سپریم کورٹ دے فیصلے توں مایوسی ہوئی،امپورٹڈ حکومت کدی تسلیم نہیں کراں گا

اسلام آباد(پنجابی میڈیا گروپ)وزیراعظم عمران خان نے آکھیااے کہ سپریم کورٹ دی عزت کردا ہاں،فیصلے توں مایوسی ہوئی،عدلیہ دافیصلہ قبول کردے ہاں،میں اک ہی دفعہ جیل گیا تے آزاد عدلیہ دی تحریک لئی میں جیل گیا،امپورٹڈ حکومت نوں کدی وی تسلیم نہیں کراں گا ۔ قوم نال خطاب کردیاں ہویاں وزیراعظم نے آکھیا تقریبا26ورھے پہلاں تحریک انصاف دی بنیاد رکھی،خودداری،فلاحی ریاست تے انصاف اُتے پارٹی دی بنیاد رکھی،کسی وی مذہب تے معاشرے دی بنیاد انصاف اُتے ہندی اے،سپریم کورٹ نوں مراسلہ ویکھنا چاہنیدا سی،ڈپٹی اسپیکر نے اسمبلی سیشن بیرونی مداخلت پاروں ختم کیتا سی،اسیں کہہ رہے سان کہ ایہ اینہی وڈی سازش اے تے حکومت بدلن دی کوشش کیتی جا رہی اے،عدالت نوں ویکھنا چاہیدا سی کہ اسیں جھوٹ بول رہے ہاں یا سچ،سپریم کورٹ نوں ہارس ٹریڈنگ اُتے وی نوٹس لینا چاہیدا سی،آرٹیکل63اے بارے ریفرنس دا فیصلہ اجے تک التوا دا شکار اے،اسیں عدلیہ توں اُمید لائی ہوئی سی کہ اوہ ہارس ٹریڈنگ اُتے ازخود نوٹس لئے گی،سیاستدان کھلے عام وِک رہے نیں،سبھ نوں معلوم اے۔اپنے خطاب وچ عمران خان نے آکھیا کہ ساڈی قوم دی60فیصد توں ودھ آبادی30ورھیاں توںگھٹ نوجواناں اُتے مشتمل اے،ملک دی لیڈرشپ رشوت ستانی دے ذریعے کیہ کیہ مثال قائم کر رہی اے،عدم اعتماد وچ بیرونی مداخلت ہوئی سی،بھیڑ بکریاں ونگوں ایم این ایز دیاں بولیاں لائیاں گئیاں،عدلیہ توں توقع سی ہارس ٹریڈنگ اُتے موموٹو ایکشن لیندی،شریف برادران نے30،32 ورھیاں پہلے چھانگا مانگا دی سیاست شروع کیتی سی لوکاں توں خدمت دے ناں اُتے ووٹ لیندے نیں تے فیر ضمیر فروشی کردے نیں،مخصوص نشستاں والے اراکان وی وِک رہے نیں،ملک نوں عظیم بنان دی کوشش وچ بوہت وڈا دھچکا لگدا اے،مغرب وچ کدی کسی نوں وِکدا ہویا نہیں ویکھیا، امر باالمعروف اُتے لوکاں نوں اسلام آباد ایہی دسن لئی بلایا سی، بیرون ملک پاکستانیاں توں پُچھن کہ مغرب وچ معاشرے کِنج نیں،20 ورھے پہلاں وی برطانیہ وچ عراق جنگ دے خلاف مظاہرہ کیتا ،قوم نوںکہندا ہاں اگر تُسی لوگ کھڑے نہیں ہواںگے تے کسی نے آکر نہیں بچانا۔خفیہ خط دے حوالے نال گل کردیاں ہویاں وزیراعظم نے آکھیا کہ اپنے غیر ملکی سفارتخانیاں توں موصول ہون والے سائفر پیغام ہندے نیں، آکھیا گیا عمران خان نوں روس نہیں جانا چاہیدا سی،سیکریٹ ہون پاروں اوہ مراسلہ عوام نوں نہیں وکھا سکدا،امریکہ وچ پاکستان دے سفیر دی امریکی آفیشل نال اک ملاقات ہوئی،امریکی آفیشل نے آکھیا کہ عمران خان نوں روس نہیں جانا چاہیدے سن،ساڈے سفیر نے اوس نوں سمجھایا کہ ایہ پلان پہلاں توں بنیا ہویا سی،امریکی آفیشل نے آکھیااگر عمران خان عدم اعتماد توں بچ گیا تے پاکستان نوں خطرناک نتائج بھگتنے پین گے،ایہ آکھیا اگر عمران خان عدم اعتماد وچ ہار گیا تے پاکستان نوں معاف کر دتا جائے گا،امریکی آفیشل نوں معلوم سی کہ کس نے اچکن سلوائی ہوئی اے،ایہ22کروڑ لوکاں دی کھلے عام توہین اے، اگر اینج ای زندگی گزارنی اے تے اسیںآزاد ہی کیوں ہوئے ساں،ایس توں فوری بعد سندھ ہائوس وچ خریدوفروخت شروع ہو گئی، امریکی سفارتکار ساڈے لو کاں نال ملنا شروع ہو گئے،اوہناں نوں کجھ مہینے پہلے پتہ سی کہ عدم اعتماد آ رہی اے،اوہناں نوں کِنج پتہ سی کہ شہبازشریف نے شیروانی سلوائی ہوئی اے،آہستہ آہستہ معلوم ہویا کہ ایتھے تے پورا اسکرپٹ بنیا ہویا سی، ساہنوں فیصلہ کرنا اے آزاد قوم بن کر رہنا اے یا غلامی دی زندگی گزارنی اے۔اوہناں نے ہور آکھیا کہ اچکن سلوان والے نے قوم نوں بھکاری آکھیا،مغرب مینوں ایس ملک وچ سبھ تون بہتر جاندی اے،اوہ کیوں مینوں کڈناچاہندے نیں،میں کیہ جرم کیتا اے؟اوہناں نوں معلوم اے کہ میں نے ڈرون حملیاں دی مخالفت کیتی،افغانستان وچ جنگ دی مخالفت کیتی،جدوں نواز شریف تے آصف زرداری دیاں حکومتاں سن تے400ڈرون حملے ہوئے،سارا ڈرامہ صرف اک آدمی نوں ہٹان لئی ہورہیا اے،اوہناں نوں معلوم اے کہ ایہ غلامی نہیں کردا،نوازشریف تے آصف زرداری ڈرون حملیاں اُتے خموش رہے،ڈرون حملیاں وچ کئی قبائلیاں نوں وی مار دتا گیا،کوئی پُچھن والا نہیں سی،پیسے دے غلام ڈرے ہوئے سن،اوہناںنوں ڈر سی کہ کدھرے اوہناں دا باہر پیا ہویا پیسہ ضبط نہ ہو جائے،ساہنوں کِنج دا پاکستان چاہیداے ایہ فیصلہ اسیں آپ کرنا اے۔قوم نال خطاب کردیاں ہویاں وزیراعظم نے آکھیا کہ ہندوستان وی ساڈے نال ای آزاد ہوا سی،کسی سپر پاور دی جرات نہیں اے کہ اوہ اوتھے اینج کوئی گل کرے، میری کسی نال کوئی لڑائی نہیں،میں کسی ملک دے خلاف نہیں۔