ڈاکٹر سہیل آفتاب نے اپنے مقالہ دا دفاع کردیاں پی ایچ ڈی مکمل کرلئی

لہور(پنجابی میڈیاگروپ)ڈاکٹر سہیل آفتاب نے اپنے مقالہ دا کامیابی نال دفاع کردیاں ہویاں پی ایچ ڈی مکمل کرلئی۔ ڈاکٹرسہیل آفتاب نے اپنی پی ایچ ڈی ریسرچ جرمن اکیڈیمک ایکسچینج سروس(DAAD) دے تحت یونیورسٹی آف ہمبرگ جرمنی دی معروف سکالرڈاکٹر میرین البرزدی نگرانی وچ مکمل کرلئی اے۔اوہناں دے مقالہ داعنوان پاکستان وچ پرائیویسی دے بنیادی حق دا تحفظ سی ، جس وچ فلسفہ ہائے قنون تے یورپی نظامِ قنون دا تجزیہ کرکے بنیادی اصول اخذ کیتے گئے نیں ۔اپنے مقالہ وچ سہیل آفتاب نے پاکستانی میڈیا دے صحافتی مواد دا تنقیدی جائزہ پیش کیتا اے، جس وچ جنسی تشدد تے بالاں تے عورتاں بارے انتہائی حساس معاملات دی کووریج دے دوران پاکستانی صحافیاں تے رپورٹراں ولوں ذاتی زندگی وچ دخل اندازی دے حوالہ نال بحث کیتی گئی اے۔ ایس طرح دے مقدمیاں دی قنونی تے عدالتی کارروائیاں دے دوران صحافتی اقدار دی خلاف ورزیاں اُتے وی روشنی پائی گئی اے۔ اوہناں نے ایہ ثابت کرن دی کوشش کیتی اے کہ پرائیویسی انسانی وقاردااک اہم جزو اے۔ایس بنیادی حق نوں یورپی عدالت برائے انسانی حقوق تے اوس دی رکن ریاستاں، جرمنی تے برطانیہ وچ مکمل تحفظ حاصل اے۔ مقالہ وچ پرائیویسی دے حق دے تحفظ لئی قنون سازی تے مطلوبہ قنونی اصلاحات بارے مفصل تجاویز پیش کیتی گئی ۔سہیل آفتاب نے اپنی تحقیق وچ ایس حوالہ نال مجوزہ قنون سازی دا اک خاکہ وی منسلک کیتا اے۔امید واثق اے کہ اوہناں دا پی ایچ ڈی مقالہ نہ صرف علمی ذخیرہ وچ ودھا دا سبب بنے گا بلکہ پاکستان وچ پالیسی سازاں نوں پرائیویسی دے تحفظ بارے کسی وی طرح دی قنون سازی کرن لئی رہنمائی وی مہیا کرے گا۔