عزت دا رستہ ایہی اے کہ منحرف رکن استعفیٰ دین تے گھر نوں جان،سپریم کورٹ

اسلام آباد(پنجابی میڈیا گروپ)سپریم کورٹ دے جج جسٹس منیب اختر نے آرٹیکل63اے دی تشریح لئی صدارتی ریفرنس اُتے سماعت دے دوران ریمارکس دیندیاں ہویاں آکھیا اے کہ عزت دا رستہ ایہی اے کہ منحرف رکن مستعفی ہو کے گھر جائے۔جمعہ نوں سپریم کورٹ وچ آرٹیکل63اے دی تشریح بارے صدارتی ریفرنس اُتے چیف جسٹس عمر عطا بندیال دی سربراہی وچ پنج رکنی لارجر بینچ نے سماعت کیتی۔ تحریک انصاف دے وکیل بیرسٹر علی ظفر نے ویڈیو لنک ذریعے دلائل دا آغاز کیتا تے چیف جسٹس عمر عطا بندیال نے اوہناں مخاطب کردیاں ہویاں آکھیا کہ علی ظفر صاحب اگر آپ نے10منٹ وچ مکمل نہ کیا تے فیر مخدوم علی خان نوں سنن گے،ایس اُتے علی ظفر نے جواب دتا میں10منٹ وچ اپنے دلائل مکمل کر لاں گا۔دلائل داآغاز کردیاں ہویاں وکیل تحریک انصاف نے آکھیا کہ63اے نوں شامل کرن دا مقصد ہارس ٹریڈنگ ختم کرنا سی،63اے دی خلاف ورزی آئین دی خلاف ورزی اے۔اوہناں نے آکھیا کہ63اے دے نتیجے وچ ووٹ شمار نہیں ہوئے گا،ووٹ کاسٹ تے ضرور ہوئے گا لیکن ایس نوں گنیا نہیں جائے گا۔بیرسٹر علی ظفر نے آکھیاکہ سیاسی جماعتاں دے کردار تے اہمیت اُتے عدالتی فیصلے موجود نیں،آزاد تے سیاسی جماعتاں دے ٹکٹ ہولڈر ممبر اسمبلی بندے نیں،63اے سیاسی جماعتاں دے ممبر بارے اے۔