“ککراں اتے بور ” دامُکھ وکھالی اکٹھ

منی پرمنی شاعرہ تے ماہر تعلیم نائلہ ریاض بٹ دی کتاب

علی بابر

ہفتہ 27مئی نوں ضلع کونسل ہال گوجرانوالہ وچ تنظیم یار مددگار دے پربندھ ہیٹھ منعقد ہوئی۔ تقریب دی صدارت مشہور شاعر جان کاشمیری نے کیتی جد کہ ایس تقریب دے اچیچے پروہنے جناب مدثر اقبال بٹ چیئرمین پنجابی میڈیا گروپ سن۔ تقریب دی نظامت منے پرمنے کمپیئر ممتاز ملک نے کیتی۔

اچیچے پروہنیاں وچ جناب شبیر حسین بٹ ایڈیشنل کمشنر گوجرانوالہ ۔جناب ایوب کموکا۔جناب جاوید اکرم۔۔جناب ابن آدم پسروری۔۔جناب خواجہ شجاع۔۔جناب سعید تاج۔۔ شامل سن۔ تقریب دے میزبان خواجہ رضوان تے ریاض بٹ سن جد کہ مقررین وچ عتیق انور راجہ۔۔علی احمد گجراتی ۔۔اصغر رحمانی پہلوان۔۔محترمہ عصمت نذیر ۔۔محترمہ پروفیسر ثروت سہیل۔۔محترمہ پروفیسرعالیہ سردار۔۔ محترمہ پروفیسر شاہین اقبال۔۔پروفیسر عمارہ رزاق تے عمر کریم نے نائلہ بٹ دی کتاب اتے چانن پایا۔
تقریب دا باقاعدہ آغاز تلاوت کلام پاک نال ہویا۔ یارمددگار دے جنرل سیکرٹری ذکااللہ گھمن نے ایہہ سعادت حاصل کیتی۔ نعت رسولؐ مقبول محمد شفیق نے پیش کیتی۔سٹیج سیکرٹری ممتاز ملک نے سب توں پہلاں نائلہ بٹ دی کتاب اتے تعارفی گل کیتی تے دسیا کہا یہہ کتاب بابا فرید پبلشرز نے پرنٹ کیتی تے کتاب دی ترتیب تے شاعری نوں خوب سراہیا تے اوہدے مگروں پروفیسر عمارہ نوں سٹیج تے آن دی دعوت دتی جہناں نے مشہور شاعر ڈاکٹر سعید اقبال سعدی دی نظم جہڑی اوہناں نے ککراں اتے بور تے لکھی سی‘ حاضرین دے سامنے پیش کیتی۔ چیتا رہوے سعدی صاحب ذاتی وجوہ دی بنا تے تقریب وچ موجود نہیں سن۔ اوہناں دی نظم دے کجھ شعر پیش خدمت نیں۔
ککراں تے انگور چڑھائے محمد بخش
ککراں اتے بور وکھائے نائلہ بٹ
ایدیاں حمداں نعتاں غزلاں تے نظماں
ہر اک رنگ چہ رنگ جمائے نائلہ بٹ
اینیں ہر اک صنف چہ مصرعے بنے نے
ہر مصرعے دا روپ ود ھائے نائلہ بٹ
ایدے قلم نے پیار دی خوشبو ونڈی اے
لفظاں دے نال باغ اگائے نائلہ بٹ
سعدی ایدھے مصرعے گلاں کر دے نے
لفظاں تو وی گل کرائے نائلہ بٹ
٭٭٭٭٭
پروفیسر شاہین اقبال تے عمر کریم نے فیملی ممبر ہون دی حیثیت نال کجھ نجی گلاں شیئر کیتیاں تے اوہناں دے شوہر یعنی اپنے بہنوئی ریاض بٹ نوں بھرواں خراج تحسین پیش کیتا کہ اوہناں دی معاونت نال اج نائلہ بٹ ایتھے پہنچ سکیاں۔ ایس موقع تے اوہناں نے اپنے والد مرحوم نوں وی یاد کیتا کہ جہناں دی تربیت تے دتے اعتماد نے اوہناں دی دھیاں نوں معاشرے وچ مقام دوایا۔ اوہناں نے بچیاں دی تعلیم اتے وی زور دتا۔ مسز شاہین اقبال دے بول چال دے انداز نوں ساریاں نے سراہیا۔ اصغر رحمانی نے نائلہ بٹ دی کتاب نوں سراہندے ہوئے اوہناں دے کلام دے کجھ نمونے وی پیش کیتے۔
سونے نالوں کھریاں نے نبی دیاں گلاں
سچے موتی جڑیاں نے نبی دیاں گلاں۔۔۔
عالماں محدثاں نے عزتاں کما لئیاں
منبراں تے چڑھیاں نے نبی دیاں گلاں
٭٭٭٭٭
انہوں نے ٹپے ماہیے اور بولیاں لکھنے پر بھی شاعرہ کو سراہا۔
پرنسپل ثروت سہیل تے پرنسپل عالیہ سردار نے نائلہ بٹ دی شاعری دے نال نال بحیثیت پرنسپل وی اوہناں دے بارے گل کیتی۔ ثروت سہیل صاحبہ نے اپنی کتاب وچوں انگلش نظم دا خوبصورت پنجابی ترجمہ وی پیش کیتا تے شاعرہ دی نظماں اتے گل کیتی۔ مسز عالیہ نے اپنے دیرینہ تعلق دی بنا تے نائلہ بٹ دی ذات اتے چانن پایا تے پنجابی تے پنجابی ثقافت نال اوہناں دی محبت دا ذکر کیتا۔ اوہناں نے شہدائے کربلا اتے لکھی نظماں کربلا اور ساتھی حسین دے نوں وی سراہیا۔
دشمن تے خوش کہ زیر اے کیتا حسین نوں
دین نوں جتا گئے نے ساتھی حسین دے
دل وچ ہی پی گئے نیں پانی دی پیاس نوں
دین نوں جتا گئے نے ساتھی حسین دے
٭٭٭٭٭
ایس موقعے تے اوہناں نے اپنی دوست لئی نظم وی پیش کیتی۔
رکھتی ہے آغوش میں رنگوں کی اک بہار
شوخی ہے شوخ تر ہے نائلہ ریاض بٹ
جو دوسروں کو چھاوں دے کہ خوش رہے
ایسا اک شجر ہے نائلہ ریاض بٹ
٭٭٭٭٭
نوشہرہ ورکاں توں تشریف لیائے نوید اشفاق سرا نے کتاب اتے بھرواں تبصرہ کیتا۔ اوہناں نے شاعرہ دی پنجابی نظم عشق تماشا تے بابل اتے بھرواں داد دتی۔
پینڈا عشق دا کہیڑا سوکھا اے
رنگ چڑھیا ڈاڈھا چوکھا اے
جدوں لتھیا ہونا اوکھا اے
ایس گل نوں دلوں گنوا بیٹھی
٭٭٭٭٭
اوہناں دے نزدیک ایہدے وچ بچیاں لئی اک اصلاحی پیغام اے۔
محترمہ عصمت نذیر صاحبہ نے اپنے تنقیدی مضمون دا آغاز بڑے ای سوہنے انداز وچ حمد توں شروع کیتا۔
اپنا آپ نہ دسے جہیڑا
شہ رگ نیڑے وسے جہیڑا
اسی طرح غزل پر بات کرتے ہوئے انہوں نے
امبر کسراں تارے واری جاندا اے
٭٭٭٭٭
جد میں سر تے لیندی شال نی دساں کی ۔۔۔دی وی تعریف کیتی ۔ اوہناں دے مضمون دی طوالت دے پیش نظرا وہناں نوں چھپوان دا مشورہ دتا گیا جہدے تے اوہناں نے نائلہ بٹ دے ایس شعر اتے اختتام کیتا۔
بیقدراں دی ساکے داری
ہوندی نری سزا وے سائیاں
٭٭٭٭٭
علی احمد گجراتی تے عتیق انور راجہ نے وی کتاب اتے کھل کے گل کیتی۔ علی احمد نے کتاب نوں گہری تنقید دی نظر نال پرکھ کے ایہدے اتے گل کیتی تے ایس گل اتے خوشی دا اظہار کیتا کہ نائلہ بٹ نے اظحار لئی پنجابی زبان دا سہارا لیتا۔ عتیق انور راجا نے کتاب اتے گل کردیاں منظوم تبصرہ وی کیتا۔
لو نی کڑیو پے چلیا جے ککراں اتے بور
سجن کدرے ہو نہ جاوے ایس گلوں مغرور
ککراں اتے بور پیا تے ساڈے سجناں سانوں
اینج تکیا پئی جیویں میں ہواں ازلاں تو مخمور
٭٭٭٭٭
پسرور توں تشریف لیائے اردو پنجابی دے منے پرمنے شاعر تے کالم نگار ابن آدم پسروری نے اپنے تبصرے وچ شاعری دے نال نال نائلہ بٹ دے خاندان تے اوہناں دے بزرگاں دی نیک نامی دا ذکر وی کیتا۔ اوہناں دے والد چودھری سعید احمد بٹ دی نارووال وچ سماجی تے سیاسی حیثیت دا ذکر کردیاں اوہناں دی شخصیت اتے اوہناں دے والد دی دبنگ شخصیت دے اثرات دا وی ذکر کیتا۔ اوہناں نے اوہناں دی سنجیدگی شاعری دے نال نال مزاحیہ شاعری دی وی تعریف کیتی۔ ٹپے بولیاں ماہیے تے گیتاں نوں وی سراہیا۔
پنجابی دے منے پرمنے پروفیسر نقاد اینکر جاوید اکرم نے کتاب تے شاعرہ اتے کھل کے گل کیتی تے پہلی کتاب شائع ہون تے شاعرہ نوں اپنی چھوٹی بھین دا مان دیندیاں مبارکباد پیش کیتی۔ اوہناں نے ایس گل تے خوشی دا اظہار کیتا کہ کتاب وچ نظماں‘ غزلاں تے مزاحیہ کلام وی اے۔ سارے اصناف ہون دی وجہ نال ایہہ اک رنگا رنگ گلدستہ اے۔ تاندلیانوالہ توں تشریف لیائے مشہور پنجابی شاعر ایوب کموکا نے ویلے دی کمی دے پیش نظر انتہائی مختصر مگر جامع گل کیتی۔ اوہناں دا کہنا سی کہ
اکھر پاویں سونے دے پانی نال لکھے ہون تے بھاویں سیاہی نال۔مل اوہناں اکھراں دا ای پیندا اے جنہاں دے پلے کج ہوے۔اونہاں نے کتاب دے دیباچے۔ سوچاں دی پٹاری وچ کتاب اتے کھل کے گل کیتی اے۔ منے پرمنے پنجابی شاعر تے اے ڈی سی جی گوجرانوالہ شبیر حسین بٹ صاحب نے اپنے خطاب وچ شاعرہ تے کتاب اتے گل کرن دے نال نال پنجابی بولن تے لکھن اتے زور دتا۔ اوہناں نے کہیا کہ مینوں خوشی ہوندی اے کہ پڑھے لکھے ہون تے اردو دی پروفیسر ہون دے باوجود اوہناں دی پنجابی اینی چنگی اے۔ اوہناں نے وی شاعرہ نوں پنجابی شاعری دا پہلا پراگاہ لان تے سراہیا۔ شہر دی سماجی شخصیت‘ ادبی محفلاں دی روح رواں تے چیمبر آف کامرس دے پچھلے صدر سعید احمد تاج نے وی شاعرہ تے اوہدی کتاب بارے گل کیتی۔ اوہناں نے ایس کتاب وچ ہر صنف دی موجودگی نوں تے ہر طرح دے کلام نوں پیش کرن تے شاعرہ نوں سراہیا۔ اوہناں دے نزدیک شاعرہ اپنے شہر‘گھر ‘روایت تے مٹی نال جڑی ہوئی اے۔ ایسے لئی اوہدی شاعری وچ ماں پیو‘ بھین بھراں‘ سہیلیاں تے مٹی دی محبت رچی ہوئی اے۔ پنجابی میڈیا گروپ دے چیئرمین تے تقریب دے اچیچے پروہنے مدثر اقبال بٹ نے وی پنجابی شاعری لکھن تے شاعرہ نوں مبارکباد دتی۔ اوہناں نے کہیا کہ نائلہ دی جڑیاں مٹی وچ بہت گہری نیں۔ ایہہ اپنی رہتل تے ماں بولی نال جڑی ہوئی اے۔ مہان پنجابی سیوک ہون دی بنا تے اوہناں لئی ایہہ گل باعث مسرت سی کہ اردو دی پروفیسر اپنی ماں بولی نوں نہیں بھولی۔ اوہناں نے ہمیشہ وانگوں پنجابی بولن لکھن اتے زور دتا۔
ممتاز ملک نے نائلہ بٹ دی کتاب وچوں اک نظم اپنے خوبصورت انداز وچ سنا کے حاضرین کولوں خوب داد وصول کیتی تے اوہدے مگروں نائلہ بٹ نوں مائیک اتے بلایا۔ نائلہ بٹ نے تقریب دے سارے معزز شرکا بالخصوص صغیر شہید کالج دے سٹاف تے گفٹ یونیورسٹی توں تشریف لیائے پروہنیاں دا شکریہ ادا کردیاں کتاب اتے تھوڑی جئی گل کیتی۔ اوہناں نے دسیا کہ اوہناں دے نزدیک کیکر زندگی دی علامت اے جہدے اتے اگرچہ کنڈے بوہتے نیں مگر اک اک واری اوہدے اتے وی بور آندا اے جہڑا پھل بن جاندا اے۔ حیاتی کنی تلخ کیوں نہ ہووے کدھرے نہ کدھرے کدی نہ کدی ایہدے وچ حلاوت ضرور آندی اے۔ اوہناں نے روایت نوں نبھاندے ہوئے اپنا کلام وی پیش کیتا۔
دل وچ جہیڑے رب دا چانن منگ دے نے
پہلاں ساہ دیاں لیراں ککریں ٹنگ دے نے
یار میں جہیڑے بکل وچ لکائے سن
اوہو مینوں اندروں اندریں ڈنگ دے نے
٭٭٭٭٭
تقریب دے صدر جان کاشمیری نے محفل نوں سمیٹدے ہوئے اپنے بیان وچ ایہہ تسلیم کیتا کہ اردو دے نال پنجابی وچ شاعری کرن نال اوہناں نوں طمانیت دا احساس ہویا۔ اوہناں دے نزدیک ادب نوں پھلنا پھولنا چاہیدا اے۔ لوکاں نوں لکھنا چاہیدا اے زبان کوئی وی ہووے۔ شاعرہ اتے گل کردیاں اوہناں نے کہیا کہ ایہہ کتاب بہت پہلاں آ جانی چاہیدی سی مگر چلو دیر آید درست آید۔ تقریب دے اختتام تے چیئرمین یارمددگار خواجہ رضوان نے اچیجے پروہنیاں وچ شیلڈز تقسیم کیتیاں۔ تقریب دے دوران شرکا دی تواضع دا وی پربندھ کیتا گیا سی۔ انج اک خوبصورت ادبی تقریب اپنے اختتام نوں پہنچی۔