چیف جسٹس پاکستان نے پائلٹاں دے جعلی لائسنساں دے معاملے دا نوٹس لے لیا

اسلام آباد: چیف جسٹس پاکستان نے پائلٹاں دے جعلی لائسنساں دے معاملے دا نوٹس لیندیاں ڈی جی سول ایوی ایشن توں دو ہفتے وچ جواب طلب کر لیا۔ عدالت نے پی آئی اے، ایئر بلیو، سیرین دے سربراہواں نوں وی اگلی سماعت تے پیش ہون دی ہدایت کر دتی۔ چیف جسٹس گلزار احمد نے ریمارکس دتے سول ایوی ایشن پیسے لے پائلٹ نوں لائسنس جاری کردی اے، انج لگدا اے جیویں پائلٹ چلدا ہویا میزائل اُڈا رہے ہون، اوہ میزائل جہڑا کدھرے وی جا کے مرضی نال پھٹ جائے، دسیا گیا 15ورھے پرانے جہاز وچ نقص نہیں، ملبہ پائلٹ تے سول ایوی ایشن تے پایا گیا، لگدا اے ڈی جی سول ایوی ایشن نوں بلانا پوے گا۔ چیف جسٹس پاکستان آکھیا جعلی ڈگریاں والے پائلٹاں دے خلاف کیہ کیتا گیا؟ مسافراں دی جان خطے وچ پانا سنگین جرم اے، کل اسمبلی دی کاروائی ویکھ کے حیران ہو رہیا سی۔ اودھر طیارہ حادثے دی عبوری رپورٹ آن دے بعد سی ای او ایئر مارشل ارشد ملک نے مبینہ جعلی لائسنس دے حامل پائلٹاں دے خلاف کاروائی لئی ڈی جی سول ایوی ایشن توں پائلٹاں دی فہرست منگ لئی۔ پی آئی اے دے سی ای او ولوں پچھلے دو دن دے دوران سول ایوی ایشن اتھارٹی حکام نوں دو خط لکھے گئے۔ایئر مارشل ارشد ملک نے خط وچ آکھیا فوری طور تے جعلی لائسنس دے حامل کپتاناں دی لسٹ فراہم کیتی جائے۔ قواعد دے تحت کپتاناں دے خلاف فوری ایکشن لیا جائے گا۔