بوجھ صرف عوام اتے کیوں؟؟؟؟

اکرم چودھری

وزیر خزانہ اسحاق ڈار نے پیٹرول تے ڈیزل دی قیمت وچ 35 روپے دے وڈے وادھے دا اعلان کیتا اے۔یقینا ایس اعلان نوں وی وسیع تر ملکی مفاد دانام دتا جاوے گا۔ یقینا ملکی مفاد عزیز تر اے لیکن سوال ایہہ پیدا ہوندا اے کہ کیہ بوجھ صرف عوام اتے ای پایا جاوے گا؟۔ بہرحال ابتدائی طور تے سب توں پہلاں قربانی تے صرف عام بندے نے ای دینی اے۔
بہرحال اگے چل کے گل کرنے آں۔وزیر خزانہ اسحاق ڈآر کہندے نیں کہ عالمی منڈی وچ پیٹرولیم مصنوعات دیاں قیمتاں وچ تقریبا گیارہ فیصد تک دا وادھا ہویا سانوں ایہناں ساریاں شیواں نوں سامنے رکھنا پووے گا۔ پیٹرول دی قیمت وچ 50روپے فی لیٹر تک وادھے دی قیاس آرائیاں کیتیاںجا رہیاں نیں۔ لنگھے چار مہینیاں وچ اک واری وی پیٹرولیم مصنوعات دی قیمت نوں نہیں ودھایا گیا بلکہ پیٹرول دی قیمت وچ تقریبا20 روپے تک دی کمی کیتی گئی۔
وزیراعظم شہباز شریف دی ہدایت تے سٹیٹ بینک ولوں جاری کردہ روپے دی قدر دے اعدادوشمار نوں مدنظر رکھدیاں پیٹرول تے ڈیزل دی قیمت وچ 35,35 روپے فی لیٹر جد کہ لائٹ ڈیزل تے مٹی دے تیل دی قیمت وچ 18,18روپے فی لیٹر وادھے دا فیصلہ کیتا اے۔ اسحاق ڈار نے دسیا کہ پیٹرول دی نویں قیمت 249 روپے 80پیسے جد کہ ہائی سپیڈ ڈیزل دی فی لیٹر قیمت 262 روپے 80 پیسے فی لیٹر ہووے گی۔
حکومت نے پٹرول دیاں قیمتاں وچ وادھا کر کے عام بندے دا لک توڑ دتا اے۔ ویکھو پیٹرولیم مصنوعات مہنگیاں ہون گِیاں اوہدے مگروں بجلی دی فی یونٹ قیمت وی ودھ جاوے گی۔ کھان پین دیاں شیواں وی مہنگیاں ہون گئیاں۔ دوائیاں دیاں قیمتاں وچ اک واری فیر وادھا ہو جاوے گا۔
زندگی گزارن دی ساریاں بنیادی شیواں دیاں قیمتاں وچ وادھا ہووے گا۔ تنخواہاں وچ وادھا نہیں ہووے گا لیکن اخراجات ودھ جان گے۔ ایہناں حالات وچ چنگی بھلی آمدن رکھن والے افراد وی بھیڑی طرحاں متاثر ہون گے تے ایہہ تعداد کروڑاں وچ اے ایہہ کوئی معمولی گنتی نہیں اے۔ کروڑاں افراد مہنگائی دی ایس لہر نال متاثر ہون گے۔
سوال ایہہ پیدا ہوندا اے کہ کیہ حکومت دے کول ایس دے علاوہ کوئی رستہ نہیں سی۔ کیہ پیٹرولیم مصنوعات دیاں قیمتاں وچ وادھا پہلا تے آخری حل اے۔ کیہ حکومت دے کول ایہدے علاوہ پیسہ بچان یا پیسہ اکٹھا کرن دا کوئی طریقہ نہیں سی۔ جے عام بندے اتے ای بوجھ پانا اے تے ایہہ سب توں آسان کم اے۔ ایہہ کوئی وی کر سکدا اے۔ اینے پڑھے لکھے اینے وسائل رکھن والے تے حکمرانی دا وسیع تجربہ رکھن والے وی سب توں آسان رستہ اختیار کرن تے عام بندے لئی کون سوچے گا۔ کیوں حکومت معاملات چلان لئی صرف عام بندے نوں پھسان یا اوہدے اتے بوجھ پان دے بجائے کوئی ہور رستہ نہیں کڈدی۔ کیہ عام بندے اتے بوجھ پانا سب توں آسان اے۔ حکومتی فیصلیاں توں تے محسوس ہوندا اے کہ عام بندے اتے بوجھ پانا سب توں آسان رستہ اے۔
جے حکومت واقعی مالی مشکلات دا شکار اے ملک نوں مالی مسئلیاں داسامنا اے۔ معیشت کمزور ہوندی جا رہی اے تے فیر کیہ ایہہ ممکن نہیں اے کہ حکومت اپنے اخراجات وی گھٹ کرے۔ کیہ وزیراعظم ایہہ اعلان نہیں کر سکدے سن کہ اوہ قومی اسمبلی دے سارے ارکان دی مراعات ختم کر رہے نیں۔ کیہ ایہہ ممکن نہیں کہ منتخب نمائندے وی ملک دی معیشت نوں بہتر بنان لئی اپنا کردار ادا کرن جے بوجھ صرف عام بندے اتے پایا جاوے گا تے ایہہ سوچ ضرور پیدا ہوندی اے کہ اخیر کمزور طبقہ ای بوجھ کیوں برداشت کرے۔ کمزور طبقہ ای قربانی کیوں دیوے۔ کمزور طبقہ ای مشکلات کیوں برداشت کرے۔ کمزور طبقہ ای سمجھوتا کیوں کرے کیہ ایہہ ساریاں دی ذمہ واری نہیں اے کیہ ایہہ ساریاں دا ملک نہیں اے۔ جدوں کمزور ایہہ ویکھے گا کہ حکمراناں نوں تے فرق نہیں پیا اوہناں دی تے گڈی چل رہی اے تے فیر لوک سوال کرن گے کہ اوہناں نوں کوئی فرق کیوں نہیں پیندا ایہہ قربانی کیوں نہیں دیندے۔ ایس سوچ نال نفرت پھیلدی اے۔ حکومت عام بندے اتے بوجھ پاوے لیکن اپنے اخراجات وی تے گھٹ کرے۔ عوام نوں سہولت دینا کہدی ذمہ واری اے۔ جے حکمران اپنے خرچے گھٹ نہیں کرسکدے تے فیر عام بندے اتے وی بوجھ نہ پان۔ اصل مسئلہ ایہہ اے کہ عام بندے لئی سیاست کوئی نہیں کرنا چاہندا۔ عام بندے دے نام اتے سیاست سب کرنا چاہندے نیں۔ کوئی عام بندے نوں اہمیت نہیں دینا چاہندا لیکن عام بندے دے مسائل اتے جذباتی گل بات نال مارکیٹ وچ سب رہنا چاہندے نیں۔ جے تسیں کجھ کرنا چاہو تے ایہہ ممکن نہیں کہ سہولت پیدا نہیں کیتی جا سکدی ہووے رستہ کڈیا نہ جا سکدا ہووے۔
کاش کوئی حکمران ایس پاسے وی سوچے۔ اج عمران خان نوں مہنگا ہوندا پیٹرول تکلیف دے رہیا اے لیکن اوہناں دے اپنے دور حکومت وچ پیٹرولیم مصنوعات دیاں قیمتاں وچ وادھے اتے مہنگے پیٹرول دا موازنہ کیتا جاندا سی تے ایہہ ثابت کیتا جاندا سی کہ پاکستان وچ پیٹرول دوجے ملکاں توں سستا اے۔
وزیر دفاع خواجہ آصف نے چیئرمین تحریک انصاف عمران خان نوں پچھلے صدر آصف علی زرداری اتے قتل دی سازش دے الزام توں متعلق بیان اتے آڑے ہتھوں لیا اے۔ خواجہ آصف کہندے نیں کہ عمران خان نے نواں پینترا بدلیا اے۔ الزام لایا اے کہ آصف زرداری اوہناں نوں قتل کرانا چاہندے نیں۔ ساڈی سیاست وچ ایسے واقعات نہ پہلے ہوئے نیں تے نہ آئندہ ہون گے۔ سیاسی اختلافات ہوندے رہندے نیں تے آئندہ وی ہوندے رہن گے۔ عمران خان دے بیان نال پیپلز پارٹی دی قیادت نوں جان دا خطرہ لاحق ہو گیا اے۔ پیپلز پارٹی تے اوہ جماعت اے جہنے بھٹو تے بے نظیر دی شہادت نوں وی قبول کر کے اپنا سیاسی سفر جاری رکھیا اے۔
عمران خان نوں انج دے بیانات توں گریز کرنا ہووے گا۔ ایہہ بیانات سیاسی تے ہین لیکن یاد رکھو ایہہ شرانگیزی اے۔ ایہہ نفرت پھیلان دی سوچ اے۔ انج دے بیانات نال عوامی سطح اتے بے چینی پھیلدی اے۔ ووٹرز جذباتی ہوندے نیں۔ اوہناں دے جذبات نوں بھڑکان نال امن و امان دے حالات خراب ہون دا اندیشہ موجود رہندااے۔ ایہہ بیان واپس لیتا جانا چاہیدا اے تے جے واقعی ایس قسم دی سازش یا منصوبہ بندی دے حوالے نال معلومات نیں تے متعلقہ اداریاں دے نال معلومات دا تبادلہ ہونا چاہیدا اے۔ ایس معاملے وچ بیان بازی دی بجائے قنونی رستہ اختیار کرنا بوہتا بہتر ہووے گا۔