4 سماعتاں دے باوجود ایہ ساڈھی کارکردگی اے کہ اک کیس ختم نہیں ہویا،چیف جسٹس

اسلام آباد(پنجابی میڈیا گروپ)سپریم کورٹ وچ پریکٹس اینڈ پروسیجر ایکٹ خلاف دائر درخواستاں اتے سماعت دوران چیف جسٹس قاضی فائز عیسی نے ریمارکس دتے کہ4 سماعتاں دے باوجود ایہ ساڈھی کارکردگی اے کہ اک کیس ختم نہیں ہویا۔چیف جسٹس آف پاکستان دی سربراہی وچ فل کورٹ بنچ سپریم کورٹ پریکٹس اینڈ پروسیجر ایکٹ خلاف دائر 9 درخواستاں اتے سماعت کر رہیا اے جیہڑی کہ براہ راست نشر کیتی جا رہی اے۔چیف جسٹس قاضی فائز عیسی دی سربراہی وچ سپریم کورٹ دے 15 رکنی فل کورٹ بنچ وچ جسٹس سردار طارق مسعود، جسٹس اعجاز الاحسن، جسٹس سید منصور علی شاہ، جسٹس منیب اختر، جسٹس یحیی آفریدی، جسٹس امین الدین خان، جسٹس سید مظاہر علی اکبر نقوی، جسٹس جمال خان مندوخیل، جسٹس محمد علی مظہر، جسٹس عائشہ اے ملک، جسٹس اطہر من اللہ، جسٹس سید حسن اظہر رضوی، جسٹس شاہد وحید تے جسٹس مسرت ہلالی شامل نیں۔ ایم کیو ایم دے فیصل صدیقی نے دلائل شروع کردیاں ہویاں آکھیا کہ کیس وچ فریق نہیں ہاں، عدالت دے نوٹس اتے پیش ہویا، سپریم کورٹ پریکٹس اینڈ پروسیجر سادہ اکثریت دی قنون سازی توں بدل سکدے نیں، عدالت نوں 2 فیصلیاں اتے دلائل دیاں گا۔فیصل صدیقی نے آکھیا کہ اک وار کاکڑ کیس دا حوالہ دیاں گا، تے دوجا سپریم کورٹ ریویو ایکٹ بارے فیصلے دا حوالہ دیاں گا، اینہاں فیصلیاں دے کجھ حصے موجودہ کیس نال تعلق رکھدے نیں، جسٹس عائشہ ملک نے سوال کیتا کہ آرٹیکل 191 وچ لا دا لفظ پارلیمنٹ نوں قنون سازی دا اختیار دیندا اے،ایس اتے جسٹس عائشہ ملک نے ریمارکس دتے کہ سوال ایہ سی کہ کیا سبجیکٹ ٹو لا دا مطلب ایکٹ آف پارلیمنٹ اے؟ جسٹس اعجازالاحسن نے وکیل فیصل صدیقی توں آکھیا کہ میں اک سوال پچھنا چاہندا ہاں، جس اتے چیف جسٹس قاضی فائز عیسی نے وکیل توں آکھیا کہ تسی ہر سوال دا جواب نہ دیو، تسی صرف اپنے دلائل اتے توجہ دیو۔چیف جسٹس پاکستان دے ریمارکس اتے وکیل فیصل صدیقی ہسے تے چیف جسٹس نے وکیل دے مسکران اتے تنبیہ کردیاں ہویاں آکھیاکہ ایس وچ ہسن دی کوئی گل نہیں،4سماعتاں توں کیس سن رہے ہاں، کئی کیس لیٹ ہو رہے نیں، میری اپنے ساتھی ججاں توں درخواست اے کہ اپنے سوال روک کے رکھن ، کوئی سوال کرنا چاہندا اے تے وکیل دی دلیل پوری تے ہون دیو۔جسٹس قاضی فائز عیسی نے آکھیا کہ 4 سماعتاں دے باوجود ایہ ساڈھی کارکردگی اے کہ اک کیس ختم نہیں ہویا۔وکیل فیصل صدیقی نے آکھیا کہ سپریم کورٹ قنون وچ لا دی تعریف لکھی اے، قنون بنان ویلے ایس گل اتے کوئی ابہام نہیں سی کہ لا دا کیہ مطلب اے۔ایم کیو ایم دے وکیل فیصل صدیقی نے پریکٹس اینڈ پروسیجر ایکٹ دی حمایت کر د تی تے ایکٹ خلاف درخواستاں خارج کرن دی استدعا کردیا ہویاں آکھیاکہ ایکٹ خلاف درخواستاں میرٹ اتے خارج کیتیاں جان۔سپریم کورٹ پریکٹس اینڈ پروسیجر ایکٹ کیس دی سماعت کل صبح ساڑھے 11 وجے تک ملتوی کر دتی گئی۔