ایہو جہے ای بجٹ دی آس سی
لکھت:عتیق انور راجہ
جدوں اسیں والدین اپنے بچیاں نوں ڈگری تے نوکری لئی سکول تے کالج گھلاں گے تے فیر بچے کل نوں سائنسدان محقق تے موجد کنج بن پان گے۔جدوں ملک وچ کاروبار نہیں ہوئے گا تے معیشت کنج پکی ہوئے گی تے جدوں معیشت کمزور ہوئے گی تے بجٹ انج دا ای بنے گا۔
موجودہ حالات وچ انج دا ای بجٹ متوقع سی تے اونج وی ترقی پذیر ملکاں وچ اکثر و بیشتر انج دا ای بجٹ پیش ہویا کردا اے کیوں جے جنہاں ملکاں دی معیشت دا دارومدار بیرونی قرضیاں تے منحصر ہوئے، ایہناں ملکاں لئی عوامی مفاد دے تحفظ توں پہلے قرض خواہواں دے مفاداں دا خیال رکھنا ضروری ہوندا اے۔ دنیا دے جیہڑے وی ادارے یا ملک قرض دیندے نیں، اوہ ہمیشہ اپنی گل منوان دی ہر ممکن کوشش کردے نیں۔ پاکستان جانے کدوں قرضیاں دی دلدل وچ اترنا شروع ہویا۔ عوامی مفاد دے ناں تے کدوں ساڈی سرکاراں نے عالمی اداریاں دے اگے کشکول بھرن دی صدا اُچی کیتی۔ ایہہ ہن بوہت پرانے قصے ہو چکے نیں۔ جناب عمران خان صاحب فرمایا کردے سن کہ اوہ کسے قیمت تے بیرونی ملکاں توں قرض نہیں لین گے پر اپنے دو ورھے توں وی گھٹ ویلے وچ ایہناں نے اینا قرض لے لیا اے کہ ملکی جی ڈی پی پونے چھے توں صفر تیکر اپڑ چکیا اے۔ بجائے ایس دے کہ اوہ پہلا قرض اتار کے ملک نوں ترقی ول لے جاندے الٹا ایہناں نوںپہلے توں زیادہ سخت شرطاں تے قرضے لینے پئے رہے نیں۔
ہن تے ایہہ طے اے قرض دی ایس لعنت توں جان چھڑائے بنا کوئی وی حکومت منافے دا بجٹ پیش نہیں کر سکدی۔ ایس لئی اسیں ویکھ رہے آں کہ پچھلے کئی ورھیاں توں ساڈا بجٹ خسارے دے کول پیش ہوندا چلا آ رہیا اے۔ اک گل جیہڑی ہر وار ہوندی اے کہ حکومت بجٹ پیش کردی اے ایس دے فیدے گنواندی اے تے دوجے پاسے اپوزیشن جماعتاں ایس بجٹ دی تفصیل پڑھے سمجھے بغیر ایس بجٹ دی مخالفت وچ اواز اُچی کرن لگدی اے۔ پاکستان دے ایس مقدس ایوان جنہوں عرف عام وچ پارلیمنٹ کہیا جاندا اے۔ اینوں ایوان نوں ساڈے سیاسی قائدین نے ہمیشہ اوہ عزت نہیں دتی جیہڑی ایس ایوان دا حق سی۔ ایوان دا حق توں مراد میری عوام دا حق اے۔ عوام اپنے اپنے حلقیاں توں اپنے نمائندیاں نوں ایس لئی ووٹ دے کے پارلیمنٹ دا ٹکٹ دیندے نیں کہ اوہ نمائندے پارلیمنٹ وچ جا کے اپنی دلیلاں نال نہ صرف اپنے علاقیاں دی فلاح و بہود لئی ترقیاتی منصوبے شروع کروان بلکے ملک وچ قانون تے انصاف دی بالادستی لئی وی اپنی اواز مسلسل اُچی کردے رہن پر عوام دی بدقسمتی اے کہ انج بلکل وی نہیں ہوندا رہیا۔ ساڈے موجودہ تے سابق حکمران ہمیشہ کچن کیبنٹ دے ذریعے ملک چلان دی کوشش کردے چلے آ رہے نیں۔ کدی کوئی زیادہ اہم کم کڈنا مقصود ہوئے تے صدارتی آرڈیننس نال کم چلا لیا جاندا اے۔ جدوں سوشل میڈیا عام ہویا بجٹ توں پہلے تے بعد وچ بجٹ تے دو اعتراض بڑی شدومد نال ہوندے نیں یعنی ملکی عوام دی اکثریت سوشل میڈیا تے تعلیم لئی بوہت گھٹ بجٹ مختص کرن تے ملکی دفاع لئی بوہت زیادہ بجٹ رکھے جان تے اواز اُچی کرن لگدی اے۔تعلیم تے دفاع دونویں بوہت ضروری نیں جے تھوڑا غور کیتا جائے تے ایہہ نقطہ سمجھ آندا اے کہ تعلیم نہ صرف ساڈے لئی بلکے دنیا دے ہر ملک لئی سب توں زیادہ اہمیت رکھدی اے۔ اج دنیا وچ ایجادات دا جیہڑا طوفان آیا ہویا اے ایس دی بڑی وجہ اعلیٰ تے معیاری تعلیم دسی جاندی اے جد کہ میرے ملک وچ تعلیم دی ایہہ حالت اے کہ سکولاں وچ بچے سو وچوں سو نمبر حاصل کر رہے نیں پر ایہناں توں اک درخاست نہیں لکھی جاندی ایہناں نوں کہیا جائے کہ معاشرے وچ ایہناں دا کردار کیہ ہوئے گا تے اکثر کہندے نیں کہ ابا اماں کہندے نیں چنگے نمبراں نال ڈگری حاصل کرو تے کسے ملٹی نیشنل کمپنی وچ پرکشش نوکری لئی کوشش کرو۔ یعنی ساڈے بوہت سارے بچیاں دی تعلیم دا مقصد چنگی نوکری دا حصول رہ گیا اے۔ جدوں والدین اپنے بچیاں نوں چنگی نوکری لئی سکول تے کالج گھلن گے تاں فیر سائنس دان محقق تے موجد کنج بن پان گے۔جدوں بچیاں دے زمانہ طالب علمی وچ ایہناں دے شعور وچ نوکری پا دتی جائے اوہ کنج تجربات تے ایجادات ول آن گے۔
صاحبو! جے اسیں بحیثیت قوم چاہنے آں کہ ساڈا آن والا کل روشن ہوئے، ساڈے ملک دا بجٹ ساڈے عوام دی فلاح نوں اگے رکھدے ہوئے بنایا جائے تے سانوں اج توں ایس دی کوشش کرنی ہوئے گی۔ جے اسیں چاہندے آں کہ مستقبل نیڑے وچ ساڈا بجٹ خسارے توں نکل جائے تے سانوں کجھ بوہت بنیادی نوعیت دے کماں ول دھیان دینا ہوئے گا تے ایہہ سب تعلیم نال ممکن ہوئے گا۔ جدوں ساڈی سرکار تے عوام دونواں نوں پتہ اے کہ وڈی وڈی ڈگریاں دے حصول دے بعد وی ساڈے لکھاں نوجوان بیروزگاری دا عذاب جھیلن تے مجبور ہوندے نیں تے فیر سرکار نوں چاہیدا اے کہ ایس مسئلے لئی اک انج دا تھنک ٹینک بنائے جس دا اپنا کوئی مفاد نہ ہوئے، جیہڑا کسے اک حکومت دا چہیتہ نہ ہوئے۔انج دا تھنک ٹینک جیہڑا حکومت بدلن دے نال بدلیا نہ جائے۔ ایس تھنک ٹینک وچ انج دے پروفیسر، دانشور تے کاروباری لوک شامل ہون جیہڑے نوجواناں نوں ڈگریاں دی نس بھج توں کڈ کے کامیاب کاروبار کرن دے گُر سمجھا سکن۔سرکار ایہہ قانون بنا دیوے کہ میٹرک تے ایف اے دے بعد پجاہ فیصد طالب علماں نوں مختلف کم سکھائے جان گے کیوں جے جدوں تیکر ایس ملک دے نوجواناں نے کاروبار ول نہیں آنا ایس لاک ڈائون وچ اسیں ویکھ لیا کہ اسیں مچھر مار دوائیاں تیکر دوجے ملکاں توں منگوا رہے آں تے یاد رکھو جدوں تیکر اسیں نکی نکی ایجادات لئی دوجے ملکاں دے محتاج رہاں گے ساڈا بجٹ خسارے دا شکار ای رہوے گا۔ ایس ویلے جے تھوڑی توجہ دتی جائے تے انج دے بوہت سارے کم نیں جنہاں دے کرن نال صرف دو چار ورھیاں وچ ساڈا ملک اپنا قرض لاہ سکدا اے تے جدوں قرض لہہ جائے گا تے فیر حکومت لئی عوامی فلاح نوں اگے رکھدے ہوئے بجٹ بنانا ممکن ہو جائے گا۔
