اورینٹل کالج پنجاب یونیورسٹی وچ بابافریدالدین گنج شکرؒ دے حوالے نال سیمینار

رپورٹ: محمداکرم

حضرت بابا فریدالدین گنج شکرؒ بارہویں صدی عیسوی دے عظیم صوفی بزرگ نیں۔آپ ؒ پنجابی دے پہلے شاعر نیں جہناں نے پنجابی دے نال نال عربی،فارسی تے ہندی زبان وچ وی شاعری کیتی اے۔ سکھ مت دی مقدس کتاب’’گرنتھ صاحب‘‘ وچ سکھ گروؤاں،ہندو شعراء تے مسلمان صوفیاء دے کلام دے علاوہ آپ ؒ دا کلام وی شامل اے۔جہدے توں پتہ چلدا اے کہ آپ دی شاعری نوں دوجے مذہباں وچ وی پذیرائی حاصل ہوئی۔بابا فرید الدین گنج شکرؒدا شمار برصغیر دے اوہناں صوفیاء کرام وچ ہوندااے جہناں نے جہالت و گمراہی وچ مبتلا لوکاں نوں دین اسلام دی تعلیمات نال روشناس کرایا۔صرف اک اللہ دی پہچان کراکے لوکاں نوں عبادتِ الٰہی ول رغبت دوائی۔ عربی تے فارسی دا عالم ہون دے باوجودبابا فریدؒ نے لوکاں دے مزاج تے ماحول نوں سمجھدیاں ہوئیاں پنجابی زبان وچ سخن آرائی نوں ترجیح دتی جہدے توں لوکاں تک دین اسلام دی گل اپڑان وچ بہت آسانی ہوئی۔پچھلے دناں اورینٹل کالج پنجاب یونیورسٹی وچ بابا فریدالدین گنج شکرؒ دے کلام دے حوالے نال سیمینار ہویا جہدی صدارت وائس چانسلرپنجاب یونیورسٹی پروفیسر ڈاکٹر محمد سلیم مظہر نے کیتی تے معروف سماجی رہنما سید محمد حبیب عرفانی سرپرست اعلیٰ الاخیار فائونڈیشن ایس تقریب دے اُچیچے پروہنے سن۔ یونیورسٹی اورینٹل کالج دا شیرانی ہال وکھو وکھ شعبہ ہائے زندگی نال تعلق رکھن والے لوکاں نال بھریا ہویا سی۔پروگرام دا آغاز تلاوت قرآن مجید توں ہویا۔ قاری عطاء المنان وارثی نے سورۃ آل عمران دا آخری رکوع تلاوت کیتا تے ترجمہ پیش کیتا۔ مسندِ سید علی ہجویریؒ ،اورینٹل کالج دے زیراہتمام منعقدہ تصوف سیمینار توں افتتاحی کلمات اداکردیاں پرنسپل اورینٹل کالج پروفیسر ڈاکٹر سید محمد قمر علی آکھیا ڈاکٹر ظہور احمد اظہر عالم ِ اسلام دے عظیم سکالر تے محقق نیں۔ اوہناں نے حضرت بابا فریدالدین گنج شکر د کے پنجابی کلام دا چار زباناں اردو، فارسی،عربی تے انگریزی وچ ترجمہ کرکے بابا فریدؒ دی تعلیمات نوں عام کرن دی سعی بلیغ کیتی اے۔ ڈاکٹر ظہور احمد اظہر نے کلیدی خطبہ ارشاد فرماندیاں آکھیا بابا فرید الدین گنج شکر نوں پنجاب وچ اسلام دی اشاعت و تبلیغ لئی بہت ساری مشکلات دا ساہمنا کرنا پیا تے مخالفین دین نے اوہناں دی راہ وچ بڑی رکاوٹاں کھڑی کیتیاں پر اوہ صبر و ہمت دے نال اپنے مشن تے ڈٹے رہے۔ایس لئی کہ آپ اپنے قول وعمل وچ سنت نبویؐ تے پوری طرح کاربندسن۔بابا فریدؒ نے کفرو ضلالت تے جہالت وگمراہی دا ڈٹ کے مقابلہ کیتا۔اوہناں دا ہر قدم اللہ دے راستے وچ صرف اللہ لئی ہوندا سی۔ اوہناں دا ہر کم خلوص،فقر تے قناعت تے مبنی ہوندا سی۔ بابا فریدزہدوتقویٰ والی زندگی بسرکردے سن۔ اوہناں دی خوراک سادہ تے انتہائی قلیل ہوندی سی۔ ایہدے وچ وی معتقدین و متوسلین نوں شامل کرلیندے سن۔ اوہناں دے کول اک ای کمبل ہوندا سی جہڑا دن نوں فرش تے رات نوں رضائی دا کم دیندا سی۔ اوہناں نے مبلغ اسلام دی حیثیت نال دین حق دا پیغام اللہ دی مخلوق تک اپڑایا تے لکھاں انساناں نوں حق دی راہ وکھائی۔اوہناں نے عربی ،فارسی ہندوی یاں اردو تے پنجابی وچ شاعری کیتی۔ پنجابی زبان وچ شاعری اوہناں دے عہد پرآشوب دی نمائندگی کردی اے۔ڈاکٹرظہور احمد اظہر پروفیسر ایمریٹس پنجاب یونیورسٹی پاکستان دے نال نال عرب دنیا داوی معتبر ناں نیں۔ اوہناں دی کئی شہرہ آفاق تصانیف نیں ۔ عربی زبان ڈاکٹر ظہور احمد اظہر دا اوڑھنا بچھونا اے۔عربی زبان نال محبت اوہناں دی خاندانی وراثت اے۔اوہ عربی زبان نوں اپنا ایمان ،جان تے آن بان تے شان قراردیندے نیں۔ اوہناں نے عربی زبان وادب لئی نمایاں خدمات انجام دتیاں نیں۔ اوہ کئی ناول تے افسانیاں دا عربی ترجمہ وی کرچکے نیں ۔اوہناں نوں پاکستان وچ عربی دے پہلے افسانہ نگار ہون دا اعزاز وی حاصل اے۔نیز اوہناں نوں اسلامی تے عرب دنیا دی عظیم درس گاہ الازہر قاھرہ یونیورسٹی دا ویزیٹنگ پروفیسر ہون دا شرف وی حاصل اے۔ایہدے علاوہ مصردی قدیم یونیورسٹی جامعہ عین شمس وچ بطور مہمان استاذ خدمات انجام دیندے رہے نیں۔اوہناں دی عربی تصانیف کئی عرب ملکاں دی یونیورسٹیاں دے نصاب وچ پڑھائی جاندیاں نیں۔ 24فروری 1974ء نوں لہوردے قذافی سٹیڈیم وچ لیبیا دے صدر معمر قذافی دی نوے منٹ دی عربی زبان وچ تقریر دااردو ترجمہ کرن دے بعد اوہناں دی عربی دانی دا شہرہ چہاردانگِ عالم پھیل گئی۔ہن ذکر ہو جاوے بابا فرید الدین گنج شکرؒ دے افکار و اشعار دا جہناں دا ڈاکٹر ظہور احمد اظہر صاحب نے چار زباناں(اردو،عربی،فارسی تے انگریزی) وچ ترجمہ کرکے اوہناں نے خواص دے نال عوام الناس لئی وی بابافرید الدین گنج شکرؒ دے کلام نوں سمجھن وچ راہ پکی کردتی اے۔ بابا فرید دے کلام تعارف و ترجمہ ’’معارفِ فریدیہ‘‘ دے ناںتوں بین الاقوامی ایڈیشن مرکز معارف محکمہ اوقاف نے شائع کیتااے۔ڈاکٹر محمد سلیم مظہر پرووائس چانسلر پنجاب یونیورسٹی نے اپنے صدارتی کلمات وچ آکھیا کہ ڈاکٹر ظہور احمد اظہر غیر معمولی صلاحیتاں دے مالک تے قدرومنزلت وچ اپنے استا د عبدالعزیز میمن ورگے نیں۔ علمی دنیا دا اک معتبر حوالہ ہون دے باوصف عجزوانکساری دے پیکر نیں۔

اپنا تبصرہ گھلو