غزل
انور اُداس
بِناں غرضوں کدوں ایتھے محبت لوک کر دے نیں
محبت آکھدے نیں پر تجارت لوک کر دے نیں
شرافت دا لبادہ اوڑھ کے لُٹدے نیں لوکاں نوں
وکھاوے لئی زمانے تے سخاوت لوک کر دے نیں
گھساندے روز نیں متھّے دِلاں دی مَیل دھوندے نہیں
خُدا جانے کِویں دی ایہ عبادت لوک کر دے نیں
وکھا کے خواب چانن دے ودھاندے نیں ہنیرے نوں
عجب اِس دَور دے اندر سیاست لوک کر دے نیں
اَسیں آں سر کٹا کے وی جو دیندے رہے صدا حق دی
کدوں ساڈے طرح ایتھے بغاوت لوک کر دے نیں
بنا لیندے نیں رہزن نوں اے آپے رہنما اپنا
حقیقت جان کے وی ایہ حماقت لوک کر دے نیں
ظُلم نوں ویکھ کے لیندے نیں انورؔ مِیٹ اکھّاں نوں
یزیدِ وقت دی اِنج وی حمائت لوک کر دے نیں
