مولانا عبدالستار خان نیازی

آپ نے تحریک پاکستان‘ تحریک ختم نبوت‘ تحریک نفاذ شریعت تے تحریک نظام مصطفی وچ گراں قدر خدمات انجام دتیاں

ایم آر شاہد

مجاہد ملت‘ بطل حریت مولانا محمد عبدالستار خان نیازی نے تحریک پاکستان‘ تحریک ختم نبوت‘ تحریک نفاذ شریعت تے تحریک نظام مصطفی وچ گراں قدر خدمات انجام دتیاں تے ایہناں تحریکاں وچ جیویں قیدو بند دی صعوبتاں برداشت کیتیاں اوہ تریخ دا اک ناقابل فراموش باب اے۔آپ نظریہ پاکستان تے نظام مصطفی دے بڑے علم بردار تے ملت اسلامیہ دا عظیم سرمایہ سن۔
مولانا عبدالستار خان نیازی یکم اکتوبر 1915 نوں عیسیٰ خیل میانوالی دے ممتاز نیازی خاندان وچ پیدا ہوئے۔ 1933 وچ گورنمنٹ ہائی سکول عیسیٰ خیل توں میٹرک مگروں اوسے سال لہور پہنچے تے حکیم الامت علامہ محمد اقبال دے قائم کردہ اشاعت اسلام کالج وچ داخلہ لے کے ’’ماہر تبلیغ‘‘ دا دو سالہ کورس مکمل کیتا۔ کالج وچ اول پوزیشن حاصل کرن تے حکیم الامت کولوں سند حاصل کیتی۔ 1936 وچ ایف اے 1937وچ بی اے دا امتحان امتیازی حیثیت نال پاس کیتا۔1940 وچ ایم اے عربی تے 1941 وچ ایم اے فارسی دے امتحانات وچ وی شاندار کامیابی حاصل کیتی۔مولانا نیازی شروع توں ای اسلامی انقلابی ذہن رکھدے سن۔ اوہناں نے 1936وچ مجلس اصلاح قوم میانوالی ائم کیتی تے ایسے سال لہور وچ حکیم الامت حضرت علامہ محمد اقبال دے مشورے نال جناب حمیدنظامی‘ میاں محمد شفیع (م۔ش) جسٹس انوارالحق تے دوجے دوستاں نال رل کے مسلم سٹوڈنٹس فیڈریشن پنجاب دی بنیاد رکھی۔ 1937 وچ قائداعظم دی بھرواں حمایت دا اعلان کیتا۔ 1938 وچ مسلم لیگ ضلع میانوالی دے صدر منتخب ہوئے۔ 1939 وچ پنجاب مسلم سٹوڈنٹس فیڈریشن دے نصب العین خلافت پاکستان نوں کتابی شکل وچ مرتب کیتا۔ اوہناں دناں دہلی وچ ال انڈیا مسلم کانٹی تیوشن کمپنی دے اجلاس ہو رہے سن۔ اکتوبر 1939 وچ مولانا نیازی نوں آل انڈیا مسلم سٹوڈنٹس فیڈریشن کونسل تے ورکنگ کمیٹی دے اجلاس وچ مسلم سٹوڈنٹس فیڈریشن پنجاب دے صدر دی حیثیت نال رلت دا موقع لیا۔مارچ 1940 وچ اقبال پارک لہور وچ ال انڈیا مسلم لیگ دا 26واں سالانہ اجلاس منعقد ہویا جتھے 23مارچ نوں قرارداد پاکستان منظور کیتی گئی۔ مولانا نیازی وی ایس اجلاس وچ شریک سن۔ مولانا نیازی‘ حمید نظامی تے دوجے ساتھیاں نے اسلامیہ کالج لہور وچ پنجاب مسلم لیگ سٹوڈنٹس فیڈریشن دے پربندھ ہیٹھ پاکستان کانفرنس منقد کیتی۔ مولانا نیازی ایس ویلے فیڈریشن دے صدر تے مولانا محمد ابراہیم چشتی سیکرٹری جنرل سن۔
مولانا محمد عبدالستار خان نیازی نے ایس کانفرنس خلافت پاکستان دا تصور اجاگر کیتا تے پاکستان دا نقشہ وی شائع کیتا۔ قرارداد لہور مگروں برصغیر دے اطراف و اکناف وچ مسلم لیگ دے پربندھ ہیٹھ جلسیاں دا سلسلہ شروع ہو گیا۔ 28فروری تا یکم مارچ 1941 پنجاب مسلم سٹوڈنٹس فیڈریشن دے پربندھ ہیٹھ اسلامیہ کالج ریلوے روڈ گرائونڈ وچ پاکستان کانفرنس منعقد ہوئی جہدی صدارت قائداعظم محمد علی جناح نے کیتی۔ مولانا نیازی نے پاکستان دی حمایت وچ تقریر مگروں مرکزی ریزرویشن پیش کیتی۔ایس اجلاس وچ وڈی تعداد وچ لوکاں نے ہتھ لہرا کے قرارداد دی تائید کیتی تے نعرہ تکبیر و رسالت بلند کیتے۔ 1941 وچ ای آل انڈیا مسلم سٹوڈنٹس فیڈریشن دے جوائنٹ سیکرٹری منتخب ہوئے۔ 1944 وچ پنجاب مسلم لیگ دے قائم مقام سیکرٹری جنرل تے 1945 وچ انجمن نعمانیہ لہور تے انجمن اسلامیہ پنجاب دے سیکرٹری منتخب ہوئے۔ 1945 ای وچ اسلامیہ کالج لہور وچ صدر شعبہ کلام (اسلامیہ مقرر ہوئے۔ 1951 وچ ای اسلامیہ کالج لہور وچ صدر شعبہ علوم اسلامیہ مقرر ہوئے۔1951وچ تحریک خلافت پاکستان دے نام توں نویں سیاسی جماعت قائم کیتی تے ایس دے پہلے صدر منتخب ہوئے۔ 1952 وچ سریند شریف (بھارت) وچ حضرت مجدد الف ثانیؒ دے عرس وچ شریک ہو سکے تے اوتھے منعقدہ اک اجتماع وچ جہدے وچ ہندو وی شریک سن حق گوئی تے بے باکی دا عدیم الشان مظاہرہ کیتا جہدے اتے بارت وچ تہاڈے داخلے اتے تاحیات پابندی لا دتی گئی۔
مجاہد ملت مولانا عبدالستار خان نیازی نے 1953 دی تحریک تحفظ ختم نبوت وچ وی بے مثال خدمات انجام وچ تسیں ایس ویلے وی صوبائی اسمبلی دے ممبر سن۔ تحریک ختم نبوت دے مقاصد دے حصول لئی اک مجلس عمل قائم کیتی گئی جہدا سربراہ جمعیت علمائے پاکستان دے مرکزی صدر‘ علامہ سیدابوالحسنات قادری نوں مقرر کیتا گیا۔ مولانا سید عطداللہ شاہ بخاری‘ شیخ حسام الدین (مجلس احرار) مولانا عبدالحامد بدایونی تے صاحبزادہ سید فیض الحسن (جمعیت علمائے پاکستان) مولانا مودودی (جماعت اسلامی) تے دوجے علماء و مشائخ ایہدے وچ شامل سن۔ مجلس عمل دے قائدین نے پورے ملک وچ دورے کر کے رائے عامہ نوں بیدار کیتا۔ بالآخر سارے قائدین نوں گرفتار کر لیا گیا تے مولانا عبدالستار نیازی نے مسجد وزیر خان لہور نوں تحریک ختم نبوت دا مرکز بنایا۔ ختم نبوت دی تحریک وچ مولانا نیازی نوں گرفتار کر کے شاہی قلعہ لہور وچ منتقل کر دیا گیا۔ مارشل لا کورٹ وچ سماعت ہوئی۔ تہاڈے اتے بغاوت دا مقدمہ بنایا گیا۔
ملٹری کورٹ وچ سماعت مگروں تہانوں سزائے موت دا حکم سنایا گیا تے تسیں بڑے اطمینان نال سزائے موت دے پروانے اتے دستخط کر دتے۔ تہانوں پھانسی دی کوٹھری سے منتقل کر دتا گیا مگروں مفتی اعظم فلسطین سید امین الحسینی سنے عالم اسلام دے عظیم اکابرین دے بھرواں احتجاج تے دبائو اتے ایس سزائے موت نوں عمر قید بامشْت وچ بدل دتا گیا۔ مولانا نیازی کہیا کردے سن کہ ناموس رسالتؐ لئی پھانسی دی کوٹھڑی وچ لنگھے ہوئے ست دن تے اٹھ گھنٹے ای میرے لئی حاصل زندگی اے۔
مولانا عبدالستار نیازی نے 1974 دی تحریک تحفظ ختم نبوت دی مجلس عمل دے مرکزی سینئر نائب صدر دی حیثیت نال خدمات انجام دتیاں۔ ایس سلسلے وچ ملک بھر وچ سینکڑوں عوامی اجتماعات نال خطاب کیتا۔ 7ستمبر 1974 وچ قومی اسمبلی وچ قادیانیاں نوں غیر مسلم اقلیت قرار دینا مولانا نیازی 1970 دے عام انتخابات مگروں جمعیت علمائے پاکستان وچ باقاعدہ طور تے شامل ہوئے تے تادم زیست جمعیت علمائے پاکستان نال جڑے رہے۔ صوبائی صدر تے مرکزی سیکرٹری جنرل دے عہدیاں اتے وی فائز رہے۔ قائد اہل سنت علامہ شاہ احمد نورانی صدیقی نال آپ دی رفاقت مثالی سی۔ آپ نے علامہ شاہ احمد نورانی دی تیقدت وچ ورلڈ اسلامک مشن دے سینئر نائب صدر دی حیثیت نال وی خدمات انجام دتیاں۔
1991وچ مذہبی امور تے حج و اوقاف دا وفاقی وزیر مقرر کیتا گیا۔ 1987 وچ وزارت اواف عراق دی دعوت اتے عراق تشریف لے گئے۔ ایہناں ملکاں وچ تبلیغی جلسیاں دے علاوہ کئی مسجداں دا سنگ بنیاد وی رکھیا۔ 1991وچ قومی اسمبلی توں شریعت بل منظور کروایا تے جولائی 1991وچ پاکستانی حج وفد دے قائد دی حیثیت نال شاہ فہد نال ملاقات کیتی۔ 1993وچ قاہرہ وچ ورلڈ اسلامک کانفرنس دے اک اجلاس دی صدارت کیتی تے شیخ الازہر تے مصر دے صدر حسنی مبارک نال ملاقات کیتی۔ مارچ 1995 وچ 35 سیاسی مذہبی جماعتاں دے اجلاس وچ تحریک تحفظ ناموس رسالتؐ دا قیام عمل وچ لیایا گیا تے مولانا نیازی نوں متفقہ طور تے صدر منتخب کیتا گیا۔ آپ نے قائد اہل سنت مولانا شاہ احمد نورانی صدیقی تے قاضی حسین احمد دے نال رل کے ملکی یکجہتی کونسل دے قیام وچ وی اہم کردار ادا کیتا۔ اپریل 2000 وچ توہین رسالتؐ دے قنون وچ تبدیلی دے خلاف کامیاب تحریک چلائی جد کہ اگست 2000وچ جمہوریت دی بحالی ایلکشن شیڈول دے اعلان تے نفاذ شریعت دے مطالبے منوان لئی لہور وچ ال پارٹیز کانفرنس وچ وی بھرواں کردار ادا کیتا۔ مولانا نیازیدا وصال مختصر علالت مگروں 2مئی 2001نوں میانوالی وچ ہویا۔ نماز جنازہ ہاکی سٹیڈیم میانوالی پیر عمر صدیقی سجادہ نشین بطور شریف نے پڑھائی۔ ایہہ میانوالی دی تریخ دا سب توں وڈا جنازہ سی۔آپ دی وصیت دے مطابق آپ نوں مجاہد ملت کمپلیکس اوکھڑی موڑ میانوالی وچ آپ دی قائم کردہ مسجد دے کھبے پاسے سپردخاک کیتا گیا۔