ارشد شریف دی میڈیکل رپورٹ غیر تسلی بخش،اج ہی مقدمہ درج کرن دا حکم

اسلام آباد( پنجابی میڈیا گروپ)سپریم کورٹ آف پاکستان نے سینئر صحافی ارشد شریف دی میڈیکل رپورٹ غیر تسلی بخش قرار دیندیاں اج رات تک قتل دا قدمہ درج کرن دا حکم دے دتاچیف جسٹس پاکستان دی سربراہی وچ5رُکنی لارجر بینچ نے ارشدشریف قتل کیس دے ازخود نوٹس اُتے سماعت کیتی،جسٹس اعجازالاحسن، جسٹس جمال خان مندوخیل، جسٹس مظاہرعلی اکبر نقوی تے جسٹس محمد علی مظہر وی بینچ دا حصہ نیں ۔ سماعت دے سلسلے وچ ایڈیشنل اٹارنی جنرل، سیکرٹری داخلہ تے ہور اعلی حکام عدالت وچ پیش ہوئے ایس دوران سماعت چیف جسٹس نے ایڈیشنل اٹارنی جنرل نوں مخاطب کردیاں ہویاں آکھیا کہ اٹارنی جنرل صاحب !اک فیکٹ فائنڈنگ کمیٹی بنی سی، ارشد شریف دی والدہ دا خط آن توں بعد سپریم کورٹ دا ایچ آرسیل تحقیقات کررہیا اے۔چیف جسٹس نے استفسار کیتا کہ وزارت داخلہ نے پچھلے جمعہ نوںفیکٹ فائنڈنگ کمیٹی دی رپورٹ جمع کرانی سی جیہڑی کہ وزارت داخلہ نے ہُن تک جمع نہیں کرائی،کیا وزیر داخلہ نوں بلا لین؟ کیتھے نیں وزیرداخلہ؟جسٹس عمرعطا بندیال نے آکھیا کہ کیتھے نیں سیکرٹری خارجہ؟اسد مجید صاحب تے پہلاں توں ہی کافی مقبول نیں، سوشل میڈیا اُتے کیہ کیہ نہیں آکھیا جارہیا ، سوشل میڈیا اُتے جو کجھ آکھیا جارہیا اے اوہ تُسی نہیں ویکھدے۔چیف جسٹس دے استفسار اُتے ایڈیشنل اٹارنی جنرل عامر رحمان نے عدالت نوں دسیا کہ کل فیکٹ فائنڈنگ کمیٹی دی رپورٹ پیش کردیاں گے۔ایڈیشنل اٹارنی دی یقین دہانی اُتے چیف جسٹس نے نراضگی دا اظہار کردیاں ہویاں آکھیا کہ تحقیقات دے معاملیاں وچ ویلا ضائع کرنا سپریم کورٹ دا کم نہیں سرکاردا اے، ارشد شریف نامور صحافی سن، اوہناں نوں کیوں قتل کیتا گیا تے باہر دے ملک وچ ہی کیوں؟ پاکستان کول وسیع وسائل نیں کہ باہر دے ملک معاملیاں اُتے تحقیقات کر سکن، پاکستان نوں باہر دے ملک تک رسائی حاصل اے۔ چیف جسٹس پاکستان نے آکھیا کہ اٹارنی جنرل صاحب!فیکٹ فائنڈنگ کمیٹی نوں واپس آئے کافی عرصہ ہوگیا اے، حکومتی کمیشن دی حتمی رپورٹ تاحال سپریم کورٹ نوں کیوں نہیں ملی؟ ایہ کیہ ہورہیا اے، رپورٹ کیوں نہیں آرہی؟ جیہڑی میڈیکل رپورٹ پیش کیتی گئی اے اوہ وی غیرتسلی بخش اے ، سینئر ڈاکٹراں نے میڈیکل رپورٹ تیار کیتی لیکن اوہ تسلی بخش نہیں، ہر انسانی جان نوں سنجیدگی توں کم لینا ہُندا اے صحافیاں دے نال کسی صورت بدسلوکی برداشت نہیں کیتی جاسکدی ،پاکستان وچ صحافی سچائی دی آواز نیں، اگرصحافی جھوٹ بولن تے حکومت کارروائی کرن دا اختیار رکھدی اے۔عدالت دے پُچھن اُتے ایڈیشنل اٹارنی جنرل نے دسیا کہ جَد رپورٹ آئی وزیر داخلہ فیصل آباد وچ سن ، رانا ثنا اللہ دے ویکھن توں بعد رپورٹ سپریم کورٹ نوں دتی جائے گی، رپورٹ وچ کجھ حساس چیزاں ہوسکدیاں نیں، ایس اُتے چیف جسٹس نے استفسار کیتا کہ کیا وزیرِ داخلہ نوں رپورٹ تبدیل کرنی اے ؟چیف جسٹس نے سوال کیتاکہ پاکستان وچ ارشد شریف دے قتل دا فوجداری مقدمہ درج کیوں نہیں ہویا؟ ایس اُتے سیکرٹری داخلہ نے موقف اپنایا کہ فیکٹ فائنڈنگ رپورٹ دا جائزہ لے کے مقدمہ درج کرن دا فیصلہ ہوئے گا۔جسٹس مظاہر نقوی نے آکھیا کہ کیا مقدمہ درج کرن دا ایہ قنونی طریقہ اے؟ جسٹس اعجازالاحسن نے وی استفسارکیتا کہ مقدمہ درج کیتیوں بغیر تحقیقات کنج ہوسکدی اے؟ ایس اُتے چیف جسٹس دا کہنا سی کہ 5 رکنی بینچ حالات دی سنگینی پاروں ہی تشکیل دتا اے۔چیف جسٹس نے آکھیا کہ فیکٹ فائنڈنگ کمیٹی دی رپورٹ اج ہی جمع کران تاکہ کل اوس اُتے سماعت ہو سکے،43دناں توں رپورٹ دا انتظار کر رہے ہاں، معاملہ سنجیدگی نال لے رہے ہاں۔بعد ازاں عدالت نے ارشد شریف دے قتل دی ایف آئی آر اج رات تک درج کرن دا حکم دیندیاں ہویاں کیس دی ہور سماعت7دسمبر تک ملتوی کردتی۔