سپریم کورٹ نے 34 ورھیاں بعد بااثر ماموں توں بھانجی نوں وراثت وچ حق دلوا دتا

اسلام آباد ( پنجابی میڈیا گروپ)چیف جسٹس پاکستان قاضی فائزعیسی دی سربراہی وچ3رکنی بینچ نے وراثت دے حق بارے کیس دی سماعت کیتی۔وکیل درخواست گزار نے عدالت وچ دسیا کہ بھانجی نے اپنی زمین1989 وچ ماموں سردار منصور نوں فروخت کیتی، فروخت دے20ورھیاں بعد زمین دی ملکیت دا دعوی کیتا تے اپنے دستخط توں انکاری ہوگئی۔جسٹس امین الدین خان نے آکھیا کہ زمین دی خریداری ثابت کرنا خریدارداکم سی،3 عدالتاں نے درخواست گزارخلاف فیصلہ دتا، جس اُتے وکیل یاسین بھٹی نے عدالت نوں دسیا کہ زمین دی مبینہ فروخت ویلے سارہ اختر نابالغ سی، سارہ دے ماموں سردار منصور سابق چیئرمین ضلع کونسل نیں، سردار منصور نے زمین اپنے کمسن بالاں، گھر والی، سس تے سالے دے نام منتقل کرائی۔دوران سماعت چیف جسٹس آف پاکستان قاضی فائز عیسی نے وکیل توں مکالمہ کردیاں ہویاں آکھیا کہ عورتاں دے حق نوں غیرآئینی، غیر شرعی طریقے نال سلب کیتا جارہیا اے، شرافت توں زمین بھانجی دے حوالے کردیو۔سپریم کورٹ نے دلائل سنن دے بعد محکمہ مال ڈی جی خان نوں سارہ اختر نوں5 مربع زمین دا فوری قبضہ دین دا حکم جاری کردیاں ہویاں ماموں سردار منصور نوں قنونی چارہ جوئی دے سارے خرچے بھانجی نوں ادا کرن دا حکم دتا۔