ہوا وچ کوئی فیصلہ نہیں کرسکدے،سبھ دی سُن کے فیصلہ کراں گے،سپریم کورٹ

اسلام آباد(پنجابی میڈیا گروپ)4اپریل بروزپیر نوں تحریک عدم اعتماد اُتے ڈپٹی اسپیکرقومی اسمبلی دی رولنگ دے خلاف ازخود نوٹس دی سماعت چیف جسٹس دی سربراہی وچ5رکنی لارجر بینچ نے کیتی۔سپریم کورٹ نے پیپلزپارٹی دی فل کورٹ تشکیل دین دی استدعامسترد کردتی تے ریمارکس دتے کہ فل کورٹ پاروں سارے ہور مقدمے متاثر ہندے نیں،پچھلے سال وی فل کورٹ پاروں10ہزار مقدمے ودھے سن۔پیپلزپارٹی پارلیمنٹیرنز نے فل کورٹ دی استدعا کیتی سی۔پیپلزپارٹی ولوں عدالت وچ متفرق درخواست دائر کیتی گئی سی۔فاروق ایچ نائیک نے عدالت نوں آکھیا کہ تحریک عدم اعتماد جمع کرانا سیاسی جماعتاں دا حق اے،عدم اعتماد کرن لئی وجہ دسنا ضروری نہیں،8مارچ نوں عدم اعتماد،اسمبلی اجلاس بلان دی ریکوزیشن جمع کرائی سی۔چیف جسٹس نے ریمارکس دتے کہ اج2گھنٹے تُسی فاروق نائیک نوں سُنیا اے، اج سارے وکیل2گھنٹے وچ دلائل مکمل کرسکدے سن،ہوا وچ کوئی فیصلہ نہیں کرسکدے،سبھ نوں سن کے فیصلہ ہوئے گا۔چیف جسٹس نے آکھیا کہ کل رضاربانی، مخدوم علی خان دے دلائل سن کے دُوجے فریقیاں نوں سناں گے۔جسٹس منیب اختر نے آکھیا کہ ڈپٹی اسپیکر دی رولنگ دا ایوان دی کارروائی نال براہ راست تعلق اے۔فاروق نائیک نے عدالت نوں دسیا کہ رولنگ دین توں پہلاں اپوزیشن دا مقف نہیں سنیا گیا،ساری اپوزیشن نوں غداری دا ملزم بنا دتا گیا،محب وطن ہون تے مذہب دے کارڈ نال اجے تک جمہوریت باہر نہیں نکل سکی۔جسٹس منیب اخترنے استفسار کیتا کہ پارٹی نال انحراف کرن والیاں بارے وچ کیہ خیال اے؟فاروق نائیک نے آکھیا کہ منحرف ارکان دے حوالے نال وی اپنا مقف دیاں گا،ساریاں نظراں عدالت اُتے نیں۔جسٹس اعجاز الاحسن نے ریمارکس دتے کہ اہم آئینی نکتہ اے جس اُتے فیصلے دے دوررس نتائج ہون گے، دُوجے فریق نوں سننا وی ضروری اے تاکہ فیصلہ ہو جائے۔