ساری سیاسی اشرافیہ میرے خلاف ،میرے دشمن طاقتور نیں‘عمران خان
لہور( پنجابی میڈیاگروپ) پاکستان تحریک انصاف دے چیئرمین و سابق وزیر اعظم عمران خان نے آکھیا اے کہ مالی معاونت لئی پاکستان دا آئی ایم ایف نال رجوع کرنا نا گزیر اے ، اگر پی ٹی آئی اقتدار وچ واپس آندی اے تے اوس کول آئی ایم ایف دی مالی معاونت اُتے انحصار کرن دے سوا کوئی چارہ نہیں ہوئے گا، ساڈی حکومت اک آزاد خارجہ پالیسی اُتے عمل کرے گی جیہڑی کسی اک ملک اُتے انحصار نہیں کرے گی۔اوہناں نے امریکی نشریاتی ادارے بلوم برگ نوں انٹرویو دیندیاں آکھیا کہ اگر اسیں اقتدار وچ واپس آ ئے تے ساڈے کول زیادہ ویلا نہیں ہوئے گا، فوری فیصلے کرنا پین گے۔چیئرمین پی ٹی آئی توں سوال کیتا گیا کہ کیا اوہناں دے منصوبے وچ آئی ایم ایف نال تعلق برقرار رکھنا شامل اے؟ اوہناںجواب دِتا کہ ہُن ساڈے کول کوئی چارہ نہیں اے ۔ اوہناں دی حکومت نوں اقتدار وچ واپس آن توں بعد غیرمعمولی پالیسیاں بنانا ہون گیاں ۔ اوہناں نے پاکستان نوں درپیش دیوالیہ ہون والے خدشے دے حوالے نال آکھیا کہ ساڈی سری لنکا وَرگی صورتحال دا خدشہ اے، اقتدار وچ واپس آئے تے شوکت ترین نوں دوبارہ وزیر خزانہ مقرر کراں گے۔ سابق وزیر اعظم نے ایس گل دا وی عہد کیتا کہ اوہناں دی حکومت اک آزاد خارجہ پالیسی اُتے عمل کرے گی جیہڑی کسی اک ملک اُتے انحصار نہ کرے ۔ پی ٹی آئی حکومت دے سابق امریکی صدر ڈونلڈ ٹرمپ دے نال بہترین تعلقات سن لیکن جو بائیڈن دے آن توں بعد تعلقات خراب ہوئے۔
