بے ترتیب ٹریفک سیمینار تے بے ترتیب کالم

لكهت:عتیق انور راجہ

کجھ دن پہلے گوجرانوالہ آرٹس کونسل ہال وچ ٹریفک ٓگاہی مہم نوں لے کے اک سیمینار منعقد ہویا۔ لوکاں نوں نظم و ضبط دا پابند کرن لئی منعقد کران والیاں دی اپنی بے ترتیبی دا خوب نظارہ ویکھن وچ آندا رہیا۔ سیمینار دی نظامت کرن والیاں دا لب و لہجہ تے بوہت کمال دا سی پر ایہہ صاف نظر آ رہیا سی کہ اوہناں نے نہ پہلے تے نہ سیمینار دے دوران کسے پلاننگ اُتے چلن دی کوشش کیتی ہوئے۔ ڈائس اُتے گل کران دی ترتیب دی گل کراں تے آکھاں گا کہ کسے ترتیب دا خیال ای نہ رکھیا گیا۔ اونج تے میزبان دی مرضی جنہوں چاہے جدوں چاہے سٹیج اُتے بٹھائے تے گل کرن نوں کہے پر جدوں گل لوکاں نوں ڈسپلن دا پابند کرن دا درس دین دی ہوئے تے فیر ’’ڈیکورم‘‘ دا خیال رکھیا جانا بوہت ضروری ہوندا اے۔ تقریب دی صدارت CTO جناب آصف صدیق کر رہے سن پر سیمینار دے مہمان خصوصی سہیل احمد عزیزی دی اجازت نال سیمینار دا باقاعدہ آغاز کرایا گیا۔ ٹریفک پولیس نے جتھے بوہت سارے سماجی لوکاں نوں مدعو کیتا سی اوتھے بوہت ٹرک سٹینڈے توں کافی تعداد وچ ڈرائیوراں نوں وی ایس تقریب دا حصہ بنانا ضروری سمجھیا گیا پر حیرت ہوئی کہ جدوں ٹریفک مسائل تے ایہاں دے حل لئی اک خاتون نوں سٹیج اُتے بلایا گیا جس نے بے شک بوہت اعتماد تے دبنگ انداز وچ انگریزی وچ اپنا نقطہ نظر پیش کیتا پر ایس دیاں گلاں سمجھ کسے نوں نہ آئیاں۔ اک موٹیویشنل سپیکر دا کہنا سی کہ یونیورسٹی وچ داخل ہون والے سب نوجواناں لئی ڈرائیونگ لائسنس بنوان دی شرط رکھ دتی جانی چاہیدی اے۔ ایہناں دا مزید کہنا سی کہ ہیلمنٹ نہ پان والیاں نوں بھاری جرمانے کیتے جانے چاہیدے نیں۔میں ایہناں لئی ایہنا ای کہواں گا کہ ’’تسیں صرف کھڑکی وچ بہہ کے بارش دا لطف لیا ہوئے گا، تہانوں کدی دفتر جاندے ہوئے یا نوکری دی تلاش وچ موسم دی ستم ظریفی دا ساہمنا نہیں کرنا پیا ہوئے گا۔‘‘تہانوں کیہ پتہ کہ کنہے نوجواناں دے کول اپنا موٹر سائیکل ہوندا اے تے کنہے لفٹ لے کے اپنی درسگاہ جاندے نیں۔ ہن سکول و کالم کھل چکے نیں تے بوہت گھٹ عمر طالب علم وی موٹر سائیکلاں اُتے تعلیم حاصل کرن جا رہے نیں۔ خیر بعد وچ جدوں ڈاکٹر جاوید اکرم نوں خطاب کرن لئی بلایا گیا تے اوہناں نے بوہت خوبصورتی نال پنجابی زبان وچ اپنا بیانیہ پیش کیتا۔ ایہناں دا کہنا سی کہ انگریزی ساڈی زبان نہیں۔ لوک اپنی زبان نوں چنگی طرح سمجھدے نیں پنجابی زبان وچ جے سڑکاں اُتے کجھ اشعار لکھ کے لوکاں دی راہنمائی دی کوشش کیتی جائے تے ایس دا فائدہ زیادہ ہو سکدا اے۔ گوجرانوالہ بابائے پنجابی فقیر محمد فقیر دا شہر اے ایس شہر دے لوک پنجابی زبان و ادب تے صوفیا نال محبت کرن والے نیں۔ایہہ محبتاں ونڈن والیاں دا شہر اے پر ضروری اے کہ لوکاں نوں ایس زبان وچ سمجھایا جائے جیہڑی ایہناں دی اپنی اے۔
ٹریفک پولیس دے ایس سیمینار وچ میزباناں دی بے ترتیبی چل رہی سی کہ جدوں سی پی او ہوراں نوں گل کرن لئی بلایا گیا تے میں مہمانِ خصوصی جناب سہیل احمد نوں سنے بنا چپکے نال احتجاج کردا ہویا ہال توں نکل آیا تے باہر آ کے محسن ثقلین ہوراں نوں کال کر کے دسیا کہ میںتہاڈے سیمینار وچ تاڑیاں وجان بلکل وی نہیں آیا سی مینوں تسیں بلایا سی تے میں کجھ گلاں کہنیاں سن، چلو ہن کہہ دینا واں۔
صاحبو! میرا خیال اے پاکستان وچ بوہت سارے مسئلیاں دی وجہ ایہہ اے کہ اسیں بچپن وچ بالاں دی اخلاقی تربیت اُتے بوہت گھٹ دھیان دے رہے آں جے اسیں کل دے نوجواناں نوں قانون دا احترام کرن والا چنگا شہری بنانا اے تے سانوں اج ایہناں دی اخلاقی تربیت دا پورا کم کرنا ہوئے گا تے ایہہ تربیت ایس ویلے شروع ہو جانی چاہیدی اے جدوں بچہ مسجد وچ سپارہ پڑھن گھلیا جائے تے سکول وچ داخل کروایا جائے ایس دے نال نال ٹریفک پولیس نوں مسیتاں وچ جا کے امام صاحباں نال گزارش کرنی ہوئے گی کہ اوہ لوکاں نوں سمجھان کہ قانون شکنی بدتہذیبی اے، جرم اے تے گناہ وی اے۔ گوجرانوالہ شہر وچ ٹریفک مسائل اینے زیادہ ہو چکے نیں کہ ایہناں اُتے روز سیمینار کرائے جان تاں وی گھٹ نہیں ہو سکدے۔ سب توں وڈا مسئلہ تے ایہہ اے کہ ایس شہر وچ کوئی باقاعدہ پبلک ٹرانسپورٹ سسٹم ای نہیں۔ لہور جتھے ہر طرح دی جدید بساں چلدیاں نیں اوتھے تے ویگناں چل رہیاں نیں پر میرے ایس شہر نوں صرف چنگ چی رکشیاں دے حوالے کر دتا گیا اے۔ خدارا! ایس شہر دے لوکاں دی حالت اُتے رحم کھان دی کوشش کروتے پبلک پرائیویٹ اشتراک نال شہر وچ کوئی منظم ٹریفک سسٹم لے کے آئو۔ قانون دے مطابق گھٹ عمر بالاں دا بائیک چلانا جرم اے پر کیہ ریاست، انتظامیہ یا ٹریفک پولیس ایہہ نقطہ سمجھن دی کوشش کردی اے کہ کوئی مناسب سواری نہ ملن دی وجہ نال والدین گھٹ عمر بالاں نوں موٹر سائیکل اُتے سکول گھل رہے نیں۔ پاکستان دے وڈے شہراں وانگوں گوجرانوالہ نوں وی چاند گاڑی رکشیاں نے پریشان کر رکھیا اے جتھے ایہہ ماحولیاتی، صوتی آلودگی دا سبب بن رہے نیں اوتھے سڑکاں اُتے بے ہنگم انداز نال نسدے نیں تے سڑک وچکار سواریاں اتارن بٹھان دی مستقل عادت نال منٹاں دے سفر نوں گھنٹیاں وچ تبدیل کر چکے نیں۔ ہیوی ٹریفک جس دا قانوناً شہر وچ داخلہ بند اے اوہ سارا دن شہر دی سڑکاں دی زینت بنی وکھائی دیندی اے ۔ ٹریفک پولیس دے جوان چوک توں تھوڑا ہٹ کے لوڈر گڈیاں دے چالان کرن وچ مگن ہوندے نیں تے مسافر سگنل توڑ کے نکل جاندے نیں۔یعنی ٹریفک پولیس دی پہلی ترجیحی چالان کرنا ای ہوئے جویں۔ جناب عالیٰ ! ہیلمٹ نہ پان والیاں نوں بھاری جرمانے ضرور کرو پر پہلے ایہناں لئی اوہ انتظامات وی کر لوئو جیہڑے اک وڈے شہر دے واسیاں دا حق ہویا کردے نیں تے ایتھے ایہہ وی عرض کر دیواں کہ ہیلمٹ نہ پان والا اپنی جان نوں خطرے وچ پاندا اے پر ون وے دی خلاف ورزی کرن والے لوک دوجیاں دی جان دے دشمن بن رہے نیں ایہناں ول توجہ دین دی کوشش کرنا بوہت ضروری اے۔ سارا دن شہر دی سڑکاں اُتے ون وے دی خلاف ورزی دا سلسلہ چلدا رہندا اے ۔ میرے ذہن وچ لکھن نوں بوہت کجھ اے پر ایس ویلے دماغ سیمینار دی بے ترتیبی وچ الجھ کے بے ترتیب ہو رہیا اے۔ انشاء اللہ بوہت جلدی ایس مسئلے اُتے کوئی جامع کالم لکھن دی کوشش کراں گا۔