سیدوارث شاہ سیمینار

محمدعبدالرحمن ارشد

ورلڈ پنجابی فورم،روزن ادبی فورم دی چھتر چھاویں، گجرات چیمبر آف کامرس اینڈ انڈسٹری تے محکمہ اطلاعات و ثقافت (حکومت پنجاب) دی سانجھ نال سید وارث شاہ سیمینار دا پربندھ کیتا گیا۔ ایہہ خوبصورت سیمینار گجرات چیمبر آف کامرس اینڈ انڈسٹری دے ایگزیکٹو ہال چ منعقد کیتا گیا۔ جہدے وچ پنجابی نال محبت کرن والے سوجھواناں ، شاعراں،ہیر پڑھن والیاں تے کاروباری شخصیتاں نیں رلت کیتی اتے اپنی ماں بولی پرچاردے نال نال اپنی عقیدت دا اظہار کیتا۔ سید وارث شاہ سیمیناردی پردھانگی سکندر اشفاق جی دے ذمہ سی ،جہڑی اوہناں خوب نبھائی۔نظامت دے فرائض محمد عثمان تے افضل راز نیں سر انجام دتے۔تلاوت کلام پاک دی سعادت محمد عمر ندیم نیں حاصل کیتی،جدکہ نعت رسول مقبول عارف شاہد گوندل نیں پیش کیتی۔
‘ ‘روزن ادبی فورم” ”ورلڈپنجابی فورم ” دے صدر تے جگت پنجابی سبھا دے سیکرٹری ، چئیرمین لٹریری سٹینڈنگ کمیٹی گجرات چیمبر آف کامرس اینڈ انڈسٹری ، پرائیڈ آف پنجاب ڈاکٹرمحمد افضل رازجی نے سیدوارث شاہ سیمینار بارے بھرویں گل کیتی تے دسیا کہ سید وارث شاہ جی دی حیاتی دے تن سو ورھے مکمل ہون تے اس سیمیناردا پربندھ کیتاگیا اے،سیدوارث شاہ دا لکھیا اج وی پہلے دن دی طرحاں تازہ تے نرول اے،اوہدی خوشبو اج وی محسوس کیتی جا سکدی اے۔سید وارث شاہ نیں ہیر کہانی لکھ کے ساڈے ساہمنے پنجاب دی تاریخ رکھ دتی اے، ایہہ ہن ساڈا اپنا کم اے کہ اسیں اس وچوں کیہ تلاش کر نے آں تے کیہ لوکاں تیک اپڑانے آں۔میاں محمد بخش جی بڑے سوہنے انداز وچ سید وارث شاہ نوں خراج پیش کیتا اے ۔ایہہ وڈے صوفی شاعر دا وڈے شاعرنوں خراج اے،اوہناں دا آکھنا سی ”وارث شاہ سخن دا وارث،نندے کون اوہناں نوں”سید وارث شاہ نیں ساڈی وسوں دے جہڑے مسائل سن اوہناں بڑے خوبصورت انداز چ پیش وی کیتا تے اوہدا حل وی دسیا۔ اج دے سیمینار دی صدارت گجرات چیمبر آف کامرس اینڈ انڈسٹری دے صدر سکندراشفاق نے کیتی جدکہ اچیچے پروہنے پنجابی سوجھوان،وارث شناس عبدالمجیدصابری،ڈاکٹرحفیظ احمدتے، پنجابی کھوجکار ڈاکٹر احسان اللہ طاہر سن ۔ ایس توں اڈ سٹیج تے چوہدری اسد بھٹی(سینئرنائب صدر)محمدمعصوم قمر(نائب صدر)محمد اشرف جنجوعہ(ایگزیکٹوممبر)محمد اعظم شاہد(ایگزیکٹوممبر)مسز تمثیلہ لیاقت وی موجود سن۔ سکندر اشفاق نیں اپنے خطاب چ سیمینار دے رلتیاں نوں جی آیاں آکھیا نالے دسیا کہ گجرات چیمبردی ادبی کمیٹی پچھلے پنج سالاں توں مختلف حوالیاں نال بیٹھکاں سجا کے گجرات دے ادبی ماحول نوں تروتازہ کر رئی اے،اوہناں آکھیا گو ساڈا ادارہ کاروباری لوکاں دی رہنمائی لئی پیش پیش رہندا اے پر اس کاروباری ماحول نوں زعفران بنان لئی انج دے پروگراماں دا انتظام کر دے رہندے آں،اسیں ڈاکٹرافضل راز دیاں ادبی کاوشاں دے معترف آں ،اسیں چاہواں گے کہ اوہ اپنیاں صلاحیتاں نوں بروئے کار لاندیاں ہویا ں ہوروی انج دے ادبی پروگرام کردے رہن گے۔چوہدری محمد اسد بھٹی نیں کہیاگجرات چیمبر آف کامرس دی ادبی کمیٹی ہر سال ادبی بیٹھک دا انعقاد کردی اے تے پنجابی زبان و ادب دے ہیرے اکٹھے کر دی اے ،ساڈے لئی مان دی گل اے کہ ایتھے پنجابی کھوجکار تے سوجھوان آ کے اپنے اپنے وچار سانجھے کر دے نیں۔اسیں ہر ویلے اس ادارے وچ سب نوں جی آیاں آکھدے رہاں گے۔محمد معصوم قمر نے آکھیا پنجابی ساڈی مادری زبان اے تے اس دے بچا لئی ساہنوں ای اگے ائونا پووے گاتے اسیں افضل راز جی شکر گزار آں کہ اوہ اس ادارے دے وقار نوں مدنظر رکھ کے تقریبات دا انعقاد کر دے نیں۔ڈاکٹراحسان اللہ طاہر جی نیں اپنے کھوج وچار سانجھے کیتے تے سید وارث شاہ جی بارے کھل کے گل کیتی۔اوہ کہندے نیں کہ لوک اس نوں کہانی دے تناظر وچ ویکھ دے نیں پر اس نوں پنجاب تے اوس ویلے دے حالات دے تناظر وچ ویکھنا پووے گا اس وچ پنجاب دی تاریخ ملدی اے ،لوکاں دے رہن سہن دا پتا چلدا اے،نالے اس کہانی وچ پنجاب دا مونہہ مہاندرا وی سوہنے انداز وچ پیش کیتا گیا اے۔سید وارث شاہ نیں لوکاں دے پہنان والے معنیاں نوں اصل چ آپ بیان کر دتا اے،ڈاکٹراحسان اللہ طاہر کہندے نیں سید وارث شاہ نیں خود کہہ دتا اے کہ ایہہ روح قلبوت دا قصہ اے،ساڈے لوکی کہانی سواد لے کے پڑھ دے نیں پر اصل کہانی جو سید وارث شاہ دسنا چاہندے سن اوس دا چس نہیں مان دے۔عبدالمجید صابری نیں اپنی کتاب دے تناظر وچ گل کیتی،اوہناں آکھیا کہ سید وارث شاہ جی لکھے مقطعے در اصل کہانی دا نچوڑ نیں،اس وچ دنیا جہان دی سیانف تے دانش موجود اے۔اس نوں سمجھن دی لوڑ اے،اوہناں آکھیا کہ سید وارث شاہ نیں جس انداز وچ پنجابی اکھان استعمال کیتے گئے نیں ایہہ انداز کسے ہو شاعر چ نہیں ملدا۔اک اک اکھر اوہناں دا ہیرا اے ،جس دا مل دتا ای نہیں جا سکدا،اوہناں عام لوکاں توں لے کے خاص لوکاں بارے اپنے اکھراں نوں استعمال کیتا اے،تے کھل کے گل کیتی اے۔استاد اعجاز روشن،طاہر محمود خان تے میاں احسان اللہ جی بڑے خوبصورت انداز وچ ہیر ہیش کیتی ،حاضرین نیں بڑے چنگے انداز وچ داد دتی،بلکہ لوکاں نیں آکھ آکھ فرمائش کر کے اوہناں کولوں بار بار ہیر سنی گئی۔عارف شاہد گوندل جی نیں افضل راز دی پنجابی خدمات نوں بڑھاوا دیندیاں آکھیا کہ اسیں ویکھنے آں کہ ایہہ بندہ ہر ویلے پنجابی دی ترقی لئی سوچدا اے نالے عملاًکم کر کے وکھاندا اے۔اوہ ہر ایک نوں پنجابی زبان دے ودھا لئی دعوت دیندا دسدا اے۔ایہناں دے پنجابی دے کیتے کماں دے گواہ آں۔سید وارث شاہ جی سیمینار دے کجھ شرکا دے ناں کجھ انج سن۔محمدعامر قیوم بھٹی،ملک جہانگیر،حاجی منیر سلطان،خان خلیل،محمد ارشد،محمد عبدالرحمن،عقیل مالک،محمد مالک،توقیر شبیر،محمد یونس ہنجرا،چوہدری عطا اللہ،ملک عظمت اللہ،ذوالفقار احمد،جمیل احمد،خان محمد،راشد منصور،میر اکرم،محمد عامر یوسف،میر عامر،عتیق احمد،اسد اللہ بٹ،خادم حسین،چوہدری حمید اللہ وڑائچ،آفتاب احمد،شاہد اقبال،حیدر اقبال،تنویر احمد ، امتیاز احمد،حسین شاہد،محمد امجد،فراز احمد،ارشد جمیل،عنصر اقبال،فیصل چوہدری،توں اڈ کاروباری لوکاں دی کثیر تعداد نیں شرکت کیتی۔