شاعر صحافی تے براڈ کاسٹر

لکھت:صدام ساگر

عصر حاضر وچ بوہت ساری انج دی ادبی تے صحافتی شخصیات جنہاں نوں نے اپنے کم دی بدولت دنیائے ادب، و صحافت وچ وڈا ناں پیدا کیتا انج دے گنے چنے ناواں وچوں اک ناں ناصر زیدی دا سی۔ جنہاں دا شمار ایہناں ادیباں وچ ہوندا سی جنہاں دی ساری زندگی کتاب نال عبارت رہی ہوئے۔ ایہناں دی پیدائش مظفر نگر (یو پی انڈیا) وچ ہوئی۔ قیام پاکستان دے بعد اوہ شہر زندہ دلان لہور وچ وڈے ہوئے تے پڑھے۔ شاعری تے ادب تے صحافت دا چسکا وی ایتھوں ای پیا۔ اوہ زمانہ طالب علمی وچ اسلامیہ کالج سول لائنز لہور دے مجلہ ّّفارانٗٗ دے مدیر رہے، ایس دے علاوہ اوہناں نے کئی ادبی، فلمی، مذہبی تے عورتاں دے رسالیاں دی ادارت دا فریضہ سرانجام دتا، جنہاں وچ گُلِ خنداں، شمع، بانو، آئینہ، بچیاں دی دنیا، اُنگ، جگنو، اخبارِ مصنفین، پیام عمل وغیرہ شامل سن۔ اوہناں نے پاکستان دے پرانی ادبی جریدہ ادبِ لطیف لہور وچ 1966توں 1980 تیکر بطور مدیر پندر ورھے کم کیتا جس توں بعد اوہ اسلام آباد چلے گئے، جتھے آپ ہوری متعدد وزرائے اعظم تے صدر مملکت دے سپیچ رائٹر رہے فیر کجھ عرصے توں بعد لہور وچ رہے تے فیر توں ادبِ لطیف دے مدیر مقرر ہوئے۔
ناصر زیدی اک کتاب دوست آدمی سن، ایہناں نوں کتاباں تے کتابی چہرے چنگے لگدے سن اوہ اسلام آباد ریڈیو توں اپنے ہفتہ وار پروگرام کتاب نما، وچ اپنی گل بات دا آغاز ایس پیغام نال کردے سن۔
اللہ شوق دے تو کتابیں پڑھا کرو
میرے خیال وچ سانوں اج ایس پیغام اُتے عمل پیرا ہون دی اشد لوڑ اے کیوں جے کتاباں انسان دی بہترین زندگی دا نمونہ ہوندیاں نیں۔ ناصر زیدی دا گھر جوہر ٹائون وچ شوکت خانم دے نیڑے اے، جتھے اوہ کلے کتاباں نوں اپنا ہمدم تے ہمراز بنائے ہوئے سن۔ ایہناں دے گھر جائو تے پتا چلدا اے ایہناں دا گھر کتاباں دا مسکن اے، ایہناں نوں دن دی روشنی تے رات دی چاندنی وچ کلے رہنا پسند سی۔رات دی چاندنی وچ ایس لئی کہیا کہ اوہ آپ کہندے سن کہ :
نشانی اپنے گھر کی کیا بتائوں؟
چلے آئو، جہاں تک روشنی ہے
ایہناں نوں سویرے شبنم دے قطرے، قدرت دے رنگ تے شاخاں اُتے کھلدے ہوئے گلاب دی خوشبو دے نال نال حسین چہرے چنگے لگدے سن۔ ایس حوالے نال ایہناں دا ایہہ شعر ویکھو۔
یہ تازگی، یہ صباحت، یہ رنگ، یہ خوشبو
یہ کس حسین کا چہرہ ہے جو گلاب میں ہے
ناصر زیدی ٹی وی تے ریڈیو دے مقبول فی البدیہہ صدا کار ، نیوز کاسٹر، کمپیئر، براڈ کاسٹر تے شاعر دے طور تے اپنی پہچان آپ سن۔ ایہناں دی حیاتی دے بوہت پہلو نیں اوہ اک شاعر، محقق، مرتب، کالم نویس، مدیر مورخ تے ادبی جاسوس دے طور تے وی جانے جاندے سن۔ ادبی جاسوس توں مطلب ایہہ کہ اوہ مشہور آوارہ شعراں اُتے اصل خالق دی تحقیق کر کے ایہناں نوں حسب نسب عطا کردے سن۔ کسے نال غلط طور تے منسوب شعرا نوں اپنے خالق نال ملاندے سن۔
کچھ نہ کچھ تو مل ہی جاتی اس کو بھی داد سخن
اک گماں شہرت کا تھا ناصر کی شہرت کچھ نہ تھی
ناصر زیدی اصل وچ حسن و عشق دے شاعر سن۔ اوہ محبت دے چمن وچ چہل قدمی کردے ہوئے محبت دے گن گاندے ہوئے کسے نوں بھل جان اُتے انج صدا دیندے ۔
بھول جانا ہی مناسب ہے اُسے اب ناصر
اُس کے گن اور کہاں تک تو بھلا گائے گا
ناصر زیدی دے شعری مجموعواں وچ ڈوبتے چاند کا منظر، وصال، ورافتگی، تے التفات شامل نیں۔ایس توں علاوہ اک انتخاب ، ہمارا کشمیر، ہمارا کشمیر، دے ناں توں شائع ہویا۔ میرے کول ایہناں شعری مجموعویاں وچوں التفات، موجود اے۔ ایس دی ابتدا وچ ایہناں دا اک شعر ایس طرح درج اے کہ :
میں نے کہا کہ چاہےے تھوڑا سا التفات
اُس نے کہا، مزاج نہ بادصبا کے رکھ!
ایہہ ساری دی ساری مکالماتی غزل، ای بوہت چنگی اے، میں بار بار پڑھی اے۔ایس کتاب دے آغاز وچ ظہیر کاشمیری اپنی رائے دا اظہار انج کردے نیں کہ ناصر زیدی دا انداز بیان سادہ تے پُرکار اے اوہ شستہ تے رواں دواں شعر کہندا تے ایس دے ہاں فنی محاسن تے خیال دے ڈانڈے آپس وچ ملے ہوئے نیں ، جس طرح ایس دے احساس جمال سبک تے روح پرور اے، اونج ای ایس دیاں غزلاں توں وی گل رُخاں دے بدن دی مہک آندی اے۔
ایس توں علاوہ کتاب وچ احمد ندیم قاسمی، ڈاکٹر وحید قریشی، ڈاکٹر شان الحق حقی تے احمد فراز دی آرا شامل نیں۔ ایس کتاب دی اک ہور خاصیت ایہہ وے کہ ایس وچ کئی مقتدر مرحوم شعرائ دی آرائ وی شامل نیں جنہاں وچ جوش ملیح آبادی، احسان دانش، رئیس امروہوی تے شہرت بخاری جہے مقتدر نامور شرا دے ناں نمایاں نیں۔ التفات دے مطالعے دے دوران کجھ غزلاں نذرِ غالب، نذر فیض تے نذرِ فراز دے عنوان توں وی منسوب وکھائی دتیاں۔
ناصر زیدی میرے بزرگوار سن۔ میری ایہناں نال پہلی ملاقات پاک ٹی ہائوس وچ صوفی غلام مصطفیٰ تبسم مرحوم دی پوتی ڈاکٹر فوزیہ تبسم دی موجودگی وچ ہوئی۔ ایس توں بعد کجھ ملاقاتاں ہولی ڈے ہوٹل تے روزنامہ پاکستان دے دفتر وچ ہوئیاں۔ ناصر زیدی پاکستان اخبار وچ بادِ شمال دے عنوان توں کالم لکھدے سن۔ ایس توں علاوہ ایہناں نوں ادب لطیف لہور دا فیر توں مدیر بنایا جانا تے ایہناں دی قلمی تے تخلیقی صلاحیتاں توں فائدہ چکنا، بوہت وڈی گل سی۔
زمے بھر میں جو مشہور ہو گئے ناصر
سخنوری کے سبب ہی تو یہ کمائی کی
ایہناں دی رومانوی شاعری دا اک پہلو ایہہ سی کہ ہر مصرعے وچ نرگسیت یعنی خود جمال پرستی اپنا رنگ آپ وکھدے ہوئے محبت تے امن دا پیغام دیندی اے۔ ایہناں نوں اپنی زندگی وچ غالب نمبر تے علامہ اقبال نمبر، ادبِ لطیف، دے ضخیم پرچے شائع کرن دا اعزاز حاصل رہیا۔ اوہ پچھلے کئی مہینے توں بیمار سن تے اپنے پتر حسن ناصر تے عدیل ناصر دے نال اسلام آباد وچ رہندے سن تے پچھلے دن 3 جون 2020دی سویر اپنے خالق حقیقی نال جا ملے۔ ایہناں دی تدفین راولپنڈی دے بحریہ ٹائون دے فیز 8دے قبرستان وچ ادا کیتی گئی جس وچ بوہت ساری ادبی تے صحافتی تے دیگر شعبہ زندگی نال تعلق رکھن والی شخصیات نے شرکت کیتی۔ ایس مضمون دے دوران ایہناں دے بچپن دے دوست عطاالحق قاسمی دسدے نیں کہ اوہ میرا بچپن دا یار سی اسیں دونواں اک نال چھویں کلاس توں لے کے میٹرک تیکر پڑھیا ۔ اوہ وی ماڈل ٹائون وچ رہندے سن تے میں وی۔ فیر ساڈیاں دونواں دیاں راہواں وکھریاں ہو گئیاں۔ اوہ اک بوہت زبردست شاعر ہون دے نال نال اک غیرت مند تے غیور بندے سن۔ مینوں اپنے بچپن دے دوست دے وچھڑ جان دا شدید غم اے۔ آخر وچ ایہو کہواں گا کہ انج دے لوک گھٹ ای لبھدے نیں جنہاں نے ساری حیاتی قلم تے کتاب نال رشتہ جوڑے رکھیا ہوئے تے انج ای تاں نہیں اج سارے ایہناں نوں ناصر زیدی کہندے ایس شعر دے مصداق:
کوئی تو بات ہے ناصر میں، ہم سخن یارو!
یونہی تو سارا جہاں قدرداں نہیں ملتا