں قرآن پاک وچ اللہ دی راہ وچ خرچ کرن دی بڑی پیاری مثال دتی گئی اے جہدا مفہوم کجھ ایس طرح اے کہ اللہ دی راہ وچ خرچ کرن دی مثال ایسی اے کہ ا نسان زمین وچ اک دانہ بوندا اے تے اوہدے توں اک پودا نکلدا اے تے اوہدے اتے ست بالیاں (سٹے) نکلدے نیں تے ہر بالی وچ سودا نے تے اللہ چاہے تے ایس تو وی ودھ ودھاوے۔ ایسے طرح جے تسیں صاحب حیثیت او تے تہاڈے اتے زکوٰۃ فرض اے تے اپنی زکوٰۃ سو فیصد مکمل ادا کیتا کرو۔ حدیث شریف وچ زکوٰۃ نوں مال دا میل آکھیا گیا اے تے اک حدیث وچ اے کہ زکوٰۃ ادا کرکے اپنے مالاں نوں محفوظ کر لوو ایس لئی سارے صاحب ثروت لوک ا پنی زکوٰۃ دا حساب لا کے مکمل زکوٰۃ ادا کیتا کرو کہ ایہہ تہاڈے غریب مسلمان بھیناں تے بھراواں دا حق اے۔ زکوٰۃ دے مسئلے سکھنا وی انج ای فرض اے جیویں نماز‘وضو تے غسل دے مسئلے سکھنااے۔ اللہ ساڈے اندر وی غریباں دی خیرخواہی دا جذبہ پیدا فرماوے۔ آمین