پنجابی میڈیا گروپ دے پربندھ ہیٹھ پنجاب ہائوس وچ علاقائی تے پنجابی اخباراں دی مشکلاں دے حوالے نال اک سیمینار

ارشاد بھٹی

لہور (سٹاف رپورٹر) پنجابی میڈیا گروپ دے پربندھ ہیٹھ پنجاب ہائوس وچ علاقائی تے پنجابی اخباراں دی مشکلاں دے حوالے نال اک سیمینار ”علاقائی اخباراں دیاں اوکڑاں” دے عنوان نال منعقد ہویا جہدے وچ ایس گل اتے اتفاق کیتا گیا کہ علاقائی صحافت تے مقامی زباناں وچ شائع ہون والے اخباراں دے مسئلیاں دے حل لئی احتجاج سنے ہر کوشش کرنی چاہیدی اے۔ سیمینار وچ پرنٹ تے الیکٹرانک میڈیانال جڑے سینئر صحافیاں نے رلت کیتی۔ تقریب دی میزبانی وائس چیئرمین پنجابی میڈیا گروپ بلال مدثر بٹ نے کیتی۔ ایس موقعے اتے چیئرمین نیوز پیپرز اینڈ پیریاڈیکلز ایسوسی ایشن مدثر قبال بٹ نے آکھیا کہ اسیں ہمیشہ علاقائی اخباراں دے حقاں دی جنگ لڑدے ہوئے ہزاراں قلم مزدوراں دے حقوق لئی ہر فورم اتے آواز چکی اے۔ المیہ ایہہ ہے کہ ایتھے وسائل اتے اک مخصوص مافیا قابض اے جہڑا علاقائی تے مقامی زباناں وچ شائع ہون والے اخباراں دا حق وی ہڑپ کر رہیا اے۔ ایس توں وڈی بدقسمتی ایہہ ہے کہ ایس مافیا نوں ہر سرکار دی باقاعدہ سرپرستی حاصل ہوندی اے۔ جس طرح دوجے صوبیاں وچ مادری زبان دے اخباراں دی سرپرستی کیتی جاندی اے۔ پنجاب حکومت نوں وی انج ای کرنا چاہیدا اے (باقی صفحہ7بقیہ نمبر33)
لیکن ایتھے پنجابی اخباراں لئی اشتہاراں دے مخصوص کوٹے اتے عمل نہیں کیتا جا رہیا تے ایہہ قنونی کوٹہ وی ایسے مافیا دی نذر کیتا جا رہیا اے۔ علاقائی اخباراں نال لکھاں افراد دا روزگار جڑیا اے۔ جے حکومت نے علاقائی اخباراں دی سرپرستی نہ کیتی تے ایس صنعت دا مستقبل خطرے وچ پے جاوے گا۔لہور پریس کلب دے پچھلے سیکرٹری تے صحافی رہنما بابر ڈوگر دا آکھنا سی کہ مدثر اقبال بٹ نے جہڑی تحریک دا آغاز کیتا اے دراصل ایہہ ہر اوس قلم مزدور دی جنگ اے جہدے حقوق اخبار مالکان اشرافیہ دے نال رل کے سلب کر رہے نیں۔ اسیں اوہناں دے نال ہر سطح اتے ہتھ مضبوط کرن لئی تیار آں تاں جے اک خاص مافیا ساڈے قلم مزدور بھراواں دا رزق نہ کھو سکے۔پنجابی میڈیا گروپ دے صدر ندیم رضا نے آکھیا علاقائی تے پنجابی اخباراں دی شعبہ صحافت تے معاشرے وچ علم و آگہی دے فروغ وچ اہمیت توں انکار نہیں کیتا جا سکدا لیکن ایہناں اخباراں نوں جہڑے مالی مسئلیاں دا سامنا اے اوہ وی اک تلخ حقیقت اے۔ اک پاسے وڈے میڈیا گروپس نے سرکاری اشتہاراں اتے اپنی اجارہ داری قائم کر رکھی اے تے دوجے پاسے ایہناں اخباراں نوں اشتہاری ایجنسیاں دی بلیک میلنگ دا وی سامنا اے۔ سانوں ایہہ حقیقت وی تسلیم کرنی پوے گی کہ مقامی اخباراں دا قلم مزدور ایس وڈے اخبار یا مرکز دی صحافت توں بہت زیادہ مشکلاں دا شکار اے۔ اوہ مقامی وڈیرے تے افسر شاہی سنے سیاستداناں دے غیض و غضب دا سامنا وی کردا اے۔ سانوں ایہدی خدمات دا اعتراف کرنا چاہیدا اے۔بیوروچیف (پنجاب) سچ ٹی وی حنیف قمر نے آکھیا کہ علاقائی تے پنجابی اخباراں نال ہزاراں افراد دا روزگار جڑیا اے لیکن ایہہ اخبار حکومتی عدم توجہی دا شکار نیں جہدی وجہ نال اوہناں دے مسئلیاں وچ روز بروز وادھا ہوندا جا رہیا اے جہدے توں ہزاراں افراد دا روزگار خطرے وچ پے گیا اے۔ بالخصوص پنجابی اخباراں نے ساڈی ثقافت’ زبان تے عام بندے دی نمائندگی دا جہڑا فرض نبھایا اے اوہناں نوں خصوصی طور تے سراہے جان دے نال نال سرکاری سرپرستی وی درکار اے جیویں سندھ’کے پی یا بلوچستان وچ میسر اے۔ بدقسمتی نال ساڈی ہر حکومت نے ایہناں اخباراں نوں نظرانداز کیتا اے۔چیف ایڈیٹر روزنامہ الجلال شہزاد شیرازی نے آکھیا کہ علاقائی تے پنجابی اخبارصحافت دے فروغ وچ کلیدی کردار ادا کر رہے نیںلیکن حکام بالا دی عدم توجہی دی وجہ نال ایہناں اخباراں نوں شدید مشکلاں دا سامنا اے۔ ودھدی ہوئی مہنگائی دے منفی اثرات توں ایہہ اخبار وی محفوظ نہیں۔ جے حکومت نے ایہناں اخباراں نوں سرکاری اشتہاراں وچ ایہناں دا جائز حصہ نہ دتا تے ایہناں اخباراں لئی اپنا وجود برقرار رکھنا وی اوکھا ہو جاوے گا۔ منے پرمنے صحافی رہنما قاضی طارق عزیز نے آکھیا کہ علاقائی تے پنجابی اخباراں ای اصل وچ صحافت دی ریڑھ دی ہڈی نیں جہناں نال لکھاں افراد دا روزگار جڑیا اے۔ اسیں قلم مزدور ہر حکومت کولوں امید لاندے آں کہ شاید ایس واری سرکاری اشتہاراں دی تقسیم منصفانہ ہووے لیکن ہر واری ایہہ امید فیر ٹٹ جاندی اے جدوں اندازہ ہوندا اے کہ ایتھے چہرے بدلدے نیں نظام نہیں۔ ساڈا حق ہر حکومت دے نال رل کے ہمیشہ اک مخصوص مافیا ہڑپ کردا رہیا اے۔ ہن وی ایہہ مافیا حکومت دی نک دا وال اے۔ حکومت نوں خود ای اندازہ ہو جانا چاہیدا اے کہ ایہدے وسائل کجھ مخصوص سیٹھاں دی جیباں تک محدود نیں جد کہ لکھاں قلم مزدوراں دے چلہے مسلسل بجھدے چلے جا رہے نیں۔ اوہناں نے ایہہ وی آکھیا کہ مدثر اقبال بٹ دی قیادت وچ علاقائی اخبار اپنا مقدمہ ہر سطح اتے لڑن گے۔ ڈپٹی بیوروچیف سچ ٹی وی رانا کامران نے آکھیا کہ ایس ویلے جس طرح ملک معاشی بحران دا شکار اے۔ علاقائی تے پنجابی اخباراں نوں وی شدید ترین مالی بحران دا سامنا اے کاغذ دی روز بروز ودھدی قیمتاں دے نال نال اخباراں دی اشاعت وچ استعمال ہون والی شیواں دی قیمتاں وچ کئی گنا وادھا ہو چکیا اے۔ دوجے پاسے حکومت وی ایہناں اخباراں دے نال سوتیلی ماں جیا سلوک کر رہی اے جے حکومت نے علاقائی تے پنجابی اخباراں دے مسئلے حل کرن ول توجہ نہیں دتی تے اوہناں دے مسئلیاں وچ ہور وادھا ہو جاوے گا۔