اسلام آباد ہائیکورٹ نے نواز شریف دی سزا خلاف اپیلاں بحال کردتیاں

اسلام آباد( پنجابی میڈیاکورٹ) ہائی کورٹ نے العزیزیہ تے ایون فیلڈ ریفرنس وچ سابق وزیراعظم تے مسلم لیگ ن دے قائد نواز شریف دی سزا خلاف اپیلاں بحال کردتیاں۔اسلام آباد ہائی کورٹ وچ العزیزیہ تے ایون فیلڈ ریفرنس وچ نواز شریف دی سزا خلاف اپیلاں بحال کرن تے نواز شریف دی حفاظتی ضمانت لئی درخواست اُتے وی سماعت ہوئی، چیف جسٹس اسلام آباد ہائی کورٹ عامر فاروق تے جسٹس میاں گل حسن اورنگزیب اُتے مشتمل بینچ نے ساریاںدرخواستاں نوں یکجا کرکے سماعت کیتی۔ نواز شریف ولوں امجد پرویز ایڈووکیٹ تے اعظم نذیر تارڑ پیش ہوئے، نواز شریف وی عدالت وچ موجود سن جَد کہ پراسیکیوٹر جنرل نیب پراسیکیوشن ٹیم دے ہمراہ عدالت وچ پیش ہوئے۔پراسیکیوٹر جنرل نیب دا کہنا سی کہ پٹیشنر نے جس لمحے سرینڈر کیتا اوس نے خود نوں عدالت دے رحم وکرم اُتے چھڈ دتا۔چیف جسٹس نے استفسار کیتاکہ کیا تُسی اپیل کنندہ نوں گرفتار کرنا چاہندے او؟پراسیکیوٹر جنرل نیب نے آکھیا کہ ایس بارے وچ پہلاں ہی دَس چکیا ہاں کہ ساہنوں گرفتاری نہیں چاہیدی۔چیف جسٹس دا کہنا سی کہ تُسی بطور عدالتی معاون پچھ رہے او، اپیل بحال ہوئی تے ضمانت دا اسٹیٹس کیہ ہوئے گا؟پراسیکیوٹر جنرل نیب نے آکھیا کہ تُسی اپیل کنندہ توں دوبارہ ضمانتی مچلکے لے لو۔جسٹس میاں گل حسن دا کہنا سی کہ میرا خیال اے پراسیکیوٹر جنرل نے بڑی واضح پوزیشن لے لئی اے۔