اسلام آباد ہائیکورٹ نے پیکا ترمیمی آرڈیننس غیر آئینی قرار دے دتا

اسلام آباد(پنجابی میڈیا گروپ)اسلام آباد ہائیکورٹ نے پریوینشن آف الیکٹرانک کرائمز(پیکا)ترمیمی آرڈیننس دے خلاف درخواستاں اُتے محفوظ شدہ فیصلہ سنادیاں ہویاں اوس نوں غیرآئینی قرار دے دتا۔اسلام آباد ہائیکورٹ دے چیف جسٹس اطہر من اللہ نے4صفحیاں اُتے مشتمل تحریری حکم نامہ جاری کیتا ۔ ہون والی سماعت وچ ڈپٹی اٹارنی جنرل،ڈائریکٹر ایف آئی اے بابر بخت قریشی عدالت وچ پیش ہوئے۔چیف جسٹس اطہر من اللہ نے آکھیا کہ لوکاں دے بنیادی حقوق پامال ہو رہے نیں،کون ذمہ دار اے؟عدالت دے ساہمنے ایس او پیز رکھے گئے تے اوہناں دی ای خلاف ورزی کیتی گئی۔ چیف جسٹس نے آکھیا کہ وفاقی تحقیقاتی ادارے(ایف آئی اے)نے ایس او پیز دی خلاف ورزی کیتی تے اوہ دفع لائیاں جیہڑیاں لگدیاں ہی نہیں۔اوہناں نے آکھیا کہ ایہ دفع ایس لئی لائی گئی سی تاکہ عدالت توں بچیا جا سکے،ایہ دس دیو کہ اوہناں ساریاں توں کِنج بچیا جا سکدا اے۔ڈائریکٹر ایف آئی اے بابر بخت قریشی نے آکھیا کہ قنون بنیا ہویا اے اوس اُتے عمل کرن لئی پریشر آندا اے۔چیف جسٹس نے استفسار کیتا کہ کیا تُسی کسی عام آدمی لئی ایکشن لیا؟لہور وچ ایف آئی آر درج ہوئی تے اسلام آباد وچ چھاپہ مارا گیا۔ڈائریکٹر ایف آئی نے آکھیا کہ گرفتاری توں بعد برآمدگی اُتے وی مقدمہ درج کیتا جاندااے۔