غریب مہنگائی دے بھار نال مر جائے گا

لکھت:تحریر:شاہد ندیم احمد

ایس مملکت خداداد وچ طے ہو چکیا اے کہ ایتھے عوام ہمیشہ غریب رہن گے تے خواص دے حصے وچ امارت آئے گی۔ عوام دی خواہش ای رہی کہ کاش ساڈے جہیا غریب وی اقتدار وچ آئے، ورھیاں غریب دا نعرا سب نے لایا پر کسے غریب نوں حاکم نہیں بنایا ۔ایس ملک اُتے حکمرانی دا حق صرف موروثی اشرافیہ نوں دے دتا گیا اے ایہہ سب اشرافیہ عوام دے خلاف اکٹھے تے ایہناں دا مقصد عوام نوں بے وقوف بنانا اے۔ ایہہ سب کروڑ پتی، بلکہ ارب پتی نیں، پر ایہناں دی تان ہمیشہ غریباں دی بھیڑی حالت اُتے ٹُٹ دی اے ایہہ سب بظاہر غریباں دے غم وچ ہلکان وکھائی آندے نیں پر اندر توں غریباں دے سب توں وڈے دشمن نیں۔ غریب ایہناں نوں موہڈیاں اُتے بٹھا کے ایوان اقتدار وچ لے کے آندا اے پر اقتدار دے کلب وچ کسے غریب دا کوئی عمل دخل ای نہیں، کیوں جے برسر اقتدار آن لئی غریب دا صرف موہڈا ورتیا جاندا اے۔ ایہہ کجھ فیصد اشرافیہ کدی عوام نوں امیر نہیں ہون دیوے گی، ایہہ غریب دے ناں اُتے ارباں روپئے لٹے گی، پر اک دوجے دا کدی احتساب نہیں کرے گی، البتہ احتساب دے ناں اُتے غریب عوام نوں بے وقوف ضرور بناندی رہوے گی۔
تحریک انصاف حکومت وی احتساب تے تبدیلی دے نعرے دے نال اقتدار وچ آئی اے پر احتسابی عمل اُتے سوالیہ نشان تے غریب دی حیاتی وچ کوئی تبدیلی وکھائی نہیں دے رہی۔ حکومت اک توں بعد اک بحران دے نال سر توں پیراں تیکر مسئلیاں وچ لبڑی ہوئی اے جیہڑے بقول ایہناں دے زیادہ تر ورثے وچ ملے ہوئے نیں پر کجھ اہم مسئلے ایسے دور دی پیداوار نیں۔ مثال دے طور تے کنک، کھنڈ، وغیرہ دی غیر معمولی مہنگائی نے عوام دا جینا اوکھا بنا دتا اے۔ تاجر برادری دی ہٹ دھرمی دا حال ویکھو، کہ ایس خود ساختہ مہنگائی نوں منصفانہ قرار دین دی کوشش کر رہے نیں جد کہ حکومت تماشائی بنی ہوئی اے۔ اگرچے حکومت دے کول مہنگائی نوں کنٹرول کرن لئی پرائس کنٹرول کمیشن دے ناں ہزاراں بندیاں اُتے مشتمل اک وڈا سیٹ اپ موجود اے تے حکومت سختی نال سیٹ اپ دے ذریعے مہنگائی نوں کنٹرول کرن دی کوشش کر سکدی اے پر انج نہیں ہو رہیا ایس دی وجہ ایہہ اے کہ ایہہ سیٹ اپ سر توں لے کے پیر تیکر کرپٹ زدہ اے، ایس دا بخوبی علم حکومت نوں اے پر نہ جانے کیوں حکومت ایس بیماری توں نجات حاصل کرن دی کوشش نہیں کر رہی۔
ایہہ امر واضح اے کہ مہنگائی توں ہر بندا پ ریشان اے تے ایس نال ہر قیمت اُتے نجات چاہندا اے۔ حکومت تاجر برادری نوں غیر معمولی مراعات دے رہی اے جس دے جواب وچ تاجر برادری عوام دی کھل لان وچ مصروف اے۔ ایہہ اک اوپن سیکرٹ اے فیر کیہ وجہ اے کہ تاجراں دی نک وچ نکیل نہیں پائی جا رہی ۔ تاجر برادری کنا ای منظم تے طاقتور کیوں نہ ہوئے، پر حکومت دی طاقت دے اگے کوئی برادری عوامی مفادات دے خلاف سر نہیں چک سکدی، فیر کیہ وجہ اے کہ حکومت نے تاجر برادری نوں عوام نوں لٹن دا کھلا لائسنس دے دتا اے شاید اک دوجے نال جڑے مفاد قانونی چارہ جوئی وچ وڈی رکاوٹ نیں۔ ایسے تناظر وچ مہنگائی توں متاثر عوام فطری طور اُتے حکومت توں نراض نیں جیہڑی اپوزیشن لئی کسے نعمت توں گھٹ نہیں، ایس مسئلے اُتے اپوزیشن عوام نوں متحرک کر سکدی اے پر اپوزیشن دی کارکردگی نے عوام نوں ایس قدر بدظن کر دتا اے کہ اوہ ایہناں دی کال اُتے سڑکاں اُتے آن لئی تیار نہیں۔ ایہہ سچ اے کہ عوام سڑکاں اُتے آن لئی تیار نہیں پر ایس عوامی رویے پاروں حکومت اپنی ذمے داریاں توں دستبردار نہیں ہو سکدی۔ حکومت دو ورہے لنگھن توں بعد وی نویں پاکستان دی رٹ لائے ہوئے اے، عوام سمجھن توں قاصر نیں کہ سر توں لنگھن والی مہنگائی، بے روزگاری دا نوے پاکستان نال کوئی تعلق بن اے؟ حکومت ہجے تیکر عوامی مسئلیاں دے حل لئی کسے قسم دی ترجیحات دا تعین ای نہیں کر پا رہی ، جے کدھرے ایس حوالے نال کجھ کیتا وی جا رہیا اے تے اوہ ادھورا کیتا جا رہیا اے۔ ایس ملک وچ سب توں پہلے سرکاری اداریاں دے نال بوسیدہ نظام نوں بدلن دی لوڑ اے، جدوں تیکر سسٹم تبدیل نہیں ہوئے گا نہ ای کرپشن دا خاتمہ ہوئے گا تے نہ ای حکومت مہنگائی سنے دیگر عوامی مسئلیاںا ُتے قابو پا سکے گی، موجودہ حکومت سسٹم دیاں خامیاں دی نشاندہی کردے ہوئے بدلن دی دعویدار اے پر عملی طور تے مکمل بے بس وکھائی دے رہی اے۔
اصل وچ حکومت تے اپوزیشن دی ترجیحات وچ عوام دے مسئلیاں دے تدارک دی بجائے حصول اقتدار دی رسہ کشی وچ اک دوجے نوں نیچا وکھانا رہ گیا اے۔ پارلیمان دے اجلاس وچ حزب اقتدار دے ارکان تے وزیراں دی طرفوں حکومتی کارکردگی تے عوامی فلاح لئی اقدامات تے پالیسیاں پیش کرن دے بجائے اپوزیشن اُتے زور دار تنقید کردے وکھائی آندے نیں ، اپوزیشن ارکان وی حکومت دی خوب خبر لین وچ کوئی کوتاہی نہیں کر رہے، ایسے طرح سارے پارلیمانی اجلاس ملکی نظام وچ موجود خرابیاں دور کرن، ملکی ترقی لئی پالیسیاں، تشکیل دین تے عوام نوں ودھدی مہنگائی توں نجات دلوان دی بجائے الزامات در الزامات دی گونج وچ ختم ہو رہے نیں، پارلیما عوام دے مسئلیاں دے تدارک دے حوالے نال موثر فورم اے پر سیاسی قائدین نے عوامی فورم دا استعمال اپنی ذاتی اَنا دی تسکین لئی کرنا شروع کر دتا اے۔
ایس وچ شک نہیں کہ وزیراعظم دا ویژن اک خوشحال تے ترقی یافتہ پاکستان دی تشکیل اے پر حکومت دے ترقیاتی منصوبے نظام دی خرابی دی وجہ نال کامیاب نہیں ہو رہے۔ وزیراعظم وی سسٹم ٹھیک کرن دی بجائے خرابیاں دا شکوہ کردے وکھائی دیندے نیں جد کہ ایس ویلے مرکز وچ تحریک انصاف حکومت سارے اختیارات دے نال موجود اے، پنجاب، خیبر پختونخوا، وچ ایہناں دی حکومت تے صدر وی اپنا منتخب کردہ اے، ایس سب دے باوجود نظام دیاں خرابیاں دا اپنی تھاں موجود رہنا تے ایہناں دے حل لئی کوئی پالیسی تشکیل نہ دین دا الزام تحریک انصاف حکومت اُتے ای لا رہی ہوندی اے۔ حکومت نوں اپنی کوتاہیاں دوجیاں اُتے پان دی راہ چھڈ کے اپنی ذمے داریاں نبھانیاں چاہیدیاں نیں، نظام دیاں خرابیاں دا شکوہ کرن دی بجائے ایہناں نوں ٹھیک کرن ول توجہ دینی ہوئے گی نہیں تے غریب مہنگائی دے بوجھ تھلے بھُک نال مر جائے گا۔