بے جا تنقید اُتے ساڈھے دل دُکھدے نیں:نامزد چیف جسٹس

اسلام آباد( پنجابی میڈیا گروپ)نامزد چیف جسٹس آف پاکستان جسٹس عمر عطا بندیال ہوراں آکھیا کہ بے جا تنقید اُتے ساڈھے دل دکھدے نیں۔ تنقید فیصلے اُتے کرو مصنف اُتے نہیں۔سپریم کورٹ بار ایسوسی ایشن نے چیف جسٹس گلزار احمد دے اعزاز وچ الوداعی عشائیہ دتا، عشائیہ وچ نامزد چیف جسٹس عمر عطا بندیال، سپریم کورٹ دے ججاں تے سینئیر وکیلاں وی رلت کیتی۔ایس موقع اُتے خطاب کردیاں ہویاں نامزد چیف جسٹس عمر عطا بندیال ہوراں آکھیا کہ بار تے بینچ دا وڈھا خوبصورت رشتہ اے، انصاف کرنا وی اک عبادت دا درجہ رکھدا اے۔اوہناں نے ہور آکھیا کہ زیر التوا کیساں دی تعداد ودھ ہو چکی اے، مقدمیاں نوں چھیتی نمٹاو گے، مقدمیاں دے فیصلے فریقیناں نوں سن کے کراں گے، تنقید فیصلیاں اُتے کرو مصنف اُتے نہیں، بے جا تنقید اُتے ساڈھے دل دُکھدے نیں۔واضح رہے کہ نویں چیف جسٹس جسٹس عمر عطا بندیال پرسوں توں اپنیاں ذمہ داریاں سنبھالاں گے۔سپریم کورٹ آف پاکستان دی ویب سائٹ اُتے جاری ہون والی تفصیل دے مطابق جسٹس عمر عطا بندیال17ستمبر 1958 نوں لہور وچ پیدا ہوئے، اوہناں نے ابتدائی تعلیم کوہاٹ،پنڈی تے پشور وچ حاصل کرن توں بعد کولمبیا یونیورسٹی امریکا توں گریجویشن کیتا۔ کیمبرج یونیورسٹی دے لنکن اِن توں بیرسٹر دی سند لئی ۔ 1983 وچ لہور ہائی کورٹ تے کجھ ورھیاں بعد سپریم کورٹ دے وکیل دی حیثیت نال درج ہوئے۔جسٹس عمر عطا بندیال نے 4 دسمبر 2004 نوں لہور ہائی کورٹ دے جج دی حیثیت نال حلف چُکیا لیکن نومبر 2007 وچ اوہناں نے سابق فوجی حکمراں پرویز مشرف دے عبوری آئینی حکم نامے(پی سی او) دے تحت حلف چُکن توں انکار کر دیا سی۔ بعد وچ اوہ 2 ورھے لئی لہور ہائی کورٹ دے چیف جسٹس وی رہے۔جون 2014 وچ اوہناں نوں سپریم کورٹ دا جج بنایا گیا۔ اپنے اعلی عدالتاں وچ منصب قاضی دیاں ذمہ داریاں نبھادیاں ہویاں جسٹس بندیال نے اہم مقدمیاں دے فیصلے دتے۔سپریم کورٹ دی ویب سائٹ دے مطابق جسٹس گلزار احمد نے 21 دسمبر 2019 نوں جسٹس ثاقب نثار دی جگہ چیف جسٹس دا منصب سنبھالیا سی ۔ جسٹس بندیال دے منصب دی میعاد مکمل ہون اُتے جسٹس قاضی فائز عیسی اوہناں دی جگہ لین گے۔ اوہناں دی چیف جسٹس لئی میعاد 25 اکتوبر 2024 تک ہوئے گی۔جسٹس مقبول باقر تے جسٹس مظہر عالم خان چیف جسٹس بنیوں بغیر ہی عدالت عظمی توں ریٹائر ہو جان گے۔