آزاد کشمیر دا 1کھرب 39ارب 50کروڑ روپے دا ٹیکس فری بجٹ پیش

مظفر آباد: آزاد جموں و کشمیر سرکار نے مالی سال 2020-21لئی 1کھرب 39ارب 50کروڑ روپے حجم دا ٹیکس فری بجٹ پیش کر دتا۔ سپیکر شاہ غلام قادر دی زیر صدارت آزاد کشمیر قانون ساز اسمبلی دا اجلاس ہویا جہدے وچ وزیر خزانہ ڈاکٹر نجیب نقی خان نے تخمینہ میزانیہ 2020-21پیش کر دتا۔ بجٹ وچ اک کھرب 15ارب غیر ترقیاتی بجٹ لئی جد کہ 24ارب 50کروڑ ترقیاتی اخراجات لئی تجویز کیتے گئے نیں۔ آمدن دا تخمینہ 1کھرب 13ارب 50کروڑ روپے لایا گیا اے جہدے وچ کیپٹل اخراجات لئی ڈیڑھ ارب روپے دا تخمینہ وی شامل اے۔ وزیر خزانہ نے مالی مشکلات دے باوجود فنڈز فراہم کرن تے حکومت پاکستان دا شکریہ ادا کردیاں آکھیا کفایت شعاری دے نال مالیاتی ڈسپلن تے آزاد خطہ دی تعمیر و ترقی نوں مدنظر رکھدیاں ہوئیاں اک بہترین بجٹ تیار کیتا اے۔ اجلاس وچ مسلم کانفرنس دے ممبر صغیر چغتائی نے پوائنٹ آف آرڈر تے گل کرن دی کوشش کیتی پر سپیکر ولوں اجازت نہ ملن تے مسلم کانفرنس تے پی ٹی آئی دے ممبران واک آؤٹ کر گئے۔