آرمی چیف دی تعیناتی:24گھنٹیاں وچ پیشرفت متوقع اے
اسلام آباد( پنجابی میڈیا گروپ)آرمی چیف دی تعیناتی دے حوالے نال آئندہ24گھنٹیاں وچ پیشرفت متوقع اے۔ذرائع دے مطابق وزیراعظم میاں محمد شہباز شریف نال وفاقی وزیر دفاع خواجہ آصف نے ملاقات کیتی، ایس ملاقات دے دوران اہم سکیورٹی ادارے دے سربراہ وی موجود سن۔ وزیراعظم دے معاون خصوصی ملک احمد خان وی موجود سن ۔ ذرائع دے مطابق ذرائع ملاقات وچ آرمی چیف دی تقرری اہم تعیناتیاں بارے امور زیر غور آئے، ایس دوران پاک فوج وچ اہم تعیناتیاں بارے مشاورت کیتی گئی۔ذرائع دے مطابق آئندہ24گھنٹے دے دوران آرمی چیف دی تعیناتی اُتے پیشرفت متوقع اے۔خیال رہے کہ29 نومبر نوں آرمی چیف جنرل قمر جاوید باجوہ تے چیئرمین جوائنٹ چیفس آف سٹاف عہدے توں سبکدوش ہو رہے نیں، اوہناں دی تقرری موضوع بحث بن چکی اے۔ اگر سینیارٹی دا جائزہ لیا جائے تے ایس ویلے 5لیفٹیننٹ جنرلز نویں سپہ سالار لئی امیدوار نیں ۔ اینہاں امیدواراں وچ لیفٹیننٹ جنرل عاصم منیر، لیفٹیننٹ جنرل ساحر شمشاد مرزا، لیفٹیننٹ جنرل اظہر عباس، لیفٹیننٹ جنرل نعمان محمود، لیفٹیننٹ جنرل فیض حمید شامل نیں۔واضح رہے کہ وزیر اعظم شہباز شریف نے کجھ ہفتے پہلاں لندن دا دورہ کیتا جیتھے اوہناں نے نواز شریف نال آرمی چیف دی تعیناتی دے معاملے اُتے مشاورت کیتی تے واپسی توں بعد ساریاں اتحادی جماعتاں نوں اعتماد وچ لیا۔یاد رہے کہ19نومبر نوں پریس کانفرنس دے دوران وزیر خارجہ بلاول بھٹو زرداری نے صدر عارف علوی نوں آرمی چیف دی تقرر اُتے کسی قسم دی رکاوٹ پیدا کرن توں گریز دا مشورہ دتا سی ۔اوہناں دا کہنا سی کہ کیا صدر عارف علوی پاکستانی عوام، آئین، جمہوریت دے نال وفاداری وکھاون گے یا عمران خاننال دوستی نبھائے گا، اُمید اے ایس ویلے آئین و قنون دے تحت ساری چیزاں چلن گیاں ، اگر صدر عارف علوی نے کجھ گڑ بڑ کرن دی کوشش کیتی تے فیر اوہناں نوں نتیجہ بھگتنا پئے گا۔پچھلے دناں قومی اسمبلی وچ خطاب کردیاں ہویاں وفاقی وزیر دفاع خواجہ آصف نے آکھیا سی کہ وزارت دفاع نوں وزیراعظم دا خط موصول ہو گیا اے، جس بارے جی ایچ کیو نوں آگاہ کردتا گیا اے، اکت توں3 دناں تک سارا مرحلہ تکمیل تک پہنچ جائے گا ، سارا ہیجان ختم ہوجائے گا ایس دے بعد عمران خان نال وی 2ہتھ کرلین گے۔ خواجہ آصف نے آکھیا کہ اک ادارہ اج75 ورھیاں بعد برملا کہہ رہیا اے اسیں نیوٹرل ہاں، میں سیریس گل کردا ہاں، پیچھے تھوڑی گپ بازی ہو رہی اے، عمران خان نے نیوٹرل لفظ نوں طعنہ بنادتا اے۔ تقرری پراسس اُتے اک ہیجان برپا کیتا گیا، عمران اقتدار دی جدائی وچ پاگل ہوئے نیں، عمران خان اپنے حربیاں نال اداریاں دے احترام نوں نقصان پہنچا رہے نیں ۔ عمران خان اداریاں اُتے حملہ نہ کرن، عمران خان اداریاں دے تعاون دے باوجود کجھ نہیں کر سکے بلکہ شرمندہ ہوئے، ایس بندے نے اپنے ایم این ایز نوں چور، چور کہنا سکھایا، ہزار، پندرہ سو ورکر اوس دے جی ٹی روڈاُتے رُل رہے نیں، عمران خان خود آن لائن خطاب کردا اے۔
